Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

OP-ED

Luani i Fierit dhe Doktorët e Tiranës: Plagjiaturë do të jetë bota e re

Politiko 19 Tetor 2018, 21:18

Luani i Fierit dhe Doktorët e Tiranës: Plagjiaturë do të

Alfred Lela

Luani i verbuar i një 'kafazi zoologjik' në të hyrë të Fierit, u bë publik, jo nga shoqatat e mbrojtjes së kafshëve, as prej zonjushave me kone dhe kotele të Facebook-ut, por nga 'Daily Mail', një gazetë britanike e formatit tabloid. Ka rëndësi të përmendet cilësori 'tabloid' sepse përshkruan një lloj gazete që rend pas skandalit, apo iluzionit të një skandali, në këtë rast një luan sy nxjerrë në një 'safari' shqiptar, ku bëhen bashkë hyrja danteske e Fierit, me një restorant që kërkon të jetë edhe njëfarë atraksioni zoologjik për ata që u bie rruga atypari.

U desh një gazetar i një ishulli të largët, që kërkon Exit nga Europa, për të mediatizuar një kafshë të keqtrajtuar në një vend 'të plagosur' që kërkon me patos të hyjë në BE. Pranojeni luanin e qorruar si një simbol të asaj se pse jemi enden nën stekën europiane. Sepse ne e kemi plagjiate dëshirën për t'u bërë pjesë e BE, jo të brendshme. Sepse shqiptarët edhe 'mbretin e kafshëve' arrijnë ta 'zhburrërojnë', t'ia heqin kurorën dhe t'i vënë në kokë gjembat mizorë të mjerimit.

Duhet thënë shumë për luanin syçapërlyer, plagjiaturat e zv/ministrit dhe deputetes, të dy përfaqësues të plagjiaturës që Rama deshi t'i bënte Rilindjes. Luani në Fier nuk është vetëm kafsha e plagosur për të cilën duhet të ndjejmë mëshirë dhe të angazhojmë fjalorin (hipkrit) të animalistëve. 'Mbreti i xhunglës' simbolizon vendin që kërkon të bëjë për veten në shoqërinë shqiptare 'njeriu i xhunglës'. 'Njeriun e xhunglës' e gjen kudo në Shqipëri: në politikë, në media, në universitet. Pra, edh aty ku presupozohet se xhungla del prej njeriut. Rolet janë të përmbysura, megjithatë: luani është nxjerrë prej xhunglës dhe futur në kafaz, kurse 'mbreti' shqiptar është lëshuar prej kafazi dhe hedhur në xhunglën shoqërore. Tipologjia e nënkuptuar këtu është ajo e njeriut që, vazhdimisht, kërkon një territor dhe një kurorë, edhe pse mund të mos i takojë, mund të mos e meritojë, mund të jetë thjesht një hienë që kërkon lavdinë e luanit.

Ky mund të quhet 'kompleksi i luanit'. Ravgimi psikologjik i tillë, mesa duket, është edhe përpjekja për t'u doktoruar me plagjiaturë e një deputeteje dhe një zv/ministri (të Arsimit). Në xhunglën e administratës publike dhe rreshtave politikë, Demo dhe Gjylameti, me anë të 'gradave shkencore' kërkonin 'luanizimin' në një territor përplot me grabitqarë të tjerë.

A kanë humbur ata një sy, ashtu si 'luani i Fierit', dhe a janë ç'nderuar publikisht? Nuk duhet të jetë ky qëllimi në fakt; procesi 'name and shame', se sa pranëvendosja e fakteve që shpjegojnë simptoma apo sindroma të shoqërisë.

'Luani' është 'plagjiaturë shoqërore' sepse shpjegon 'Toni Montanën' te shqiptari i tranzicionit, liruar nga kafazi i komunizmit. Ai e ngre shtëpinë në kodër, e rrethon me mure dhe e ruan me kamera e qen, dhe lidh aty, nën një perimetër sigurie dhe ekspozimi, një kafshë ekzotike. Luani i 'kafazit zoologjik' në Fier është një variant i varfër i tigrit të Toni Montanës.