Mblidhet pas 3 muajsh ndërprerje Komisioni Hetimor, a do shkarkohet presidenti Meta?

Ilir Meta ne mbledhjen e Komisionit Hetimor

Mblidhet sot pas më shumë se tre muajsh ndërprerje Komisioni Hetimor i ngritur për shkarkimin e presidentit Ilir Meta.

Shkak për ndërprerjen e procesit u bë pandemia covid-19, ndërsa sot në mesditë (ora 14.00) pritet të rimblidhet sërish, teksa në rend dite do të diskutohet lidhur me opinionin e Komisionit të Venecias për emërimet e anëtarëve në Gjykatën Kushtetuese.

Sipas raportit final, Komisioni i Venecias konstatoi se Meta ka vepruar drejt kur ka pezulluar procedurën e emërimit para skadimit të afatit 30 ditor të një anëtari të Kushtetueses.   Sa i preket procedurës së betimit, Komisioni i Venecias thekson se sipas Kushtetutës së Shqipërisë betimi para presidentit është i detyrueshëm dhe  parakusht për të marrë detyrën.

Megjithatë, nisur edhe nga zhvillimet e kësaj periudhe nuk dihet ende se çfarë qëndrimi do të mbajë komisioni i përbërë nga Ulsi Manja, Bashkim Fino, Klotilda Bushka, Vasilika Hysi, Alket Hyseni, ndërsa nga opozita në parlament janë Adriatik Alimadhi, Alban Zeneli, Halit Valteri dhe Krenar Rryçi.

Kjo edhe për faktin se pak ditë më parë, kryetari i Komisionit Hetimor Ulsi Manja në një intervistë për Report Tv pranoi se ka pasur një reflektim institucional nga ana e presidencës për ngërçin në Kushtetuese, ndonëse insistoi se presidenti shkeli të drejtën e zgjedhësve për të votuar me anulimin e zgjedhjeve të 30 qershorit.

“Nëse i referoheni opinionit final të Komisionit të Venecias lidhur me Gjykatën Kushtetuese ka një reflektim institucional të palëve për të zhbllokuar Gjykatën Kushtetuese si një nga kriteret për në BE. Dhe kur them ka refletkim do të thotë KED, Kuvendi dhe Presidenti, nën frymën e atij opinion dhe atyre rekomandimeve do duhet të bëjnë funksionale Gjykatën Kushtetuese”, deklaroi Manja.

Por ky qëndrim i zbutur ndaj presidentit a do të reflektohet në një vendim për mos e shkarkuar?

“E thënë më qartë, Komisioni Hetimor, në raportin e vet për seancën plenare do evidentojë të gjitha shkeljet e konstatuara në rastin e zgjedhjeve të 30 qershorit 2019, por edhe të situatës me Gjykatën Kushtetuese”, tha Manja.

Meta akuzohet për shkelje të Kushtetutës për shkak të anulimit të dekretit të zgjedhjeve lokale të 30 qershort, si dhe dekretimin e Marsida Xhaferllarit si anëtare e Gjykatës Kushtetuese.

Lexo edhe: Armëpushimi Rama–Meta, sinjalet që shpjegojnë “një erë të re” mes kryeministrit dhe presidentit