Flash News

E SHPJEGUAR

“7 pasuri të fshehura nga Tirana në Sarandë”, si nisi hetimi ndaj Ervin Bushatit dhe ç’deklaronte deputeti i PS për padinë e PD

“7 pasuri të fshehura nga Tirana në Sarandë”, si nisi

Prokuroria e Posaçme kundër Krimit dhe Korrupsionit, SPAK tashmë ka nisur zyrtarisht hetimet për deputetin e Partisë Socialiste, Ervin Bushati.

Kryetari i Partisë Socialiste të Tiranës akuzohet dy vepra penale, atë të fshehjes dhe mosdeklarim të pasurisë, si dhe falsifikim dokumentesh.

Ishte Partia Demokratike ajo që njoftoi fillimisht se SPAK ka konfirmuar se ka nisur hetimet për deputetin socialist, pasi në 8 nëntor PD i dërgoi letër SPAK, duke i kërkuar motivin se pse po zvarritet hetimi ndaj deputetit të PS, Ervin Bushati.

“Mosveprimi nga ana e organit të prokurorisë me këtë çështje është një tjetër tregues që drejtësia shqiptare është e paaftë të sigurojë ndëshkueshmërinë e zyrtarëve të lartë, duke zvarritur hetimet për më shumë se 2 vjet.”, thuhej në letrën e dërguar drejtuesit të SPAK nga Sekretari i Përgjithshëm i PD, Gazment Bardhi, i cili, 2 vjet më parë, ka bërë kallëzimin kundër Bushatit.

Por, në përgjigje të kësaj kërkese, SPAK njoftoi PD-në se në 12 mars të këtij viti ka regjistruar procedim penal për fshehje ose mosdeklarim të pasurisë dhe falsifikim të dokumenteve.

PD e kallëzoi atë 2 vjet më parë për fshehje dhe mosdeklarim të pasurisë. Bëhet fjalë për mosdeklarimin e shtatë pasurive të paluajtshme në emër të tij, përfshirë më shumë se 3100 metra2 truall në Tiranë, Qerret dhe Sarandë.

Fillimisht, Gjykata e Apelit Tiranë ka pranuar padinë e bërë në Tetor të 2018 nga Partia Demokratike, por dy javë pas kallëzimit të bërë nga selia blu, Prokuroria e Tiranës i mbylli hetimet edhe pse gjykata e shkallës së parë kishte urdhëruar që të vazhdonte procesi hetimore ndaj Bushatit.

Prokuroria e kundërshtoi vendimin dhe bëri ankimin në Gjykatën e Apelit, por kjo gjykatë vendosi që të rihapet çështja dhe të nisni edhe menjëherë hetimet për pasurit e Bushatit.  

Procedimi penal është në fazën e hetimit dhe po ndiqet prej 8 muajsh nga prokurorja e SPAK Doloreza Musabelliu.

Ç’deklaronte Bushati padinë e PD?

Deputeti socialist e ka mohuar në media, kur është pyetur për padinë e PD. Në një intervistë në ABC Neës, është shprehur se gjithë pasurinë e tij e ka të deklaruar sikundër ka bërë edhe vitet e tjera. Sipas deputetit socialist, padia e PD vjen pasi i është prekur interesi.

“Nuk e di unë i kam të gjitha të deklaruara në deklarimin e pasurive, në dekriminalizimin e të gjitha këto bashkë. Gjithë deklarimet e mia janë mëse të qarta shumë herë për disa vite me radhë. Që u kujtua tani PD tregon se ajo kujtohet kur i preket interesi personal i kunatit. Megjithatë do të sqarohen derisa nuk ka çështje dhe është e mbyllur në Prokurori”, deklaronte Bushati në mars të vitit të shkuar.

Pasuria e padeklaruar:

Një pasuri me sipërfaqe 938 m2 truall, në Tiranë, e regjistruar më 21.04.2017.
Një pasuri me sipërfaqe 600 m2 truall, me sipërfaqe ndërtimi 327 m2, në Tiranë, e regjistruar më 21.04.2017.
Një pasuri me sipërfaqe 938 m2 truall, në Tiranë, e regjistruar më 25.07.2014.

Një pasuri me sipërfaqe 76 m2, ndërtesë, në Qerret, Kavajë, e regjistruar më 30.05.2016.
Një pasuri me sipërfaqe 376 m2 truall, në Qerret, Kavajë, e regjistruar më 30.05.2016.
Një pasuri me sipërfaqe 660 m2 truall, në Sarandë, e regjistruar më 17.07.2014.
Një garazh me sipërfaqe 42 m2, në Sarandë.

Ditari politik

Të fundit