Shpalli të pafajshme zyrtaren e Hipotekës që u kap me korrupsion, kush është gjyqtarja që liroi Dakon nga qelia

Ish-kryebashkiaku i Durrësit, Vangjush Dako, i arrestuar për shpërdorim detyre, do të lërë qelinë.

Gjyqtarja Flojera Davidhi vendosi që Dako të kalojë në arrest shtëpie, për shkak se kanë përfunduar afatet, ndërkohë që është urdhëruar plotësim hetimesh.

Kujtojmë se Dako është shpallur gjithashtu non grata edhe nga Shtetet e Bashkuara të Amerikës.

Kush është Flojera Davidhi

Davidhi ka përfunduar studimet në Shkollën e Magjistraturës në vitin 2014. Pas një periudhe stazhi në Gjykatën e Tiranës, u emërua gjyqtare në Gjykatën e Korçës.

Në tetor 2019, Davidhi u komandua për një periudhë 2-vjeçare si këshilltare ligjore pranë Njësisë Mbështetëse të komisioneve në Këshillin e Lartë Gjyqësor.

Në majin e vitit 2021 Komisioni i Pavarur i Kualifikimit vendosi në mënyrë unanime të konfirmojë në detyrë gjyqtaren e Korçës.

Në tetor 2022, Keshilli i Lartë Gjyqësor e emëroi gjyqtaren Davidhi si pjesë të trupës së Gjykatës së Posaçme kundër Krimit e Korrupsionit.

Lidhur me figurën si gjyqtare, u debatua vetëm mbi një vendim pafajësie të dhënë nga Davidhi për një zyrtare lokale të akuzuar se kishte marrë 20 mijë lekë (200 mijë të vjetra) ryshfet. Rasti u zbulua nga kamerat e fshehta të një emisioni investigativ Fiks Fare, por Davidhi e shpalli zyrtaren e Hipotekës, të pafajshme.

Gjykimi bëri bujë në media, dhe u cilësua si vendim i rrallë, pasi vetë e pandehura kërkoi të dënohej, por gjyqtarja vendosi për jo. Kur u pyet nga komisionerët e Vetingut, pse veproi kështu, Davidhi u përgjigj:

“Gjykata duhet të bazohet në atë që provohet në procesin gjyqësor, pra bazuar në prova. E kuptoj që ka një konfondim, pse vetë e pandehura ka kërkuar dënim. Ajo kishte kryer veprime jo konform detyrës, por jo konform veprës penale për të cilën akuzohej. Nuk do të kishte qenë ligjore të dënohej dikush, pse e pranonte akuzën, pavarësisht se nuk ka kryer elementë të veprës penale”.

Vendimi i saj më pas, është gjetur i drejtë edhe nga Apeli.

Rasti i bujshëm

Në vitin 2019 Valbona Beshi, një ish-specialiste e Hipotekës së Devollit, e vënë nën akuzë nga prokuroria e Korçës për korrupsion arriti të marë pafajësinë në gjykatën e këtij qyteti.

Vendimi i pafajësisë u dha nga gjyqtarja, Flojera Davidhi, e cila ka konstatuar se rasti në fjalë nuk hynte në çështjet e karakterit penal, e për pasojë ka rrëzuar kërkesën e prokurorisë për dënimin e Beshit, duke vendosur të deklarojë të pafajshme ish-zyrtaren e hipotekës.

Rasti korruptiv, fillimisht është ndjekur dhe denoncuar nga emisioni “Fiks-Fare”, ku pas publikimit të materialit filmik, ku Valbona Beshi, i merte një qytetari një sasi prej 200 mijë lekësh, çështjen e ka marë në dorë prokuroria e Korçës. Kanë mjaftuar disa muaj hetime nga prokuroria e Korçës, dhe prokurori i çështjes Gentian Stoja, ka proceduar me dërgimin e materialit hetimor në gjykatë, ku e pandehur është marë Valbona Beshi, ish-specialiste hartografie në hipotekën e Devollit.

Prokurori Stoja i kërkoi trupit gjykues dënimin e Beshit, me 2 vite burgim për akuzën e korrupsionit, masë dënimi kjo që sipas prokurorit të konvertohej në shërbim prove. Por pas tërheqjes së trupit gjykues, gjyqtarja Flojera Davidhi, ka vendosur të deklarojë të pafajshme.