Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Kush është zëvendësuesi i Romana Vlahutin në Tiranë? Informacionet favorizojnë një austriak

Politiko 23 Maj 2018, 20:30

Kush është zëvendësuesi i Romana Vlahutin në

Mandati i Romana Vlahutin si ambasadore e Bashkimit Evropian në Shqipëri përfundon më 31 gusht të këtij viti, ndërkohë që Brukseli e ka përzgjedhur emrin që do të pasojë kroaten në Tiranë.

Sipas avokat Spartak Ngjelës, ambasadori i ri BE-së ka shkruar të gjitha ligjet tona të vetting-ut, pjesë e reformës në drejtësi. Ai është doktrinar i rreptë juridik, dhe personalitet në jurisprudencë, që sipas avokatit, po vjen në Tiranë që të përfundojë segmentin e fundit të implementimit ligjor të reformës.

Në hartimin e ligjeve të reformës në Shqipëri kanë marrë pjesë disa ekspertë të huaj nga SHBA dhe shtetet e Bashkimit Evropian. Në këtë listë, vetëm tre ekspertë janë nga Irlanda, Gjermania dhe Austria, shtete anëtare të unionit.

Njëri prej irlandezit James Hamilton, gjermanit Rainer Deville dhe austriakut Richard Regner mund të jetë ambasadori i ri në Tiranë.

Nëse marrim për bazë karakteristikat e dhëna nga Ngjela, emri i James Hamilton përjashtohet si kandidaturë e mundshme pasi nuk rezulton të ketë doktoraturë në juridik, ndonëse është ekspert i nivelit të lartë, me aktivitet të gjerë në Irlandë dhe Evropë.

Ish-shefi i EURALIUS në Tiranë, Rainer Deville, i plotëson karakteristikat e sipërpërmendura dhe ka menaxhuar disa projekte të BE-së në fushën e drejtësisë, duke kontribuar veçanërisht në anëtarësimin e Letonisë dhe të Kroacisë, por ai ka një histori që nuk e favorizon për këtë post.

Në dhjetor të 2016-ës, Deville u largua ngs drejtimi i misionit të BE-së pasi u konfirmuan akuzat e opozitës shqiptare se EURALIUS kishte përkthyer me gabime ligjin e vetting-ut që u dorëzua për mendim në Komisionin e Venecias.

Richard Regner është kandidati me probabilitet më të lartë për të qenë ambasador i Bashkimit Evropian në Tiranë.

Regner ka studiuar për drejtësi në Universitetet e Vjenës dhe të Leicester-it,ku është diplomuar në vitin 1990 dhe në vitin 1997. Që prej 2007 ai mban një diplomë doktorature nga Universiteti i Vjenës.

Nga të tre kandidatët e mundshme, austriaku është i vetmi që ka aktivitet dhe eksperiencë diplomatike. Ai hyri në Shërbimin e Jashtëm Austriak në vitin 1991, ku ka punuar kryesisht në fushat e së drejtës ekonomike ndërkombëtare dhe të së drejtës publike ndërkombëtare. Në vitin 1992, Regner ishte i deleguar në ambasadën Austriake në Hagë dhe si hulumtues në Institutin Evropian të Administratës Publike në Maastricht.

Richard Regner është gjithashtu personazh i njohur në rrethin akademik dhe diplomatik në Tiranë. Ai ka dhënë leksione edhe në universitetet shqiptare.

Emërimi i ambasadorit të ri nga Brukseli do bëhet vetëm dy muaj pasi Austria të ketë marrë presidencën e Bashkimit Evropian, duke pasuar Bullgarinë. /Politiko.al

Më poshtë do të gjeni një përmbledhje të shkurtër të jetëshkrimeve të tre ekspertëve:

Dr. Richard Regner

Dr. Richard Regner LL.M. ka studiuar për drejtësi në Universitetet e Vjenës dhe të Leicester-it,ku është diplomuar në vitin 1990 (Mag. iur.) dhe në vitin 1997 (LL.M.). Që prej 2007 ai mban një diplomë doktorature nga Universiteti i Vjenës (Dr. iur.). Pasi ka punuar si kërkues dhe asistent universitar në Fakultetin e Drejtësisë (1988-1990), ai hyri në Shërbimin e Jashtëm Austriak në vitin 1991, ku ka punuar kryesisht në fushat e së drejtës ekonomike ndërkombëtare dhe të së drejtës publike ndërkombëtare. Në vitin 1992 ai ishte i deleguar në ambasadën Austriake në Hagë dhe si hulumtues në Institutin Evropian të Administratës Publike në Maastricht. Pasi ka punuar si nëpunës shkencor i ligjit në Gjykatën Kushtetuese të Austrisë(1994-1995), ai punoi në disa studio ligjore austriake dhe gjermane (1996-1998). Pas marrjes së provimit të avokatisë në Vjenë në vitin 1998, ka praktikuar avokatinë në Austri dhe është anëtar i Dhomës së Avokatisë së Salzburgut. Ka punuar gjerësisht në Austri dhe në Evropën Qëndrore dhe Lindore duke dhënë shërbime konsultative kryesisht ndërmarrjeve private dhe publike dhe ka menaxhuar studio ligjore të madhësive të ndryshme. Fushat e tij kryesore të punës janë e drejta kushtetuese, e drejta administrative, e drejta e korporatave, e drejta tregtare, ligji mbi prokurimin publik, ligji për ndihmën shtetërore dhe e drejta ekonomike ndërkombëtare. Ai është lektor i së drejtës publike dhe Evropiane në Universitetin e Shkencave të Aplikuara në Vjenë që nga viti 2012 dhe ka botuar gjerësisht lidhur me fushat e tij të interesit.

Dr. Rainer Deville

Dr. Rainer Deville, Gjyqtar pranë Gjykatës së Lartë të Apelit (Oberlandesgericht) në Gjermani, është Shefi i Misionit EURALIUS. Ai është emëruar gjyqtar në vitin 1989. Gjyqtari Dr. Deville ka gjykuar çështje penale, civile dhe tregtare në Gjykatën e Shkallës së Parë (Amtsgericht dhe Landgericht) dhe në Gjykatën e Lartë të Apelit (Oberlandesgericht). Ai ka një përvojë profesionale në çështje të administrimit dhe politikave në Ministrinë e Drejtësisë dhe Zyrën e Ekzekutivit të Landit të Vestfalisë së Veriut. Është anëtar i Zyrës Shtetërore të Provimeve në sistemin e drejtësisë (Landesjustizprüfungsamt), organi që merret me provimin e gjyqtarëve dhe prokurorëve të ardhshëm, si dhe të profesionistëve të tjerë ligjorë. Falë formimit të tij dhe përvojave të shumta ndërkombëtare në Bruksel dhe në shumë vende të tjera, Dr. Deville ka menaxhuar me sukses disa projekte të BE-së në fushën e drejtësisë, duke kontribuar veçanërisht në aderimin e Letonise dhe të Kroacisë në Bashkimin Europian. Që prej shtatorit të vitit 2014 Dr. Deville drejton projektin EURALIUS duke u nisur nga vizioni se një reformë bindëse në drejtësi do të sjellë hapjen e negociatave të aderimit të Shqipërisë në BE.

James Hamilton

James Hamilton është diplomuar në Histori dhe Shkenca Politike në vitin 1971 në Kolegjin “Trinity” në Universitetin e Dublinit. Ai është pjesë e Dhomës së Avokatisë të Irlandës dhe njëkohësisht ka praktikuar avokatinë në periudhën 1973 - 1981. Në vitin 1981 është emëruar këshilltar ligjor me kohë të plotë pranë Avokatit të Përgjithshëm në Irlandë. Në vitin 1995 është emëruar drejtor i përhershëm i Zyrës së Avokatit të Përgjithshëm. Ka qenë anëtar i grupit për rishikimin e Kushtetutës dhe ka publikuar një përmbledhje të plotë të Kushtetutës së Irlandës në vitin 1996. Ka punuar si këshilltar ligjor në Qeverinë e Irlandës për çështje të ndryshme veçanërisht në fushën kushtetuese, administrative, penale dhe të të drejtave të njeriut. Ka qenë përgjegjës për këshillimin e Qeverisë Irlandeze gjatë negociatave për arritjen e marrëveshjes me Irlandën e Veriut në vitin 1998. Në vitin 1998 u emërua gjithashtu përfaqësues i Irlandës në Komisionin e Venecias. Në vitin 1999 u emërua drejtor i Prokurorive Publike të Irlandës, funksion, me statusin e një zyrtari të pavarur, përgjegjës për fillimin dhe ndjekjen e hetimeve në Irlandë.