Tonelata kokai*e nga Ekuadori, Rama i firmosi lejen “Visit të Pojës” për ndërtimin e hotelit 10-katësh

Janë zbardhur detaje nga dosja hetimore në lidhje me operacionin "Ura" që po zhvillohet në Shqipëri dhe Itali kundër trafikut ndërkombëtar të drogës, pastrimit të parave dhe shpërdorimit të detyrës. 

Në dosjen italiane kanë dalë në drite edhe detaje lidhur me figurën e Elvis Doçi, i njohur edhe me nofkën "Visi i Pojës", për të cilin ka një urdhër-arrest si pjesë e grupit të strukturuar në trafikun e drogës që u godit nga autoritetet shqiptare dhe ato italiane.

Një vit më parë në banesën e këtij shtetasi u zhvilluan kontrolle nga SPAK ku iu sekuestruan rreth 3 milionë euro cash në banesë.

I njohur edhe si nipi i Xhevdet Troplinit, Elvis Doçi arriti ti shpëtonte prangave të policisë, ndërsa akuzohet për vepra të rënda penale në fushën e narkotikëve.

 Me një kërkim të trhjeshtë, rezulton se ai është pronar i disa bizneseve në Shqipëri. Mes tyre, drejton edhe kompaninë “Eldemar Construction”, të cilën e zotëron 100% dhe si objekt të veprimtarisë ka:

“Studim, projektim, zbatim te punimeve dheu dhe murature,betoni,betonarmeje,marrja persiper e sipermarrjeve per kryerjen e puneve ndertuese e rrugore,detare ,hidraulike,elektrike te çdo lloji,sistemim agrar dhe pyjor gjelberim publik dhe arredime perkatese publike dhe restaurim e mirmbajtje te tyre per llogari te vet ose te trete.Sherbime punesimi ne fusha te ndryshme, Krpentier, hekuthyes, murator, suvatues hidraulik, elektricist, brigada specialistesh dhe punonjesish pa profesion etj. Shit-blerje te mallrave te ndryshme industriale. Import-eksport i tyre. Tregtim brenda dhe jashte vendit te te gjitha llojeve te ushqimeve per kafshet, importimi dhe eksportimi i artikujve te ndryshem dhe i materialeve qe kane te bejne me kete veprimtari. Kryerja e cdo lloj veprimtarie tjeter ekonomike, tregtare.”

SI drejtues i këtij biznesi ai ka marrë leje zhvillimi për ndërtimin e hotelit 10-katësh në Durrës në prill të 2024, ndërsa lejet firmosen nga Këshilli Kombëtar i Territorit, i drejtuar nga Edi Rama.

" “Hotel 10 kate me papafingo me 3 kate shërbimi nëntokë”, me vendndodhje në Bashkinë Durrës, me subjekt zhvillues shoqërinë “Eldemar Costruction” sh.p.k", thuhej në njoftimin e KKT. 

Operacioni i koduar “Ura” është fokusuar në goditjen e një rrjeti të strukturuar kriminal që dyshohet për trafik heroine dhe kokaine nga Ballkani drejt vendeve të Bashkimit Evropian.

Bëhet me dije se janë lëshuar 52 urdhër-arreste në Shqipëri dhe Itali me akuzat për trafik droge, shpërdorim detyre dhe pastrim parash ndërsa janë sekuestruar pasuri me vlerë miliona euro.

Sipas mediave italiane, në listën e urdhër-arresteve ka edhe punonjës policie, avokatë dhe emra të njohur të botës së krimit, të dyshuar për përfshirje në rrjetin e trafikut dhe për shpërdorim detyre.