Shembja në Librazhd–Prrenjas, Mbrojtja Civile për Politiko: Rrëshqitjet e tokës, rrezik i njohur

Suela Gjidede

Prej disa ditësh aksi kombëtar Librazhd–Prrenjas vijon të jetë i bllokuar për shkak të rrëshqitjeve masive të tokës dhe paqëndrueshmërisë së terrenit në zonën “Arrat e Gurrës”.

Autoritetet kanë deklaruar se po punojnë për hapjen e qarkullimit që ka shkaktuar shumë pasoja për Juglindjen e vendit dhe vetëm dje u hap një rrugë alternative në zonën e “Arrave të Gurrës” në Librazhd. 

Agjencia Kombëtare e Mbrojtjes Civile (AKMC) ka treguar për Politiko.al përfshirjen dhe rolin e saj në menaxhimin e kësaj situate.

Në një përgjigje zyrtare, AKMC thekson se ajo ushtron funksionin koordinues, mbikëqyrës dhe drejtues në fushën e zvogëlimit të riskut nga fatkeqësitë.

Pra, sipas këtij interpretimi, ndërhyrja direkte në terren nuk është përgjegjësi e drejtpërdrejtë e AKMC-së, duke ia kaluar "topin" institucioneve të tjera.

Përgjegjësia fillestare te pushteti vendor
Agjencia sqaron se “reagimi fillestar në terren realizohet nga njësitë e vetëqeverisjes vendore të prekura, përmes strukturave të tyre të mbrojtjes civile dhe shërbimeve përkatëse”, ndërsa ndihma nga niveli qendror kërkohet vetëm kur kapacitetet vendore janë të pamjaftueshme.

Në rastin konkret të aksit Librazhd–Prrenjas, sipas AKMC-së, strukturat operacionale janë angazhuar nga Autoriteti Rrugor Shqiptar (ARRSH).

AKMC thekson në Politiko.al se “ka ndjekur situatën në mënyrë të vazhdueshme, duke ushtruar rolin e saj koordinues dhe, në rast nevoje, duke ofruar mbështetje ndërinstitucionale mbi bazën e kërkesave të paraqitura. AKMC ka ndjekur situatën në mënyrë të vazhdueshme, duke ushtruar rolin e saj koordinues dhe, në rast nevoje, duke ofruar mbështetje ndërinstitucionale mbi bazën e kërkesave të paraqitura nga strukturat vendore apo institucionet përgjegjëse”.

Megjithatë, në përgjigje nuk specifikohen kapacitetet konkrete të angazhuara, numri i forcave në terren apo nëse është kërkuar zyrtarisht mbështetje shtesë nga niveli vendor.

Rrëshqitjet e tokës, rrezik i njohur
Sa i përket riskut për banorët dhe përdoruesit e rrugës, AKMC referon “Vlerësimin Kombëtar të Riskut nga Fatkeqësitë”, dokument strategjik që evidenton rrëshqitjet e tokës si ndër rreziqet me ndikim të lartë.

Sipas agjencisë, këto fenomene “përbëjnë një kërcënim të drejtpërdrejtë për infrastrukturën rrugore dhe për sigurinë e banorëve dhe përdoruesve të akseve në zona me karakteristika gjeologjike të ndjeshme, përfshirë segmentin Librazhd–Prrenjas”.

Pra, bëhet fjalë për një risk të njohur në dokumentet kombëtare, çka ngre pikëpyetje mbi masat parandaluese të ndërmarra më herët në këtë segment problematik.

Masat e koordinimit ndërinstitucional

Për sa i përket bashkërendimit ndërinstitucional, AKMC thekson se është realizuar koordinimi ndërmjet strukturave përgjegjëse për menaxhimin e situatës.

Sipas përgjigjes zyrtare, nën koordinimin sektorial të ARRSH-së dhe me përfshirjen e njësive vendore, janë ndërmarrë masa për:

“vlerësimin teknik të situatës në terren”;
“garantimin e sigurisë së qarkullimit”;
“ndërhyrjen për stabilizimin dhe pastrimin e segmentit të prekur”;
“informimin e publikut mbi kufizimet apo devijimet e përkohshme të qarkullimit”.
AKMC përmbyll duke theksuar se “mbetet e angazhuar për të garantuar funksionimin efektiv të sistemit të mbrojtjes civile”.

***

Shembja e ndodhur në aksin kombëtar të rrugës Librazhd–Përrenjas, në afërsi të fshatit Dragostunjë, pritet të marrë një kohë të gjatë, në rastin më të mirë disa muaj punë, nëse ndiqen procedurat dhe standardet në fuqi.

Situata u përkeqësua që prej ditës më 21 shkurt, ku rruga është shkëputur duke rrezikuar shembje totale si pasojë e rrëshqitjes së dherave. Segmenti u mbyll për shkak të shembjes së urës në vendin e njohur si “Arrat e Gurrës”./ Politiko.al/