Draft-raporti kritik i PE për Shqipërinë: Korrupsioni, administrata e politizuar dhe shteti i së drejtës, shqetësim serioz

Është zbardhur draft-raporti i Parlamentit Evropian për Shqipërinë për vitin 2025. Teksa vlerëson ecurinë e vendit në rrugën drejt intergimit, PE shpreh rezerva dhe kritika nga kuadri zgjedhor, te depolitizimi i administratës, drejtësia, liria e medias e korrupsioni.

Sipas Parlamentit Evropian, “sfida mbeten polarizimi politik, forcimi i shtetit të së drejtës dhe konsolidimi i reformave kundër korrupsionit.”

Konkretisht, në draft-raport PE vëren se “kuadri zgjedhor konsiderohet përgjithësisht i përshtatshëm, por shpreh shqetësime për barazinë e kushteve, keqpërdorimin e burimeve administrative, akuzat për blerje votash dhe presion mbi votuesit; bën thirrje për reformë zgjedhore gjithëpërfshirëse dhe zbatim të rekomandimeve të OSBE/ODIHR dhe Komisionit të Venecias”.

Parlamenti Evropian shpreh shqetësim “për polarizimin politik dhe diskursin përplasës që dëmton funksionimin e institucioneve demokratike”, si dhe kërkon forcimin e rolit të Kuvendit, transparencës legjislative dhe konsultimin me shoqërinë civile.

Shteti i së drejtës, gjyqësori dhe lufta kundër korrupsionit

PE vëren sfida si vonesat në çështje dhe përpjekjet për ndikim të padrejtë dhe kërkon forcimin e organeve të qeverisjes së drejtësisë dhe investime në infrastrukturë e dixhitalizim.

Korrupsioni, një nga pikat kyçe të procesit të integrimit, vijon të mbetet shqetësim serioz për PE dhe “kërkon forcim të hetimeve dhe dënimeve, sidomos në nivele të larta, insiston në adresimin e korrupsionit në të gjitha nivelet për të rritur besimin e qytetarëve, thekson rëndësinë e luftës kundër krimit të organizuar dhe bashkëpunimit me agjenci të BE-së si Europol dhe Eurojust”.

Të drejtat themelore dhe liria e medias

PE kërkon “mbrojtje më të fortë të lirisë së shprehjes dhe pluralizmit mediatik; inkurajon forcimin e mbrojtjes së minoriteteve dhe grupeve të cenueshme, përfshirë romët, egjiptianët, personat me aftësi të kufizuara, punëtorët migrantë dhe personat LGBTIQ+; shpreh shqetësim për retorikën antigjinore;n nënvizon nevojën për përmirësimin e aksesit në drejtësi”.

Reforma në administratën publike

Në draft-raportin e PE kërkohet depolitizimi i administratës dhe rekrutimet e punonjësve me bazë merite, “kërkon planifikim më të mirë të politikave dhe transparencë buxhetore”.

Reforma socio-ekonomike dhe mjedisi

Draft-raporti vëren dobësi strukturore si informaliteti dhe produktiviteti i ulët dhe këkron investime në arsim dhe inovacion. Ndërkaq, PE nënvizon rëndësinë e dialogut social dhe përfaqësimit sindikal dhe shpreh shqetësim për mungesën e progresit në mjedis dhe klimë.