Rama, Zhegrova dhe pasaporta shqiptare në ankand!

Një mesazh në WhatsApp nga Rama, një dekret presidenti dhe pasaporta shqiptare në dorë. Edon Zhegrova, futbollisti i njohur shqiptar i Lille, është bërë kryefjalë e mediave pasi njoftoi pajisjen me pasaportë shqiptare në një mënyrë aspak të zakontë.

Në rrjetin e tij social Instagram, Zhegriva ndau një mesazh të dërguar nga kryeministri Rama i cili i kishte nisur dekretin presidencial të nënshkruar nga Bajram Begaj, ku ky i fundit i jepte futbollistit shtetësinë shqiptare.

 

Rasti ‘Zhegrova’ ka ngjallur diskutime, debate e polemika në rrjet, për mënyrën se si qeveria e ka nxjerrë në ‘shitje’ pasaportën shqiptare, si të ishte një vepër arti për t’u shitur në ankand.

Rama, i cili fsheh gjithmonë një mjet për të justifikuar qëllimin, po rrezikon ta kthejë shtetësinë nga një simbol i identitetit kombëtar, në një favor të shpejtë, të rezervuar për figura që i sjellin lavdi imazhit të qeverisë.

Deputetja demokrate Ina Zhupa reagoi ashpër lidhur me rastin e Zhegrovës, duke kritikuar kryeministrin Rama se si po e përdor pasaportën shqiptare për trafik interesash dhe ndere personale.

“Edi Rama autoriteti mbi ligjor që jep edhe shtetësinë, sipas kujt ligji e kanë pajisur nuk e di?! Përdorimi edhe i një drejte për trafik interesash, për ndere personale, tregon qartësisht që kemi krijuar një vend që funksionon me fermane/mesazhe kryeministrore sesa me ligje me dhe rregulla”, shkruan Zhupa në një postim në Facebook.

Demokratja thekson se shtetësia është një e drejtë që duhet të jepet sipas ligjit, por që qeveria e jep vetëm me një mesazh drejtuar kryeministrit.

“E drejta e pasaportës shqiptare duhet jetë një e drejtë që e gëzojnë sipas ligjit të gjithë ata që ju takon. Ka shumë të huaj në Shqipëri që janë integruar plotësisht, me vite dhe ende përplasen nëpër dyert e shtetit pa e marr dot nënshtetësinë. Ashtu sic ka edhe futbollist që luajnë në kampionatin shqiptar, por edhe profesionist të fushave të tjera që i kanë krijuar vetëm vlera pozitive vendit tonë dhe nuk arrijnë dot këtë të drejtë”, përfundoi Zhupa.

E teksa Juventusi vazhdon të bëjë presion për Edon Zhegrovën, lojtarin e identifikuar nga menaxhmenti i Bianconerëve për të zënë vendin e Nico Gonzalez nëse argjentinasi do të kalojë për te Atletico Madrid, kjo lëvizje e Ramës duket se e bën më të lehtë transferimin e Zhegrovës.

Futbollistit shqiptar i duhet një ‘dorë’ për t’u katapultuar te juventinët dhe kush më mirë se një tifoz i tillë, që di ta përdorë mirë kartën e diplomatit, mund ta ndihmonte Zhegrovën t’i hapej dera e Juventus.

Kështu, transferimi i tij tani mund të jetë më i lehtë pas marrëveshjes mes dy federatave, FSHF dhe FIGC, për të mos i njohur më futbollistët shqiptar si të huaj, por lojtar.

Zhegrova nuk është thjesht një rast, por një pasqyrë e qartë e mënyrës se si një e drejtë e garantuar me ligj, mund të shndërrohet në një privilegj të dhënë me shpejtësinë e një mesazhi në WhatsApp. Kur shtetësia shqiptare i ofrohet vetëm atyre që sjellin përfitim politik ose imazh publik, ajo humbet kuptimin e saj si simbol i përkatësisë dhe barazisë, duke u kthyer në një mjet propagande të shpejtë./ K. T