Zgjedhje të pjesshme dhe diplomaci të kontestuar, çfarë ndodhi në politikën shqiptare këtë javë?

Gjatë javës politike që lamë pas, skena politike u karakterizua nga tensione të shumta, përplasje mes palëve dhe zhvillime të rëndësishme institucionale.

Në planin elektoral, qeveria zyrtarizoi vakancën në Bashkinë e Tiranës pas shkarkimit të Erion Veliajt, ndërsa presidenti Bajram Begaj dekretoi 9 nëntorin si datën e zgjedhjeve të pjesshme në gjashtë bashki, përfshirë kryeqytetin. Ky vendim u prit me reagime të ashpra nga opozita. 

Partia Demokratike vijon negociatat për kandidatin e saj. Në arenën ndërkombëtare, kryeministri Rama mori pjesë në takimin e Komunitetit Politik Evropian në Kopenhagen, ku një deklaratë ironike ndaj presidentit amerikan Donald Trump – pas ngatërrimit të Shqipërisë me Azerbajxhanin – e vendosi Shqipërinë në qendër të vëmendjes, por jo për arsye diplomatike. Kjo ngjarje u komentua gjerësisht si një moment i papërshtatshëm për imazhin ndërkombëtar të vendit.

Ja disa prej tyre: 

Miratimi i kalendarit parlamentar për periudhën 29 shtator – 7 nëntor u shoqërua me debate të forta mes mazhorancës dhe opozitës.

Opozita kundërshtoi futjen e 17 projektligjeve pa konsensus.PD kërkoi interpelancë urgjente me kryeministrin Rama për akuzat mbi takime të dyshimta në Aruba

Qeveria dërgoi në KQZ njoftimin për vakancën në Bashkinë e Tiranës pas shkarkimit të Erion Veliajt më 25 shtator.

Presidenti Bajram Begaj dekretoi 9 nëntorin si datën e zgjedhjeve të pjesshme në 6 bashki të vendit, duke shkaktuar reagime të forta nga opozita. Sali Berisha e quajti presidentin “kukull të Ramës” dhe paralajmëroi bojkot.

PD vazhdon ende negociatat edhe me partitë e tjera opozitare pasi ende nuk ka shpallur kandidatin për kryetar bashkie në Tiranë. 

Edhe Kryesia e PD-së (më 4 tetor) diskutoi për kandidatin, por pa rezultuar me vendim përfundimtar.

Kryeministri Rama mobilizoi strukturat e PS për të mbështetur kandidaturën e Ogerta Manastirliut në Tiranë.

Në një takim të Komunitetit Politik Evropian në Kopenhagen, kryeministri Edi Rama u shpreh ironikisht ndaj Trump, pasi ky i fundit ngaterroi Shqipërinë dhe Azerbajxhanin. Ironia e Ramës me Trump vendosi Shqipërinë në qendër të talljes dhe jo të diplomacisë.