Flash News

Posta e mëngjesit/ Me 2 rreshta: Çfarë pati rëndësi dje në Shqipëri

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

KRYESORE

Masat në Portin e Durrësit: Vijon pa ndërprerje puna me përpunimin e anijeve tregtare, futen 60% e produkteve ushqimore, që vijnë në vendin tonë

Politiko 2 Prill 2020, 19:26

Masat në Portin e Durrësit: Vijon pa ndërprerje puna me

Edhe pse vendi është thuajse tërësisht i izoluar për shkak të pandemisë së COVID-19, në portin e Durrësit vazhdon puna për përpunimin e anijeve tregtare që vijnë në Shqipëri, por edhe atyre të cilat eksportojnë pajisje të ndryshme jashtë vendit. Në këtë situatë, Porti i Durrësit, është porta kryesore për qarkullimin e mallrave.

Ministrja e Infrastrukturës dhe Energjisë, Belinda Balluku, e cila nënvizoi se mbyllja e kufijve tokësorë nga shumë vende bën që Porti i Durrësit të jetë pika kryesore për furnizimin e vendit me mallrat e nevojshëm, teksa shtoi se janë duke u bërë përpjekje nga ana e organizatave ndërkombëtare, për lejimin e qarkullimit përmes korridoreve të gjelbërta.

“Porti i Durrësit ka qenë gjithmonë një nga pikat më të rëndësishme hyrëse që Republika e Shqipërisë ka pasur, sidomos për transportin e mallrave. Për shkak të problematikave që janë hasur në kufirin tokësor, megjithëse po merren masat e duhura edhe me një marrëveshje të krijuar mes Sekretariatit të Përhershëm të Komunitetit të Transportit dhe CEFTA-s, për të zgjidhur këtë problem përmes korridoreve të gjelbërta, por Porti i Durrësit ka mbajtur peshën kryesore në këto ditë të vështira, përsa i përket transportit të mallrave të nevojit të parë”, tha Balluku.

Drejtori i Autoritetit Portual Durrës, Pirro Vëngu, bëri të ditur se pavarësisht reduktimit të stafit, për shkak të masave të marra, aktiviteti përpunues i portit ka vijuar normalisht pa asnjë ndërprerje dhe se më shumë se 60 përqind e produkteve ushqimore që vijnë në vendin tonë përpunohen në kalatat e këtij porti.

“Aktualisht, 60% e ushqimeve që vijnë në vendin tonë kalojnë përmes Portit të Durrësit. Ne kemi një kapacitet me 300 kontenierë frigoriferik në ditë. Përpunimi ka qenë konstant gjatë muajit mars, pavarësisht se kemi pasur një reduktim të stafit për efekt karantinimi dhe për efekt të masave mbrojtëse”, tha Vëngu.

Në bashkëpunim edhe me Drejtorinë e Përgjithshme Detare, Doganat dhe Policinë Kufitare janë marrë një sërë masash me qëllim lehtësimin e punës dhe shkurtimin e kohës për operatorët portual që po vijojnë punën në këto javë.

“Kemi nisur shërbimet online, në mënyrë që kostot e kohës së humbur, qoftë edhe kostot financiare që mund të kenë kompanitë dhe operatorët portualë të jenë më të përballueshme në këtë periudhë krize. Është krijuar dhe një linjë e dedikuar, për t’iu përgjigjur në kohë reale, 24 orë, të gjithë individëve që kërkojnë të përpunojnë mallra në kohë të shkurtuar dhe për hir të së vërtetës falë bashkëpunimit me doganën dhe drejtorinë detare kemi pasur ritme të pëlqyeshme”, u shpreh ai.

Duke vënë theksin tek rëndësia që kanë eksportet, veçanërisht në këtë periudhë për ekonominë kombëtare, ministrja e Infrastrukturës dhe Energjisë tha se duhet të vijojë puna pa krijuar asnjë pengesë për këtë sektor, për shkak se shumë prej tyre kanë kontrata të lidhura paraprakisht me operatorë të huaj.

Ministrja e Infrastrukturës dhe Energjisë vlerësoi se gjatë kësaj periudhe ka pasur një bashkëpunim shumë të mirë me Ambasadën Italiane, ku përmes Portit të Durrësit u bë evakuimi i një pjese të shtetasve italianë, të cilët ndodheshin në Shqipëri dhe që kërkuan të largoheshin drejt vendit të tyre.