Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Liri Lubonja i përgjigjet Kadaresë: Pse shpif kaq egërsisht? Familja refuzoi të mohonte Todin

Politiko 20 Shtator 2017, 13:44

Liri Lubonja i përgjigjet Kadaresë: Pse shpif kaq egërsisht?

Liri Lubonja, mamaja e analistit Fatos Lubonja, i është përgjigjur me anë të një letre shkrimtarit Ismail Kadare. Një intervistë e Kadaresë për ‘Studio e hapur’, ku lëshoi shumë akuza ndaj Fatosit, ka shtyrë Liri Lubonjën t’i drejtohet atij me një letër në gazetën “Panorama”.

Ajo e akuzon shkrimtarin për mashtrime të egra, ndërsa sqaron se familja refuzoi të mohonte Todi Lubonjën, duke i kujtuar Kadaresë letrën që ai ka dërguar Enver Hoxhës për të motrën.

Pjesë nga letra e Liri Lubonjës:

Dua të jem sa më e qartë dhe e saktë për t'iu përgjigjur një njeriu që vuan nga megalomania dhe jeton me atë madhështinë që ia ushqejnë edhe disa kurtizanë që sillen rrotull..

Do të shkruaj si nënë e Fatosit, si grua e Todit, si njeri, por edhe si dëshmitare e asaj kohe dhe e atyre ngjarjeve.

Si familjare dhe si njeri më vjen të them: si ka mundësi që një shkrimtar,"i madh në rang kombëtar dhe ndërkombëtar", ia lejon vetes të flasë ashtu?! Si është e mundur që ndërhyn me të tilla gënjeshtra absurde në një dramë të vërtetë familjarë, të cilën nuk e jetoi kushdo në ditët e diktaturës? Si nuk ka asnjë gram ndjeshmërie ndaj dhimbjes, vuajtjeve, sakrificave dhe pasojave që patën tre breza të familjes sonë në ato 18 vite, duke filluar nga fëmijët 1 muajsh? Si mundet të kërkojë të na hapë procese që të kujtojnë proceset që kemi përjetuar në atë kohë?

Çfarë shkrimtari është që s'ka pikë aftësie të futet në lëkurën e të tjerëve?

A ka ky njeri të afërm, miq, që t'i thonë se s'mund të shpifë kaq paturpësisht apo e rrethojnë vetëm kurtizanë?

Ne kishim një familje të shëndoshë, ku mbizotëronte shumë, shumë dashuri për njeri-tjetrin, mirëbesim, përkujdesje, veçanërisht për fëmijët dhe kërkonim vazhdimisht që ata të rriteshin sa më të virtytshëm. Pikërisht pse ishim kështu, kur Todi u shpall armik i popullit nuk e mohuam atë, megjithëse kjo na u kërkuar me premtimin se kështu do të sigurohej e ardhmja e pjesëtarëve të tjerë të familjes. Refuzuam ta diskutojmë edhe kur Todi na e hapi këtë bisedë. Pranuam të hyjmë në kalvarin e burgjeve dhe internimeve që s'dihej kur do të mbaronin. I kuptoj ata që s'vepruan si ne, edhe "shkrimtarin e madh" që pa pasur asnjë nga këto rreziqe, por vetëm pse donte të udhëtonte në Francë, i ka mbyllur derën së motrës, por kërkoj pak më shumë respekt për këtë zgjedhje tonën.

Pse Kadare shpif aq egërsisht e poshtërsisht pa pasur turp kundër Fatosit? Siç e kam shpjeguar në librin tim "Kohë të reja, kujtimeve të vjetra" armiqësia ka ardhur për shkak të aktivitetit të Fatosit. Si shkrimtar, gazetar dhe botues i revistës "Përpjekja", ai ka shkruar e botuar për ideologjinë e veprës së Kadaresë, si ideologji e regjimit të Enver Hoxhës si dhe nuk ka pranuar përpjekjet e tij dhe të kurtizanëve për ta rreshtuar si disident. Urrejtja e Kadaresë u shtri edhe ndaj nesh. Aq sa nga vlerësimet që i kishte bërë Todit është në librat e parë pas '90-ës, në një nga librat e fundit e cilëson si "Njeriu ftohtë i zyrave", kurse Agim Meron, edhe ky mik tij, e trajton edhe më keq sepse nuk mund t'ia falë Agimit, atë që në librin e tij të kujtimeve, ka thënë një të vërtetë, që Ismalli ia dhuroi Nexhmije Hoxhës dorëshkrimin e librit "Dimri i Madh" dhe jo siç pretendon Kadareja në shkrimet e tij, se ajo ia ka marrë me forcë (I).

...Duket se e kaluar e mban peng më shumë se ç'mendojë. Por shpresoj që ata që janë më të rinj se ne do të mësojnë nga e kaluara nuk çlirohesh duke gënjyer dhe duke akuzuar dhe shpifur për të tjerët por duke kuptuar vetveten dhe kohën që ke jetuar.