“Më kërcënuan në zyrë”, kush është deputeti dhe ‘gangsterët’ që denoncoi pak ditë më parë Rudina Hajdari

Sot, kryetarja e Grupit Parlamentar Demokrat, Rudina Hajdari ka bërë një denoncim të fortë në seancën parlamentare.

Nga foltorja e Kuvendit ajo tha se është kërcënuar në zyrën e saj, madje i kërkoi kreut të Kuvendit, Gramoz Ruçi të marrë masat e duhur, para se të shënohet ndonjë viktimë në radhët e deputetëve.

“Ju kam kërkuar me anë të një shkrese të siguroni ambientet e kryesisë së kuvendit. Deputetet po kërcënohen, është e papranueshme që një femër të kërcënohet. Kam patur raste në zyrën time , kanë ardhur dhe më kanë kërcënuar, nuk duhet të ndodhë më. Ju lutem merrni masa para se të kemi ndonjë viktimë këtu në kuvend. Asnjë deputet nuk duhet të hyjë pa u kontrolluar mirë, dhe të shantazhojnë të tjerët”, tha Hajdari.

Sherri për kryetarin e ri dhe denoncimi i ‘gangsterëve’

Prej ditësh, grupi parlamentar demokrat është përfshirë në një debat të ashpër mes tyre.

Mosmarrëveshja që u bë publike nisi me kërkesën për shkarkimin e kryetares së grupit Rudina Hajdari. Ishte Korab Lita, ai i cili u vetëshpall kryetari i ri, bashkë me disa prej deputetëve të grupit. Por, ky fakt u mohua menjëherë nga vetë Hajdari, ndërsa brenda dy ditësh dy prej deputetëve që kishin firmosur peticionin e dërguar në Kuvend u tërhoqën.

Gjatë debatit ende të ‘nxehtë’, vetë Hajdari në rrjetet sociale publikon një status më 15 tetor, e cila akuzon deputetin Korab Lita dhe persona të tjerë se kanë ushturar presion ndaj deputetes Fatjona Dhimitri, pasi vendosi të tërhiqej. Madje, Hajdari sqaron se edhe pamjet filmike të disponuara nga zyrat e Kuvendit do t’i çohen Prokurorisë.

“Përveç një protagonizmi të shëmtuar mediatik, Korab Lita dhe gangsterët e tij, kanë ushtruar presion ndaj deputetëve, përfshirë edhe zj. Fatjona Dhimitri, e cila ka firmosur, për tërheqjen e këtij puçi. Pamjet filmike të disponuara nga zyrat e Kuvendit do t’i çohen Prokurorisë”, shkruan deputetja, shoqëruar me dokumentin përkatës.

Reagon Lita: Ne jemi kolegë

Nisur nga ky status, gazetarët sot kanë pyetur në oborrin e Kuvendit vetë deputetin Lita, i cili ka mohuar të jetë ai personi për të cilin flet Hajdari.

 “Edhe unë jam deputet si zonja Hajdari. Nuk përgjigjem për sigurinë në Kuvend. Jo se kam kërcënuar, e kam kolege. Me zonjën Hajdari shkojmë dhe takohemi në zyrë. Dy ditë më parë jemi takuar. Në gjaknxehtësi e sipër thuhen këto gjëra, por ne jemi koleg. Nëse kam terren për kërcënim, mund të kërcënohem dhe unë  vetë”, u shpreh Lita.

Nga ana tjetër, nuk dihet ende nëse çështja ka shkuar në Prokurori, por Ruçi gjatë seancës siguroi deputeten se kërkesa e saj për të shtuar sigurinë në ambientet e Parlamentit dhe Kryesisë i është përcjellë Ministrisë së Brendshme.

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm