Sterizilimi/ Nën akuzë për shpërdorim detyre, ç’deklaronte Beqaj pas 8 orëve qëndrimi në SPAK dhe në rrjetet sociale

Gjykata e Posaçme ka vendosur masë sigurie për ish-Ministrin e Shëndetësisë Ilir Beqja.

GJKKO ka caktuar sot masën e sigurisë 'Detyrim Paraqitje' për Beqjan për aferën e Sterilizimit. Atij i duhet që të paraqitet para oficerit gjyqësor çdo të premte në orën 15:30 dhe i ndalohet që të udhëtojë jashtë Shqipërisë pa autorizim gjykate.

Beqaj akuzohet për veprat penale  të “Shpërdorimi i detyrës” në bashkëpunim dhe “Shkelja e barazisë së pjesëmarrëve në tendera apo ankande publike” kryer në bashkëpunim dhe “Korrupsioni pasiv i funksionarëve të lartë shtetëror ose i të zgjedhurve vendorë” në lidhje me procedurën e dhënies së koncesionit të sterilizimit në periudhën kur ishte ministër i Shëndetësisë.

Pas nisjes së hetimeve Beqaj u thirr në SPAK ku qëndroi për rreth 8 orë në Prokurorinë e Posaçme kundër Korrupsionit dhe Krimit të Organizuar në 18 korrik. Pas përfundimit të takimit, Beqaj për gazetarët tha se ka dhënë përgjigjet e tij para dy prokurorëve si dhe Byrosë Kombëtarë të hetimit. Po ashtu ai tha se nuk i druhet përgjegjëisë penale. 

"Jam thirrur në cilësinë e cështjes që jam thirrur dhe kam dhënë përgjigjet e mia para 2 prokurorëve dhe BKH. Nuk i druhem përgjegjësisë penale," tha Beqaj. 

Po ashtu, dy ditë pasi Gjykata e Posaçme orientoi të SPAK-un, që të shtrijë hetimet edhe mbi përgjegjësitë e tij si ministër gjatë procedurave të koncesionit, Beqaj deklaronte në rrjetet sociale se me dy biznesmenët e koncensionit të sterilizimeve spitalore, nuk ka patur miqësi të veçantë, por i ka njohur vetëm si ministër dhe në zbatim të detyrave shtetërore.

Sakaq, ish zëvendësministri i Shëndetësisë, Klodian Rrjepaj dhe biznesmeni Ilir Rrapaj ishin vënë nën arrest me burg për këtë aferë.

Beqaj  mohonte të ketë patur ndonjë miqësi të veçantë me dy biznesmenët Ilir Rrapaj dhe Umberto Staccini, një bashkim operatorësh që fitoi 8 vjet më parë koncensionin e sterilizimeve spitalore prej 100 milionë dollarë në 10 vjet, për të cilat po heton Prokuroria e Posaçme SPAK dhe ka kryer disa arrestime nën akuza për mashtrim, faksifikim dokumentash dhe shpërdorim detyre.

Ai deklaroi se Rrapajn dhe Staccinin i ka njohur pasi është bërë ministër dhe në zbatim të detyrës si anëtar i qeverisë.

Ai madje theksoi se administratorin Admir Daci të kompanisë koncensionare SaniService, një bashkim i kompanive që përfaqësonin Rrapaj dhe Staccini, e njohu vetëm ditën që ka firmosur kontratën.

“Gjatë kohës si ministër kam takuar e jam njohur me sipërmarrës të ndryshëm, të huaj dhe shqiptarë, dhe për nevoja pune kam firmosur kontrata me ta. Të udhëtosh nga Tirana në Romë apo në Vienë është gjëja më normale, e nëse rastis që në këto fluturime të jenë miq, shokë, kontraktorë e bashkëpunëtorë, kjo nuk besoj se është indicie për fajësi”, shtoi ish ministri Beqaj.

Ai nuk bëri në statusin e tij asnjë koment për faktin se zëvendësministri i Shëndetësisë, Klodian Rrjepaj, dhe operatori kryesor i koncensionarit, Ilir Rrapaj, janë në arrest me burg, të dyshuar për mashtrime, falsifikim të dokumentave, dhe shpërdorim të detyrës në bashkëpunim, dhe as për faktin se nën të njëjtat akuza janë në arrest shtëpie drejtorët ekonomikë dhe juridikë të ministrisë që ai drejtonte, ndërsa persona nën hetim për të njëjtat akuza janë edhe 4 komisionerët e koncensionit.

Vendimi i GJKKO

Vendimi i GJKKO prej 348 fletëve thekson se provat e SPAK-ut, me të cilat janë në arrest me burg Rrapaj dhe Rrjepaj, evidentojnë shkelje ligjore edhe nga dy ish ministrat dhe 4 komisionerët.

Në një kapitull të veçantë gjykata thekson në vendim se ministri është autoriteti më i lartë që drejton dhe mbikëqyr përmbushjen e detyrave në institucion.

Në vendimin e GJKKO-së vërehet se ish ministri Beqaj dhe zëvendës ministri Rrjepaj kishin njohje dhe takime të vazhdueshme qysh nga dhjetori i vitit 2013 me biznesmenin Rrapaj, dy vjet para se ai të fitonte koncensionin e sterilizimeve spitalore.

Sipas SPAK-ut, biznesmeni Rrapaj, ish ministri i Shëndetësisë Beqaj dhe zëvendësi i tij Klodian Rrjepaj kanë udhëtuar së bashku me avion nga Italia në qershorin e vitit 2014, periudhë që sipas hetimeve përkon me veprimet përgatitore të koncensionit.

Nga hetimet e SPAK-ut të shqyrtuara nga GJKKO me rastin e masave të arrestit, dyshohet se fituesi i këtij koncensioni u paracaktua nga drejtuesit e ministrisë së shëndetësisë para se të nisnin procedurat ligjore, dhe se operatorët parapërgatitën dokumente dhe përshtatën kriteret ligjore para se të fitonin.

Gjatë hetimeve është vërejtur shkelja e barazisë së konkurrentëve në garë, fryrje artificiale dhe shumëfishim i çmimeve, falsifikim i dokumenteve dhe statistikave, llogaritje të pasakta ekonomike dhe shkelje ligjore, gjë që nxiti dyshimet për korrupsion pasiv të funksionarëve të lartë shtetërorë.