Kujt i ka hequr vizën SHBA? Thellohet sherri Ben Blushi -Aleksandër Frangaj përmes “mashave” të online-it   

Një shkrim i CNA.al e drejtuar nga Elvi Fundo akuzonte Ben Blushin, Drejtorin e Përgjithshëm të Top Channel se SHBA i ka hequr vizën.

Sipas këtij portali, “heqja e vizës ka ndodhur disa muaj më parë pas disa akuzave të forta nga biznesmenë të ndryshëm pranë ambasadës, se janë sulmuar padrejtësisht nga Ben Blushi me gjobëvënie”.

 

 

 

 

 

 

 

 

 

Nga ana tjetër, Blushi nuk e ka lënë në heshtje këtë akuzë dhe është përgjigjur përmes gazetës Shqip (online).

Në shkrim është publikuar edhe një foto e pasaportës së vetë Blushit, duke argumentuar se bëhet fjalë për një vizë tre vjeçare të marrë në 7 qershor 2019 dhe me afat skadence në 30 Maj 2022, por po ashtu akuzon portalin e Fundos si të sponsorizuar nga Aleksandër Frangaj, pronar i tv Klan dhe ministri i qeverisë ‘Rama’, Arben Ahmetaj.

 

 

 

 

 

 

 

 

 

“Portali që financohet nga Aleksandër Frangaj dhe Arben Ahmetaj ka arritur sot nje rekord shpifjesh ndaj Drejtorit të Përgjithshëm të Top Channel, Ben Blushi.

Ky portal emrin e te cilit nuk e citojmë për arsye higjenike, ka arritur sot të botojë shpifjen numër 272, në shumë pak muaj kundër Ben Blushit. Ndërkohë meqë Ben Blushi bëri publike vizën amerikane, ftojmë pronarin e TV Klan, të publikojë pasaportën e vetë, nëse ka vizë amerikane!”, thuhet ndër të tjera në shkrimin e  ‘Shqip’, organ në varësi të Top Medias.

Siç duket, sherri mes dy emrave të dy mediave më të mëdha në vend si Top Channel dhe tv Klan ka vijuar mes akuza të forta duke mos dalë vetë në skenë, por indirekt përmes “mashave” online.

Kujtojmë se në 2017-n, drejtuesi i CNA, Fundo u dhunua fizikisht me mjete të forta, aq sa përfundoi në spital nga dy persona te zona e “Stacionit të Trenit” në kryeqytet.

Në atë kohë, Fundo pati reaguar duke theksuar se dhuna ndaj tij nuk është politike, por vepër e krimit të organizuar dhe klaneve mediatike të lidhura me drogën.

Kujtojmë gjithashtu se kjo nuk është lufta e parë e heshtur Blushi-FRangaj, duke përdorur mediat e tjera.

Në fillim të këtij viti, Tema shkruante se Frangaj risolli në skenë akuzat Ben Blushit, tek biznesi i inceneratorëve,  përmes disa dokumente, sipas të cilave gruaja e Blushit rezultonte aksionere dhe ortake me Klodian Zoton.

Blushi nga ana tjetër iu përgjigj duke risjellë në publik nëpërmjet TCH, akuzat për “rrugën e florninjtë” Milot-Balldre, prapa së cilës dyshohet se qendron Aleksandër Frangaj. Megjithatë, mbetet për t’u parë se cili do të jetë fundi i kësaj beteje.