Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Mjekët rebelohen ndaj standardeve Rama-Beqaj, denoncimi i radhës: Mbarova në "La Sapienza", nuk më pranuan as në fshatrat e Korçës

Politiko 11 Korrik 2017, 09:57

Mjekët rebelohen ndaj standardeve Rama-Beqaj, denoncimi i radhës:

Në një kohë kur kryeministri Edi Rama po mundohet t’u mbush mendjen njerëzve se ky mandat qeverisës do të jetë ndryshe nga i pari, duke filluar me reformimin e administratës, të parët që po rebelohen janë mjekët.

Fillimisht ishte mjeku Damiant Kuka dhe më pas Petrit Vargu që denoncuan shkeljet e kryera nga administrata e drejtuar nga Ogerta Manastirliu dhe Ilir Beqaj, të dy ish-ministra të Shëndetësisë dhe sot deputetë të PS. I fundit që ka reaguar është një mjek i quajtur Martin Mano, i cili punon në Itali.

Mano tregon se ka përfunduar studimet në universitetin La Sapienza, me nota maksimale, por kur erdhi të kërkojë punë në Shqipëri, nuk e pranuan as në fshatrat e Korçës.

Ai tregon eksperiencën e parë të hidhur në 2009-ën, kur vendi drejtohej nga PD-LSI dhe sërish në 2016-ën, kur në pushtet ishte PS. Sipas Manos, standardet nga 2009-ta në 2016-ën ishin përkeqësuar edhe më shumë, ndërsa sqaron se asnjëherë nuk u përball me ndonjë funksionar të LSI-së, që sot akuzohen nga Rama, por vetëm me socialistë dhe njëri prej tyre sot është bërë krytar i qarkut të Korçës.

Ironizoi Ramën dhe Manastirliun, mjekut të njohur i vjen paralajmërimi nga Enkelejd Joti

Reagimi i mjekut Martin Mano:

Edi Rama na fton t'i tregojmë për eksperiencat negative me administratën. Gjatë fushatës na lodhi kokën duke na thënë se fajin që nuk funksiononte administrata e kishte LSI. Unë eksperiencat e mia s'i kam pasur me të LSI-së, por bash me çurmen e timonierit.

Ja komenti që i bëra une:

Eksperienca negative?

Kërkoj ndjesë që në fillim për një parantezë të shkurtër që do bëj.

Jam diplomuar për Mjekësi të Përgjithshme në universitetin "La Sapienza", me note maksimale. Më quani idealist, por edhe budalla nëse dëshironi, por pas diplomimit edhe abilitimit në Itali vendosa të kthehesha në kapërcyell të zgjedhjeve të vitit 2009, atëherë kur PD me LSI do keqqeverisnin vendin për katër vite. Pas njohjes së diplomës dhe rregjistrimit tek urdhëri i mjekut aplikova për vendet e lira të punës, asokohe në fshatrat e Korçës, që më thënë të drejtën edhe për të marë vesh se ku kishte vende të lira ishte andrallë më vete pasi drejtuesit lokalë të shëndetit publik vetëm më sorrollasnin. Pavarësisht diplomës sime, me nota të shkëlqyera për më tepër, as punë në fshat në arrita dot të marr. Të njëjtit drejtues lokalë ma bënë të qartë me gjuhën e tyre të drunjtë se duhet të drejtohesha tek zyra e punës në selinë e PD-së lokale, ku duhet të dorëzoja aty kurrikulumin bashkë me një kërkesë punësimi. Nuk kaloi shumë e në janar 2010 largohem përsëri, drejt Veronës kësaj rradhë, ku pas një konkursi fitoj të drejtën e specializimit për kardiologji, që e përfundoj me rezultate maksimale në qershor 2015. Kthehem përsëri në atdhe. Duhet të them se kësaj rradhe njohja e diplomës mori më shumë kohë, duke u shoqëruar e me një shije të hidhur kur mora në dorë një fletë format A4 të thjeshtë (kur në kohën e Saliut të paktën lëshonin një karton të lëmuar), me një njollë gjalpi në njërin cep, të shoqëruar me udhëzimin që t'a mbaja me kujdes se "nuk lëshojmë duplikat" (absurd më vete ky). Gjithësesi dëshira ime ishte të punoja në Korçë. I nxitur edhe nga bonusin që kishte vendosur ministria për pozicionin e Kardiologun në Korçë vendos të bëj aplikimin e posaçëm, në fund janari fillim shkurti 2016. Kaloi një muaj dhe nuk marr asnjë përgjigje. Atëherë mendoj të kontaktoj drejtorin e atëhershëm të spitalit të Korçës, me shpresën se mbase do mund të nxiste ministrinë të përshpejtonte procedurat duke qenë se dhe spitali kishte nevojë për kardiolog. Përgjigja që mora më tronditi "sa të jem unë këtu ti nuk vjen të punosh me bonus këtu". I zoti e jep, tellalli s'e shet. Sot ky zotëri është prefekt i Korçës. Vendos t'i drejtohem përsëri ministrisë personalisht, me anë të disa miqve të mi, arrij të takoj një funksionar të kësaj ministrie duke i shpjeguar situatën. Përsëri takimi më la pa fjalë. Nga mohimi dhe shprehja e padijes që ministria nuk merrej me çështjen e bonusit, kur e vërteta ishte e kundërt, deri tek "ty nuk të takon" apo "pse nuk shkon të kontribuosh për qytetin tënd pa bonus". Përsëri e njëjta sjellje, i zoti e jep tellalli s'e shet. Me të dalë nga ky takim kam nisur vetëm një email një shefi kardiologjie për të kërkuar informacion nëse kishin nevojë për kardiolog, përgjigja erdhi vetëm në një javë, pas një muaji u nisa në Itali sërish dhe nisa punë, ku jam edhe sot e kësaj dite. Ndërkohë që në Shqipëri harxhova kot 9 muaj të jetës sime në pritje të lëvizjes së qerres së shteti, që me sa duket nuk lëviz po nuk ja vajise ingranazhet me verdhushka. I vetmi person që është treguar i gatshëm, përtej pritshmërive të mia ishte zoti Niko Peleshi të cilin e kontaktova për tjetër arsye, por që i bëri shumë përshtypje se si kishte mundësi që më kishin sorrollatur pa më dhënë zgjidhje.

Nuk e di sa i ndjeshëm jeni ju z.Rama ndaj faktit që Shqipëria po pëson një hemorragji të pandalshme të mjekëve që largohen njëherë e përgjithmonë nga Shqipëria. Ndoqa vizitën tuaj në urgjencën e Spitalit Shefshqet Ndroqi, edhe fjalët tuaja se do vijnë mjekë italiane të punojnë në spitalet tona, falë pagave të majme që do jepni. Dua vetem t'ju them se punën nuk e bën vetëm paga por mbi të gjitha kushtet e punës.

Gjithë të mirat!