Tritol makinës një muaj para fushatës, kush është Bernard Ndreca, kreu i degës së PD në Vaun e Dejës

Makina e kryetarit të degës së Partisë Demokratike në Vaun e Dejës, Bernard Ndreca u hodh në erë sot në mëngjes.

Pamjet nga kamerat e sigurisë së shtëpisë së Ndrecës në fshatin Pacram të Vaut të Dejës filmuan këtë të fundit të hynte në makinën që shpërtheu sapo u vu në lëvizje.

Fatmirësisht Ndreca dhe e ëma që ndodhej në oborr në momentin e shpërthimit shpëtuan pa lëndime.

 Ngjarja e rëndë ndodhi një muaj para zgjedhjeve lokale dhe Ndreca e lidhi atë me aktivitetin e tij politik. “Nuk është e vendosur mina për Benard Ndrecën, por i është vendosur mina kryetarit të PD-së së degës së Vaut të Dejës dhe kjo dihet haptas sepse këto janë të mirë organizuar për një sulm të tillë”, tha Ndreca për gazetarët pas ngjarjes.

Kush është Bernard Ndreca

Ndreca është i njohur në zonën e Vaut të Dejës si një demokrat i angazhuar në këtë forcë politike prej disa vitesh.

Pas përplasjeve të brendshme të partisë demokratike mes dy grupimeve, Ndreca u pozicionua në krah të Sali Berishës. Ai u zgjodh kryetar i degës së PD në Vaun e Dejës nga procesi i primareve.

Pjesë e strukturave të PD-së në zonën e Vaut të Dejës, Ndreca është angazhuar shpesh here për shkak të aktivitetit politik si opozitar në denoncimin publik të disa aferave  apo abuzimeve në bashkinë e Vaut të Dejës.

Policia nuk ka dhënë ende detaje mbi motivet e ngjarjes që mund të kishte pasoja fatale për Ndrecën dhe familjarët e tij.

Pamjet e filmuara nga kamerat e sigurisë tregojnë dy persona që vendosin eksplozivin poshtë makinës.

Ngjarja solli reagime nga të gjitha palët politike, teksa e kanë dënuar incidentin dhe kërkojnë ndëshkimin e autorëve.