Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Meqë është Zogu, të vihet edhe Enveri në Bulevard? Çfarë ka pas peticionit të 93 veteranëve drejtuar Metës dhe Ramës

Politiko 9 Gusht 2017, 21:10

Meqë është Zogu, të vihet edhe Enveri në Bulevard?

Gazeta 'Dita', e njohur për axhendën e saj ultrakomuniste, prej disa ditësh ja kushton faqet e para Mbretit Zog (ata e quajnë Ahmet Zogu se mbret kanë vetëm Enverin), dhe fushatës së heqjes së monumentit të tij në Bulevardin që mban të njëjtin emër. Gjithçka nisi në numrin e 4 gushtit, me botimin e një 'letre të hapur' të 93 veteranëve dhe pasardhësve të veteranëve, ku i kërkohej Kryeministrit Rama dhe Presidentit Meta heqja e shtatores së themeluesit të shtetit modern shqiptar.

'Dita' ka vazhduar edhe në ditët në vijim fushatën duke hedhdur idenë e një referendumi për Zogun dhe Enverin. Duket se 'zemërimi' i veteranëve frymëzohet, sa nga prania e shtatores së Zogut në Bulevard, aq dhe nga mungesa e asaj të Enver Hoxhës.

Nëse është e Zogut, mos e hiqni, por të paktën vendosni edhe atë të Enverit, është 'axhenda e fshehtë' e veteranëve dhe gazetës së tyre 'Dita'.

Një element për t'u përmendur është fakti se veteranët 'u bënë të gjallë' pas ikjes së një Presidenti të së djathtës dhe ardhjes në zyrën e kreut të shtetit të Ilir Metës, një politikan i njohur për afrimitetin me veteranët dhe 'axhendat e majta'.

Letra e hapur e veteranëve:

Ne, një grup nismëtar prej 93 veteranësh dhe pasardhës veteranësh me banim brenda dhe jashtë shtetit, Ju drejtohemi me këtë peticion në të cilin mendojmë se shprehet një opinion dhe qëndrim i shumicës së shqiptarëve.

Në radhë të parë shprehim shqetësimin që në këto 27 vjet të Shqipërisë pluraliste kanë ndodhur sulme të ulta kundër historisë, kulturës dhe vlerave kombëtare që dikur na kanë dhënë dinjitet dhe krenari.

Është hedhur baltë mbi figura të mëdha të historisë dhe kulturës sonë, si dhe kanë ndodhur episode tronditëse, sikurse ka qenë dhunimi i varrezave të dëshmorëve të Luftës Antifashiste Nacionalçlirimtare, si dhe monumenteve dhe memorialeve të saj. Kjo strategji që ne e themi haptazi se është antikombëtare, mendojmë se ka qenë e qartë që në fillim: të zbresin nga piedestalet heronjtë dhe personalitetet e historisë dhe kulturës sonë, dhe vendin e tyre ta zënë antiheronjtë, tradhtarët, kolaboracionistët.

Kjo është një fyerje e rëndë që i është bërë këtij populli.

Zoti President,

Ju jeni deklaruar në vijimësinë tuaj politike në mbrojtje të kësaj Lufte të madhe që na rreshtoi në anën e fitimtarëve dhe aleatëve të mëdhenj anglo-sovjeto-amerikanë. Ju jemi mirënjohës për këtë! Por, tani që jeni në krye të shtetit, tregojeni veten se kini qenë i sinqertë në deklaratat Tuaja. Paraardhësi juaj nuk la bashkëpunëtor të fashizmit dhe diversant pa dekoruar. Ne e konsiderojmë sjelljen e tij antikushtetuese. Tani që Jeni në krye të shtetit, kini shansin e madh të korrigjoni shumë nga gabimet e së kaluarës dhe të kontribuoni në rivendosjen e të vërtetave të mëdha historike. Populli shqiptar do t’Ju jetë mirënjohës për këtë!

Zoti Kryeministër,

Ju që u mbështeti shumica e shqiptarëve të fitoni një mandat të dytë qeverisës, kini përgjegjësinë e madhe historike për vendosjen e drejtësisë në këtë vend. Jemi ne që ju kemi votuar për të bërë gjëra të mira për Shqipërinë. Po ju themi se kini një shans historik si asnjë udhëheqës tjetër pas viti 1990 që të bëni diçka ndryshe në të mirë të këtij vendi e të këtij populli. Shfrytëzojeni këtë moment historik! Ju mbështesim maksimalisht për Reformën në Drejtësi. Por ne mendojmë se reformë mbi reformat është mbrojtja e historisë dhe vlerave kombëtare të krijuara me aq shumë gjak dhe sakrifica. Veproni sa s’është vonë.

Në këtë letër-peticion që ju dërgojmë Ju zoti President dhe Ju zoti Kryeministër, parashtrojmë dy kërkesa të drejtpërdrejta, sa të thjeshta, por edhe po aq të rëndësishme për të tashmen dhe të ardhmen e Shqipërisë.

E para. Njëzet e ca vjet më parë u vendos në mënyrë arbitrare emri i Ahmet Zogut, një pjese të Bulevardit që ka mbajtur dhe mban emrin “Dëshmorët e Kombit”.

Sikur të mos mjaftonte kjo, po në mënyrë arbitrare u vendos pesë vjet më parë në atë Bulevard dhe një statujë e Ahmet Zogut, ish-mbretit që ka shitur pjesë të trojeve të atdheut, që e tradhtoi këtë vend në momentet më të vështira të tij në prill 1939.

Ai monument fyen një komb të tërë. Ai monument duhet hequr një sahat e më parë, jo thjesht se u vendos në mënyrë të paligjshme, por se Zogu nuk e meriton atë statujë. Duhet ta dini se shumicës së shqiptarëve u dhembin sytë kur shikojnë atë ngrehinë dhe ndërrojnë rrugë kur u bie rasti të kalojnë andej. Monumentet nuk e fshijnë turpin e tradhtisë së Ahmet Zogut.

Së dyti. Lidhur me qëndrimin ndaj Enver Hoxhës, mendojmë se ka ardhur koha që figura e tij si udhëheqës i Luftës Antifashiste Nacionalçlirimtare të vihet në vendin që i takon. E dimë që përmendja e emrit të Enverit politikanëve tanë iu shkakton sëkëlldi. Por këtë çështje e zgjidh fare mirë një referendum lidhur me qëndrimin që duhet mbajtur ndaj Enver Hoxhës.

Me konsideratën më të lartë:

Lista e 93 nënshkruesve