Pushime? Jo për ne

Politiko.al

Vera, teorikisht është stina e detit, pushimeve dhe çlodhjes. Por për shumë të rinj shqiptarë, sidomos ata që nuk kanë mbështetje ekonomike, është koha për të punuar, jo për të pushuar.

Kur i pyet të rinjtë se çfarë do bëjnë këtë verë, përgjigja më e zakonshme nuk është “do pushoj”, por “do punoj”.

“Do të punojë gjatë sezonit në Dhërmi. Fillimisht në kuzhinë sepse ka shume fluks dhe nga korriku-gusht do kaloj si kamarier.”, thotë për Politiko.al 20-vjeçari S.K.

Rritja e çmimeve dhe mospasja e mundësisë për të përballuar jetesën i ka shtyrë shumë të rinj të shfrytëzojnë muajt e verës për të siguruar të ardhura.  Puna sezonale, është kthyer në një domosdoshmëri.

Nga ana tjetër, bregdeti shqiptar po mbushet me pushues por kryesisht të huaj ose shqiptarë nga diaspora.

Ndërkohë që ata çlodhen, shumë të rinj vendas përballen me turne 12-orësh, pagë minimale dhe shpesh pa kontratë pune.

 “Kjo është hera e dytë që unë vij në Dhërmi. Vjet kam punuar në Himarë. Erdha në Dhërmi se kur punon kamarier ke më shumë bakshishe nga të huajt por dhe nga shqiptarët. Lodhemi vërtet po të paktën ushqimet dhe fjetjen na i heq puna. Kështu kemi mundësi të ruajmë ndonjë lekë për shkollën dhe të ndihmojmë familjen”, tregon i riu.

I pyetur për turnet, S.K tha se ka raste që  punojnë mbi 12 orë në varësi të fluksit të punës.

“Sidomos gushti është full me njerëz. Aty na ikën djersa rrëke. Paga bazë nuk është shumë e lartë po shyqyr që kemi bakshishet. Fakti që jemi sezonal nuk kemi as kontratë pune. Ka dhe shokë të mit që janë nga 17 vjec dhe kanë ardhur të punojnë”, thotë 20-vjeçari për Politko.

Vera si simbol i çlodhjes dhe jetës së bukur, për shumë shqiptarë të rinj, mbetet një ëndërr e shtyrë.

Ata janë brezi që më shumë se kurrë dëshiron të jetë i pavarur, por që më shumë se kurrë e ka të vështirë ta arrijë këtë pa sakrifica.

Gjatë muajit maj 2025, sipas të dhënave të INSTAT, numri i hyrje-daljeve të shtetasve të huaj në territorin shqiptar ka qenë më i lartë se ai i vendasve. Megjithatë, ritmi i rritjes së turistëve të huaj ka shënuar një ngadalësim të dukshëm krahasuar me një vit më parë.

Në total, në Shqipëri kanë hyrë 1.676.222 shtetas shqiptarë dhe të huaj – një rritje me 4,3% krahasuar me majin 2024. Nga këta, 689.145 janë shtetas shqiptarë që kanë hyrë në vend, duke reflektuar një rritje me 8,9%.

Nga ana tjetër, hyrjet e shtetasve të huaj në Shqipëri arritën në 987.077, por rritja e tyre është ngadalësuar ndjeshëm. Ndërkohë, shqiptarët kanë udhëtuar më shumë jashtë vendit: 710.048 shtetas rezultojnë të kenë dalë nga territori i Shqipërisë, me një rritje prej 7,2% krahasuar me majin e vitit të kaluar./ NETA FERO