“La Repubblica” artikull kryeministrit Rama: “Artisti” që i mbylli gojën medias dhe shembi Teatrin Kombëtar

Prestigjozja italiane “La Repubblica”, i ka dedikuar një speciale Edi Ramës në të cilën evidenton qartë se si  kryeministri shqiptar është kthyer tashmë në (një artist) të gjithëpushtetshëm.

Në artikullin e gjatë ku flasin analistë, gazetarë dhe sindikalistë shqiptarë, nënvizohen disa nga rekordet negative të kryeministrit Rama, gjatë mandatit të tij të dytë qeverisës, ndryshe – sikurse shprehet gazetari italian – nga sa portretizohej ai në një intervistë të dy viteve më parë për të njëjtën gazetë.

“Kryeministri shqiptar i ka mbyllur gojën medias (ka shkatërruar Teatrin Kombëtar). Por nga ne dhe në Europë, mbeten ende përshtypjet e shkëlqyeshme. Përse?”, pyet gazetari italian.

“Më 7 maj, Kryeministri shqiptar Edi Rama njoftoi se bllokimi total si masë paraprake kundër përhapjes së COVID-19 po vjen drejt fundit. Kanë kaluar muaj të karantinës së lodhshme, që i dhanë mundësinë Shqipërisë të mbajë nën kontroll numrat nga pandemia, pavarësisht emigracionit të vazhdueshëm të mjekëve dhe infermierëve. Në 17 maj, para se të kthehet në normalitet, ka edhe një gjë të fundit për të bërë. Rreth orës 4 të mëngjesit, një buldozer, në heshtjen e 70 netëve karantinë, shkatërron në qendër të Tiranës Teatrin Kombëtar”.

“Skandali është gjigant! Dëmi është i madh për imazhin e Edi Ramës, artisti që pas 11 viteve në Bashki dhe 7 viteve në qeveri, ende lufton për të qenë një politikan, ndoshta i pariparueshëm”, vijon më tej artikulli i Repubblica. “Por a nuk ishte ai lideri model i nisur drejt zhvillimit ekonomik dhe Bashkimit Europian?”.

“Në Shqipëri le të themi se mandati i parë i qeverisjes iu dedikua punës. I dyti, pushtetit”, shprehet për gazetën italiane analisti Afrim Krasniqi, kreu i ISP-së. “Rama nuk bën përjashtim, dhe që prej rizgjedhjes në 2017-ën ai ka humbur vrullin reformator”.

Krasniqi kujton se opozita bëri gabimin fatal që braktisi parlamentin pas debateve politike, sidoqoftë: “Një kryeministër i përgjegjshëm do të kishte kërkuar dialogun, ndërsa Edi Rama ka përdorur gjithmonë agresivitetin për të dalë nga situata”.

Më tej në artikull përmenden disa raste të censurës në media, si dhe tentativa e qeverisë së kryeministrit Edi Rama për të kaluar ligjin “anti-shpifje” të kundërshtuar fort edhe nga institucionet ndërkombëtare.

Vitin e kaluar shtatë organizata evropiane kërkuan nga përmbajtja e tekstit të paketës anti-shpifje të mos i quante më “junk” (koti/të pavlera) operatorët e mediave: “Midis censurës dhe vetë-censurimit, trajnimi i pavarur tani kufizohet në mediat sociale të gazetarëve individualë. Ky ligj antishpifje tentoi të eleminojë edhe ata pak zëra të mbetur”, shprehet gazetari investigativ i BIRN, Besar Likmeta. “Klima për gazetarët është shumë e rëndë. Për të mos u sulmuar, duhet të kufizohen në opinione, sepse sapo të prekin faktet, janë nën shënjestër. Ligjet e reja kundër shpifjes kanë për qëllim të eliminojnë madje edhe këto thashethemet e mbetura.”

Kur në vitin 2015 Likmeta zbuloi lidhjet midis mafies dhe disa politikanëve, Edi Rama e kërcënoi me një proces gjyqësor: “Procedimi gjyqësor nuk erdhi kurrë”, thotë reporteri i al Venerdi. Sipas “La Republica”, liria e medias në Shqipëri ka ardhur duke u përkeqësuar, saqë në qoftë se në 2003 renditeshim në 34 mes 186 vendeve, sot renditemi të 84.

Artikulli i “La Repubblica”, po ashtu në përfundim nuk lë as pa përmendur problemet e punësimit dhe emigracionin masiv të të rinjve.