U kritikua nga Berisha dhe Nishani, pse e afroi Basha datën e zgjedhjeve në PD

Dy ditë më parë, kreu i Këshillit Kombëtar të PD-së, Bujar Nishani, ka bërë një deklaratë të fortë kur tha se kreu i PD, Lulzim Basha e ka ditur që ish-kryeministri Sali Berisha do të shpallej “non grata” nga DASH.

Sipas Nishanit, Basha afroi edhe datën e zgjedhjeve brenda PD pikërisht për këtë arsye.  

“Lulzim Basha e dinte se Berisha do të shpallej “non grata”. Kjo çështje ka krijuar një lloj shoku politik brenda PD-së, sepse Berisha është themeluesi dhe lideri historik. Jam i bindur që Basha ka afruar datën e zgjedhjeve sepse ka patur dijeni për shpalljen “non grata” të Berishës”, tha Nishani në emisionin “Frontline”.

Pak orë më vonë, në emisionin PolitikOn të Alfred Lelës duket se pati një konfirmim edhe nga ana e ish-kryetarit të PD-së Sali Berisha.

Berisha tha se detyra më kryesore për PD-në ishte faktimi i batërdisë elektorale para shqiptarëve dhe ndërkombëtarëve.

“Ato që thotë Nishani, për të cilin kam respekt si bashkëpunëtor, përveç fjalëve në ajër nuk kam të dhëna konkrete. Lulzim Basha nuk ka ndikuar në këtë proces nuk e besoj. Ai shpalli fushatën zgjedhore. Unë kam patur një ligj, që kjo situatë më bën që të heq dorë, sepse nuk jam ai që kam qenë. Unë do të isha shprehur më parë.

Unë kam mbetur i habitur nga votimi unanim për të filluar fushatën zgjedhore në parti. Detyra më kryesore për mua absolute ishte faktimi i batërdisë elektorale para shqiptarëve dhe ndërkombëtarëve. Po ashtu edhe një analizë serioze të PD-së. Një vendim që e votoi këshilli kombëtarë, edhe ata që kërkonin dorëheqjen e Bashës, unë vendosa që të hesht se ishte një vendim unanim”, tha Berisha.

Pas kësaj deklarate të fortë, rreth orës 12.00 në mesnatë reagon në Facebook, Lulzim Basha. Ai akuzoi ish-Presidentin Nishani për shpifje dhe se sipas tij kishte kaluar çdo limit për mllefet e tij personale, ndërsa shtoi se ngjarja me Berishën ka prekur të gjithë Partinë Demokratike.

Kujtojmë se në reagimi e tij pas shpalljes së Berishës 'non grata', Basha  tha se vendimi është marrë pa asnjë bazë konkrete, por theksoi se vendim nuk cenon marrëdhënien 'e shkëlqyer' të Partisë Demokratike me Shtetet e Bashkuara të Amerikës.

Dy javë më parë, Këshilli Kombëtar miratoi propozimin e Kryesisë së Partisë Demokratike dhe vendosi të hapë garën për kreun e ri dhe zhvillimin e votimit sipas parimit një anëtar një votë, në 13 Qershor.

Vendimi afron me pak më shumë se një muaj, këtë proces, i cili sipas statutit do të duhej të zhvillohej në muajin korrik.   

Afrimi i dates se zgjedhjeve shihet nga vezhgues te zhvillimeve politike si taktike e Bashës për te mos u lene kohe rivaleve per fushate.