Protesta e 12 nëntorit, Hajdari në Politiko: Opozita ia doli! Rama duhet të fillojë të ketë frikë nga qytetarët e këtij vendi

Ish deputetja Rudina Hajdari e ka cilësuar protestën e 12 nëntorit si një nga më të mëdhatë të zhvilluara ndonjëherë në Shqipëri.

E pyetur nga Politiko.al nëse e përmbushi protesta e opozitës qëllimin e saj, Hajdari thotë se opozita ia doli t’i tregojë qeverisë Rama masivitetin e pakënaqësisë popullore, si dhe tregoi se po krijon frymën e duhur për të hyrë në fushatën e zgjedhjeve lokale si pretendente për të fituar shumicën dërrmuese të bashkive të vendit.

“Protestat politike kanë si synim të përballin qeverinë me masivitetin e pakënaqësisë popullore si edhe të artikulojnë teza politike, ekonomike dhe sociale të cilat godasin realitetin dhe krijojnë shpresë për të ardhmen duke vrarë frikën dhe duke krijuar bindjen se një qeverisje alternative do të ishte zgjidhje për shumë nga problemet e qytetarëve.

Duke qenë se kjo ishte një nga protestat më të mëdha të zhvilluara ndonjëherë në Shqipëri, unë besoj se opozita ia doli t’i tregojë masivitetin e pakënaqësisë popullore ndaj Ramës dhe enturazhit të tij si edhe të inkurajojë qytetarët kudo ndodhen nga Vermoshi në Konispol për t’u angazhuar fuqishëm në kampin opozitar sepse numrat dhe fryma gjenden në krahun tonë.

Nga krahu tjetër të gjithë folësit në protestë dhanë mesazhe të rëndësishme dhe u fol për pothuajse çdo fushë të jetës, duke treguar problemin, por edhe duke prekur zgjidhjet.

Së fundmi, opozita tregoi se po krijon frymën e duhur për të hyrë në fushatën e zgjedhjeve lokale si pretendente për të fituar shumicën dërrmuese të bashkive të vendit, gjë të cilën unë e kam bindje se do të ndodhë sepse primaret si një risi politike janë duke krijuar një përshtypje shumë pozitive te qytetarët përsa i përket garës së brendshme dhe cilësisë së kandidatëve dhe duke i shtuar kësaj edhe pakënaqësinë e madhe popullore, e cila u reflektua edhe te pjesëmarrja e jashtëzakonshme në protestë, fitorja për opozitën është shumë afër”, shprehet Hajdari në Politiko.al.

Hajdari thotë se pas protestës së të shtunës, kryeministri Rama duhet të fillojë të ketë frikë nga qytetarët e vendit.

“Mesazhi kryesor është që duhet të fillojë të ketë frikë nga qytetarët e këtij vendi. Deri më dje ishin qytetarët që kanë patur frikë nga Rama, sepse e përdor pushtetin si mjet shantazhi e kontrolli duke goditur dhe ndëshkuar ata që nuk janë dakord me të, por masiviteti i protestës I ka dhënë kurajë qytetarëve të përballen edhe më shumë me regjimin duke bërë që të jetë qeveria ajo që ka frikë tashmë nga qytetarët.

Rama e di më mirë se kushdo që humbja e tij është e afërt por unë nuk besoj se makthi i tij është humbja, por ajo që ndodh mbas humbjes, sepse fatura e abuzimeve dhe grabitjeve që i janë bërë vendit nga qeverisja e tij është marramendëse dhe ai e di se humbja e pushtetit do ta çojë për një kohë të gjatë në bankën e të akuzuarve dhe si pasojë në qeli.

Ajo që shpresoj, është që të paktën këtë periudhë të shkurtër që i ka mbetur për të qeverisur, deri në fitoren totale të opozitës, të mos vazhdojë me abuzimet duke mos i shtuar akuza të tjera vetes së tij për nesër”, tha ish deputetja demokrate.

Protesta u thirr nga Partia Demokratike e Partia e Lirisë të shtunën që lamë pas dhe zgjati rreth tre orë para kryeministrisë.

Kjo protestë ka qenë kryesisht e qetë, ndërsa vetëm në fund u shënuan disa incidente për shkak se protestuesit hodhën bojë ndaj godinës së kryeministrisë dhe u shoqëruan nga policia. /S.F/