Shell braktis Shpiragun/ Propaganda e dyshes Rama-Balluku me rezervat e naftës

Kompania holandeze “Shell” ka vendosur të tërhiqet nga Shqipëria, duke pezulluar kërkimet për nxjerrjen e naftës në Shpirag, një ëndërr që duket se kryeministri nuk e bëri dot realitet. Përpos dështimit, kompania largohet me 1.1 miliardë euro humbje për operacionet që kanë kryer në kërkim të naftës.

Rama ka deklaruar shpesh me bujë se zbulimi i naftës në Shpirag, do ta bënte Shqipërinë një vend të pasur, duke pohuar se rezervat e naftës në Shpirag janë të së njëjtës cilësi me atë të Arabisë Saudite.

“Nafta e zbuluar është e cilësisë më të lartë. Është hera e parë që kjo ndodh në vendin tonë sepse burimet e naftës që janë zbuluar në të shkuarën dhe që janë shfrytëzuar dhe shfrytëzohen akoma siç është për shembull, Patos – Marinza, janë burime të një nafte të rëndë që si e tillë përdoret për bitum, solar, por nuk është një naftë që mund të hyjë në konsumin e automjeteve dhe vlera e saj është shumë modeste. Ndërkohë që sipas analizave të bëra bën laboratorin e Holandës, nafta e zbuluar në zonën e Shpiragut është një naftë e të njëjtës cilësi me naftën premium të Arabisë Saudite”, ka deklaruar Rama.

Prej vitesh, kryeministri e ka shitur naftën e Shpiragut si një arritje historike, një mundësi të shtyrë më tej zhvillimin e ekonomisë, gjë që rezultoi një dështim.

Deklarata të tilla Rama i ka nisur nga viti 2014, për të vijuar më pas në vitin 2016, 2019, 2022 e deri në 2023-shin.

Historia me naftën e Shpiragut

Në zonën e Shpiragut kërkimet për naftë nisën në fund të viteve '80-të, por mungesa e financimeve nuk lejoi që prodhimi të rritëj në vijim.

Për herë të parë, nafta u zbulua në vitin 2001 nga kompania Oçidental Petroleum, në pusin e quajtur Shpirag 1 me thellësi 5055 m. Por, përpos gjetjes së naftës, kompania ndërpreu operacionet pasi e konsideroi pa leverdi zonën.

Dymbëdhjetë vjet më vonë, në vitin 2013, një kompani e quajtur Petromanas, shpoi një pus të dytë si dhe bëri teste. Pusi i dytë ishte 5547 metra i thellë dhe nafta e gjetur ishte “e lehtë” pra naftë cilësore, e cila merr çmim më të lartë në tregun ndërkombëtar. Që nga ajo kohë, Shell, e cila bleu interesat e Manas në këtë projekt, ka shpuar edhe puset 3, 4 dhe 5.

‘Show’ i Ramës dhe Ballukut

Në gusht të vitit të shkuar, në pikun e verës së nxehtë, Rama dhe Balluku dolën në një konferencë për mediat nga Shpiragu, për të treguar punimet që po bëheshin nga Shell në puset e naftës.

Balluku deklaroi se deri në Janar të këtij viti, do të kishim një rezultat publik nga kompania.

“Në tetor të këtij viti (2023) e deri në fund të Dhjetorit, ose maksimumi në fillim të janarit 2024, kompania Shell do të kryejë testimet për nxjerrjen e naftës së Shpiragut në sipërfaqe. Në janar do të kemi një rezultat publik, që vetë kompania Shell do ta deklarojë”, deklaroi Balluku.

Deklarata e Ballukut u pasua nga shefi i saj, i cili foli me krenari për një plan masiv investimi që do ta nxirrnin naftën e Shpiragut jo vetëm në tregun vendas, por edhe në atë botëror.

“Po përgatitet edhe plani masiv i investimit sepse gjithë ajo rezervë duhet pastaj të hyjë në infrastrukturën përkatëse dhe për ta nxjerrë atë në tregun vendas dhe botëror. Nafta e zbuluar është e cilësisë më të lartë, është hera e parë që kjo ndodh në vendin tonë sepse burimet e tjera janë të një nafte të rëndë që përdoret për bitum, solar, por nuk është naftë që mund të hyjë në konsumin e automjeteve”, tha asokohe Rama.

Por, siç duket, konferenca e dyshes Rama-Balluku nuk ishte asgjë më shumë se një “shoë” që në pikun e vapës kërkonte me doemos t’i bënte më shumë ‘fresk’ propagandës, se sa të ngjallte lumturi te shqiptarët që sipas kryeministrit, tani duhej të ishin të pasur nga zbulimi i naftës.

Rama në 2016

Kryeministri i Shqipërisë, Edi Rama përmes një postimi në Facebook deklaroi asokohe se rezerva e naftës dhe gazit është e cilësisë më të mirë në tregun botëror të naftës, kompania prestigjioze SHELL ka sjellë në Shqipëri, sondën më të fuqishme të teknologjisë (vetëm sonda kushton 72 milionë euro) për të nisur punimet për hapjen e puseve.

Rama në 2017

Me anë të një postimi në Twitter Kryeministri Rama njoftoi lajmin se kompania SHELL është afër zbulimit të rezervave të mëdha të naftës e gazit në Shpirag.

“Një lajm tejet inkurajues nga takimi me kompaninë SHELL? Edhe pak javë na ndajnë nga prova e të vërtetës së Shpiragut, ku të gjitha të dhënat flasin për një rezervë të madhe gazi e nafte? Nëse prova del me sukses, impakti në ekonomi do jetë i konsiderueshëm duke nisur nga 2020?”, shkruan Kryeministri.

Kështu që njësoj si vitin e kaluar, njësoj si edhe dy vite më parë, apo dhe 10 vite lajmet me naftë të qeverisë janë për të mbush propagandën.