Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

"Ligji për turizmin detar nuk përmban fjalë shqip"; Beqaj ironizon Metën: Disa fjalë i përdorim siç e ka vendosur shkenca, jo siç do politika

Politiko 18 Qershor 2020, 18:30
"Ligji për turizmin detar nuk përmban fjalë shqip";

Deputeti Ilir Beqaj i ka dhënë “goditjen” e radhës Presidentit Meta, pas rrëzimit të 3 dekreteve të tij sot nga Kuvendi. Duke ironizuar arsyetimin e Presidentit përsa i përket rikthimit në Parlament për rishqyrtim të “ligjit për aktivitetet e turizmit detar”, Beqaj “detyrohet” t’i thërras kreut të lartë të shtetit “Zoti Meta”, pasi “President” sipas tij “nuk është fjalë me origjinë shqipe, kështu që druhet se mos ai lëndohet.”

Për t’ju përgjigjur Presidentit, deputeti Ilir Beqaj shprehet se “disa fjalë jemi të detyruar t'i përdorim ashtu siç ka vendosur shkenca dhe jo siç do politika.”

Kujtojmë se, pak ditë më parë, Presidenti i Republikës Ilir Meta ktheu për shqyrtim ligjin për aktivitetet e turizmit detar, ku veç arsyetimeve të tjera thotë se ky ligj përmban terma dhe fjalë që nuk janë në gjuhën shqipe duke bërë që sipas tij këto çështje të paraqesin probleme të një niveli kushtetues.

“Zoti President! Duke ju kërkuar ndjesë publike në vijim të kësaj fjale do t’ju drejtohem me emër dhe jo me titull. Duke qenë se “President” nuk është fjalë me origjinë shqipe, druhem se mos lëndoheni.

Zoti Meta, unë kam luajtur sport disa vite. Edhe ju jeni marrë me sport. Fjala “sport” nuk është fjalë shqipe. Por ja që kështu i thonë në anglisht, italisht, frëngjisht, spanjsht, serbo-kroatisht, greqisht, turqisht. Si ta bëjnë të gjithë ata vajza e djem që merren me sport?

Unë kam luajtur basketboll. Serbët i thonë “kosharka”, italianët “palacanestro”, grekët “kallathosferisi”. A ti themi edhe ne shqiptarët “top e shportë”? A të themi se Agim Fagu është sportisti më i famshëm shqiptar i “top e shportë”. Mundet. Por këtë nuk e vendos politika, por shkenca.

Zoti Meta,

Së fundmi ju keni shfaqur publikisht simpatinë për një skuadër të huaj futbolli. Futbollit në serbisht i thonë “nogomet”, në greqisht i thonë “podhosferi”. Po të shqipërosh, në të dy gjuhët do të thotë “top e këmbë”. A t’i themi edhe ne shqiptarët kështu? A të themi se Loro Boriçi është sportisti shqiptar më i famshëm i “top e këmbë”? A të themi se presidenti i Shqipërisë është simpatizant i skuadrës së “top e këmbë” të Sëlltik-ut? Mundet. Por këtë nuk e vendos politika, por shkenca.

Zoti Meta,

Ju keni dyshime nëse duhet të thuhet “surf” apo “sërf”. Mund të keni të drejtë, por kjo nuk është çështje e politikës.

A duhet të themi ne “presidenti Klinton” apo “presidenti “Clinton”?

A duhet të themi “kryeministri Xhonson” apo “kryeministri Johson”?

A duhet të themi ne “presidenti Makron” apo “presidenti Macron”?

A duhet të themi “Selltik” apo “Celtic”?

Është çështje e shkencës. Ju, më së pari, duhet të përpiqeni që politika të rrijë larg shkencës. Më së pari, ju duhet të ushtroni edhe kompetencat tuaja e t’i kërkoni Akademisë së Shkencave të bëjë detyrën e saj.

Zoti Meta,

Së fundmi, krejt haptazi, ju po përpiqeni të komprementoni procesin ligjhartues në Shqipëri. Ju nuk mund të jeni njësi kodifikimi. Mesa duket rregullimi i kompetencave të presidentit të Republikës me një ligj të veçantë është bërë domosdoshmëri. Do t’i kërkoj grupit tim parlamentar ta shohë me përparësi në programin e punës së Kuvendit në sesionin që do të çelet në shtator. Ai ligj le të hyjë në fuqi në shtator 2022 kur të ketë filluar mandati i presidentit të ardhshëm të Republikës.

Zoti Meta,

Politika shqiptare e 30 viteve të fundit i ka shumë borxhe Shqipërisë dhe shqiptarëve. Një nga borxhet më të mëdha është mosshfrytëzimi sa e si duhet i detit. Më së shumti kemi shfrytëzuar bregdetin, edhe atë barbarisht në jo pak raste. Detin ia kemi lënë botës së paligjshmërisë. Është mëkat të shohësh gjirin e Vlorës sot bosh. Para 30 vitesh e ndalonte shteti. Po sot kush e ndalon?

Zoti Meta,

Ju keni 30 vite në politikë aktive. Unë kam 11 vite. Por edhe 11 nuk janë pak. Sot unë u kërkoj ndjesë publikisht shqiptarëve që, deri më sot, nuk kam mundur të ndikoj në zhvillimin e industrisë së detit dhe të përshëndes qeverinë për ligjet e përpiluara së fundmi. Me votimin kundër dekretit tuaj sot, të paktën mbështes fillesat e ngritjes së industrisë së detit në Shqipëri.

Edhe vajzës sime më duhet t’I kërkoj ndjesë. Një nga stërgjyshët e saj është ulqinak. Ulqinakët i kanë rënë detit kryq e tërthor nga lashtësia deri në vitet 30-të të shekullit të kaluar.

Zoti Meta,

“Surf” i thonë edhe italianët, edhe francezët, edhe grekët. Megjithatë, nëse ju do të mund të gjeni një mënyrë që të na tregoni se kush mund të ishte fjala e duhur shqipe në vend të “surf”, unë mund të marr në konsideratë të thyej vendimin e grupit e të mbështes dekretin tuaj", deklaroi Beqaj gjatë fjalës së tij sot në Kuvend.

Të fundit