Tinka e madhe, e braktisur dhe e harruar në një azil të vogël...

Është paradoksale se si në Shqipëri, artistët e mëdhenj nderohen me tituj, çmime e medalje, e më pas braktisen, harrohen sikur të mos kishin ekzistuar asnjëherë.

Tronditëse është rasti i “Artistes së Popullit”, Tinka Kurti, të nderuar me çmime e tituj për kontributin që ka dhënë në teatër dhe në kinematografinë shqiptare.

Një surprizë e bërë në reality show-n e ‘Big Brother’, zbuloi për publikun shqiptar një të vërtetë të trishtë, për një nga ikonat e kinematografisë.

E madhja Tinka është braktisur dhe harruar në një azil pleqsh.

Siç vetë artistja e madhe e quajti, braktisja e saj është një tragjedi. Në fjalët dhe fytyrën e Tinkës, qartazi, dallohej trishtimi, se si një artiste e nderuar me medalje “Mjeshtër i Madh i Punës”, sot jeton në një azil të vogël.

"Kam pasur shumë probleme se kam pasur këtë fatin tjetër që unë erdha në këtë shtëpi që e shihni edhe ju që është një mrekulli, por për mua ishte një tragjedi dhe doja të nesërmen të ikja sa më parë. Kurse tani them kurrë më me ik sepse këtu ka njerëz të mrekullueshëm, këtu ka ambient shumë të bukur", tha aktorja Tinka Kurti.

Breza të tërë janë rritur me Tinkën, me Tanën që theu tabunë me puthjen e parë të realizuar në një film shqiptar. Janë rritur me imazhin e Nënë Pashakos së vuajtur që nuk iu dorëzua pushtuesve.

Por, sot, Tinka e madhe është lënë e harruar në një azil të vogël, sepse shteti shqiptar ka zgjedhur të mos kujdeset për artistët që kanë shkruar histori në kinematografi dhe kudo. Tinka është në azil sepse shteti di t’i vlerësojë ata me medalje kur janë gjallë dhe me homazhe pasi ndahen nga jeta.

Tinka e madhe u përball me indiferentizmin e një shoqërie, mungesën e kujdesit nga shteti për të cilin ka kontribuar, e që ky i fundit e sheh shpesh si ‘lëmoshë’.

Të ruash asetet e artit dhe jo vetëm, të kujdesesh për një artiste që edhe pse në moshë të vjetër, ka vijuar t'i japë pafund kontribute artit shqiptar, është detyrim dhe mirënjohje.

Është koha që shteti e shoqëria të kuptojnë se artistë si Tinka e madhe duhen nderuar dje, sot dhe përgjithmonë, për vlerat e çmuara, kontributin e pashtershëm dhe mirënjohjen që tregojnë për shtetin shqiptar, edhe atëherë kur janë braktisur.

Sot, është turp që një aktore e madhe si Tinka, të lihet e braktisur në një shtëpi pleqsh.

E nëse kjo bëhet me njerëz të mëdhenj si Tinka, çfarë presim të bëhet për të tjerët?