Flash News

Posta e mëngjesit/ Me 2 rreshta: Çfarë pati rëndësi dje në Shqipëri

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

KRYESORE

Kur flet e pandërgjegjshmja e ministrit në dy fotografi/ Bushati-Kotzias sipas "gjuhës së trupit"

Politiko 30 Janar 2018, 20:51

Ministri për Evropën dhe Punët e Jashtme Ditmir Bushati është dukur në vështirësi të mëdha këto dy ditë në raport me homologun e tij grek Nikos Kotzias.

Bushati e nisi “mbarë” dje ditën kur tha se çamët do t’i gëzonin pronat në Greqi pas heqjes së ligjit të luftës.

Pala greke e përgënjeshtroi menjëherë kategorikisht, duke bërë të ditur se në bisedimet dypalëshe nuk është diskutuar për çështjen çame, e cila rezultoi se edhe pse është ngritur nga pala shqiptare, nuk është marrë parasysh nga ajo greke, që vazhdon ta quajë një çështje që nuk ekziston.

Më pas Bushati, u mundua t’i mbulojë me petkun e heshtjes diplomatike, detajet e mëtjeshme të negociatave, për çështje si delimitimi detar mes dy shteteve.

Por mori një tjetër kundër-goditje të papritur nga Kotziasi, i cili foli hapur për detajet e negociatave për kufirin detar, kur tha se pala shqiptare kishte pranuar zgjerimin e kufirit detar të Greqisë me 12 milje.

Vetëm më pas MEPJ u detyrua të reagonte, duke thënë se marrëveshja për kufirin detar do të bazohet vetëm te praktikat e së drejtës ndëkrombëtare dhe te vendimi i Gjykatës Kushtetuese.

Për hir të së vërtetës, me çështjen e “faljes” së 12 miljeve mund të thuhet se mund të jetë abuzuar ose spekuluar disi sot, sepse Kotzias foli vetëm për palën greke, por është e qartë se 12 miljet detare, nuk mund të jenë veçse reciproke në një marrëveshje dypalëshe (përjashto ndonjë lajthitje), në ato vende ku ka një distancë të tillë mes Shqipërisë dhe Greqisë.

Për shembull, në Kanalin e Korfuzit, që është shumë më i ngushtë se 12 milje, sipas Konventës së Detit, përdoret parimi i barazlargësisë. Pra 12 miljet mund të shtriheshin në zonën përbri Gjirit të Vlorës dhe gjetkë, ku një hapësirë e e tillë mund të respektohet.

Por edhe për këtë kaos të krijuar, faji mbetet mbi MEPJ-në shqiptare, së cilës heshtja ju kthye në boomerang, nga mos-heshtja e Kotziasit.

Bushati sot në faqen e tij në Facebook, u mundua t’i qetësonte komentuesit e irrituar, duke u thënë se marrëveshja për detin do të bëhet vetëm mbi baza reciprociteti.

Në Greqi, klima duket më e kthjellët, krejt ndryshe nga një fotografi e postuar nga ministri Bushati si cover në Facebook-un e tij, ku një rrufe duket të godasë në ujërat greke dhe në sfond duket më i mbrojtur një gji i Shqipërisë, që mund të jetë ai i Kakomesë.

Në fakt, për lëshime rrufesh, siç po e tregon praktika, duket më të specializuar janë bijtë e kryezotit të Olimpit.

Gjithashtu, në një tjetër foto të publikuar nga MEPJ, duket se “body-language” i ministrit flet sërish vetë. Në foton e përmbylljes së bisedimeve në Korçë, ai ka pozuar në shkallët e hotelit një shkallë mbi homologun Kotzias, aq sa ky i fundit duke i vogël përballë Bushatit.

Por edhe këtë gjigando-mani të rastit duket se Kotziasi nuk e ka parë si ndonjë gafë diplomatike, për sa kohë, që në terren dhe jo në foto, përfitimet më të mëdha i ka patur shteti grek, ndërsa palës shqiptare duket se i kanë mbetur vetëm fotografitë.

Në fakt, nga bisedimet e deritanishme, de facto ka nisur puna për gjetjen e eshtrave të ushtarëve grekë të rënë në Shqipëri, ndërsa Greqia është mjaftuar me premtimin retorik të "dhuratës" së heqjes së ligjit të luftës, që duket se s'do të ketë asnjë pasojë ligjore në zhbllokimin e pronave të çamëve.

"Timeo Danaos et dona ferentis", "i kam frikë grekët edhe kur japin dhurata", kështu tha orakulli i Trojës kur pa kalin legjendar.

Pra nga fjalët te veprimet ka në mes një det të tërë, dhe përshtypjet e deritanishme janë se 12 miljet e Kotziasit nuk kanë të njëtat përmasa të 12 miljeve të Bushatit.

Zeusi na përgënjeshtroftë!/S.K