Piramida që ndodhet në zemër të kryeqytetit vijon të mbetet një godinë e braktisur dhe që të lë shije të keqe kur viziton bulevardin kryesor. Ndonëse ishte shprehur në fushatën e 2015-ës për vënien në funksion të Piramidës, kryebashkiaku Erion Veliaj, ashtu si katër vite më parë, po e mbyll mandatin me projekte në letër sa i përket kësaj godine.
Ai ka prezantuar disa projekte për Piramidën, që nga ndërtimi i një qendre rinore dhe së fundmi në kthimin në qendrën më të madhe të teknologjisë në rajon.
Në dhjetor të 2016-ës, në takim me mësues të gjimnazeve të Tiranës, Veliaj do të shprehej: “Mezi pres që t’ia rikthejmë qytetit Piramidën. Ideja e Bashkisë, bashkë me arkitektët e huaj ndërkombëtarë që kanë kontribuar, është që ta kthejë qytetin në një qendër kulturore. Ashtu si në kohën time, kur Piramida ishte në fakt qendra e të rinjve dhe vlonte nga aktivitetet e shumta, edhe “RinFesti” të cilin sot e quajmë “Tirana Art-Fest”, bëhej aty, ndaj shpresoj që aty të performojnë edhe kampionët e ardhshëm të artit e të kulturës të shkollës “Qemal Stafa” ose fituesit e radhës të “Tirana Art-festit”. Është një lajm i mirë edhe për të gjitha zyshat që merren kryesisht me artin, kulturën dhe promovojnë super talentet që kemi te ‘Qemal Stafa”
Veliaj iu rikthye gjashtë muaj më vonë të njëjtës çështje, kur në qershor të 2017-ës, në intervistën për emisionin ‘Koha për t’u zgjuar’ deklaroi: “Piramida do të kthehet në një qendër e madhe arti, qendër ekspozitash, do fokusohet tek artistët e rinj. Kemi punuar me arkitektë holandezë. Arkitektët janë në një proces detajimi, se do jetë e komplikuar. Do ta rikonstruktojmë në këtë funksion. Kemi menduar edhe një lloj shkallare, për fëmijët që duan të rrëshqasin, se dashur pa dashur kjo i ka pëlqyer atyre. Do ketë dhe një kullë vrojtimi.”
Por sa më shumë kalonin muajt, aq më shumë shtohej ambicia në letër e kryebashkiakut Veliaj për ‘Piramidën’. Në tetor të 2017-ës, qendrës së artit me shkallare për të rrëshkitur fëmijët, kryebashkiaku i shtoi edhe teatrin dhe bibliotekën.
Në një takim me gjimnazistët, ai do të shprehej: “Prona më e shtrenjtë e Tiranës është si një karkasë e vdekur në mes të bulevardit, që është Piramida. Kështu që aty na lindi ideja: A mund ta rikonstruktojmë Piramidën? Pra ta bejme me teatër, filma, me bibliotekë, me kurse digjitale, pra të kodimit, apo të programimit, që dikush mund t’i ndjekë pa qenë detyrimisht profesionist në atë fushë. Kjo është iniciativa që morëm këtë vit dhe do e buxhetojmë që ta transformojmë”, u shpreh kreu i bashkisë më tej.”
Asgjë nuk ndodhi në 2017-ën, ndërkohë që Veliaj u rikthye në mars të 2018-ës me një tjetër projekt. Ai njoftoi nënshkrimin e një marrëveshjeje me Fondacionin Shqiptaro-Amerikan të Zhvillimit (AADF) për kthimin e Piramidës në qendrën më të madhe multifunksionale për të rinjtë, e fokusuar kryesisht në arsimimin digjital, por dhe të artit e kulturës.
“Hedhim hapin e parë zyrtar për formalizimin e një marrëveshje midis Bashkisë Tiranës dhe AADF për të transformuar Piramidën e Tiranës, ndërtesën më ikonike të qytetit tonë, në qendrën më të madhe për të rinjtë, kryesisht e fokusuar në arsimimin digjital, në kulturën e teknologjisë së informacionit dhe në funksion të artit, kulturës dhe kurseve profesionale apo hapësirave të tjera rinore”, do të deklaronte Veliaj.
As kjo marrëveshje nuk u zbatua nga bashkia e Tiranës.
Tetori i 2018-ës e gjeti Piramdiën në projektet e Veliajt si qendra më e madhe e teknologjisë në rajonin e Ballkanit.
“Piramida e Tiranës do të jetë një tjetër hapësirë për ata që do të merren me teknologjinë e informacionit dhe duan që këto sisteme të hapura të popullarizohen, sidomos tek të rinjtë; do jetë një hapësirë ideale. Punën për transformimin e Piramidës do ta nisim nga fundi i këtij viti dhe vitin tjetër besoj do të kemi një hapësirë, siç janë këto programe të hapura, edhe një hapësirë me mendje të hapur”, ka deklaruar kreu i bashkisë.
Pavarësisht premtimit, Erion Veliaj nuk e nisi zbatimin e projektit në fund të 2018-ës, siç deklaronte, ndërkohë që Piramida vijon të mbetet ende një gërmadhë.
Sot, më 25 prill të 2019-ës, kur Partia Socialiste vijon fushatën për zgjedhjet lokale të qershorit, kryebashkiaku Veliaj premtoi sërish fillimin e punimeve për transformimin e Piramidës. I mbështetur edhe nga kryeministri Edi Rama, ata premtuan se punimet do të nisin këtë vit, për të përfunduar vitin e ardhshëm.
Nga 2016-ta dhe deri në 2019-ën, Piramida u shndërrua në projektet e Veliajt nga një qendër rinore për festivalet e gjimnazistëve, në qendrën më të madhe të teknologjisë në rajon. Ndërkohë, qytetarët dhe turistët në Tiranë vijon të shohin një godinë të shkatërruar dhe pa asnjë funksion.
Financuar Nga Bashkimi Europian
