Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

OP-ED

Kur Rama fshihet pas Taulant Ballës dhe Vali Bizhgës

Politiko 22 Korrik 2020, 20:06

Kur Rama fshihet pas Taulant Ballës dhe Vali Bizhgës

Alfred Lela

Kryeministri pikturonte kravata dje në takimin e Këshillit Politik dhe e ngrinte fletën lart për t’jua treguar ‘bashkëvuajtësve’. Ai e ka thyer me sms dhe skica mërzinë e pesë orëve të gjata të një takimi të nivelit të dytë, po të kesh parasysh përfaqësimin politik, dhe të nivelit të tretë po të përllogarisësh rezultatin.

Basha ‘ja la thatë’ duke qenë se kishte një vizitë të programuar paraprakisht në Kosovë. Për këtë mungesë Rama është pyetur kur ka dalë nga takimi 5 orësh dhe ka thënë se për të nuk ka rëndësi kush është në takim, Gaz Bardhi apo Lul Basha sepse ata janë njëlloj. Ka qenë mënyra e tij për të shpërfillur kryetarin e Partisë Demokratike. Nuk ka mënuar megjithatë ta përgënjeshtrojë veten duke bërë një lëvizje të çuditshme, inatçore dhe kundër një kohezioni simbolik kombëtar. Në përpjekje, jo për të sfumuar vizitën e Bashës në Kosovë, por për t’i bërë të njëjtin karshillëk kundërshtarit, duke i dërguar në Kosovë bash Sekretarin e Pëgjithshëm, të njëjtin nivel përfaqësimi që Basha kishte deleguar në takimin e Pallatit të Kongreseve.

Përfaqësuesi socialist dukej i pavend në Kosovë, në një vizitë pa kurrfarë qëllimi, përveç plotësimit të një teke të shefit të tij. Presidenti Thaçi ka bërë me siguri një zgjedhje kortezie për ta pritur në takim dhe për ta shoqëruar me ekspozim mediatik, një ditë pasi kishte pritur Bashën, por edhe prania e tij në atë foto, me buzqeshje të sforcuar, ngjante si montazh.

Kryetari i PD ka patur një vizitë serioze në Kosovë, pavarësisht ndonjë patetizmi që u ka rrëshqitur nëpër statuse a shkrime një pjese të enturazhit të tij, që kërkonin t’i jepnin turit ngjyra epiko-folklorike .

Këto teprime mënjanë, që më shumë dëmtojnë se ndihmojnë, duket se Basha ka arritur te Rama me atë mungesë dhe me atë vizitë në Kosovë.

Përdorimi i Sekretarit të Përgjithshëm, për të plotësuar teka apo përcjellë mesazhe sikleti politik, nuk ishte i vetmi gjatë dy ditëve të fundit. Zyra e komunikimit të kryeministrit, me siguri me bekimin e tij, ka ‘rrjedhur’ në mediat proqeveritare një lajm sipas të cilit ambasadorja amerikane Yuri Kim, që ka kaluar 2 orë në Kryeministri, nuk po takohej me Ramën, por me shefen e kabinetit, Vali Bizhga. Më shumë se kaq, shtohej në lajmin ‘e porositur’, takimi nuk ishte për çështje politike të ditës, por ‘gjëra të tjera’.

Fyerja i bëhej e dyfishtë ambasadores amerikane. Ajo linte zyrën për t’u takuar me një tjetër ‘sekretar të Përgjithshëm’ të Ramës dhe harxhonte dy orë për të folur për çështje që nuk kanë të bëjnë me aktualitetin politik. Zonja ka kohë me tepri domethënë.

Përveç një rrëshqitjeje etike, këto sjellje të Rarmës dëshmojnë një siklet politik të cilin mundohet ta fshehë duke përdorur Taulant Ballën dhe Vali Bizhgën. Kryeministri bëhet kështu mbajtës i një mandati të cilin nuk e balancon dhe as e interpreton dot më. Nuk jemi në rastin vetëm të përdorimit të vartësve, por të tëhuajësimit me zyrën e lartë shtetërore. Më saktë në rastin kur shahu, kthehet në tavëll.