Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Nga pritja zyrtare me Ramën te takimi ‘grusht më grusht’ me Bashën; Data e zgjedhjeve ‘bashkon’ politikën në presidencë, s’munguan surprizat

Politiko 4 Shtator 2020, 13:56

Një ditë e ngjeshur ka qenë kjo e premte për klasën politike, por edhe për presidenin Ilir Meta, I cili priti përfaqësues të partive një e nga një prej mëngjesit për t’u konsultuar mbi datën e zgjedhjeve parlamentare 2021.

Takimi nisi fillimisht me kreun e PDIU, Shpëtim Idrizin, i cili, ashtu siç tha edhe vetë para mediave, e shfrytëzoi këtë moment për të kërkuar më shumë vëmendje nga ana e qeverisë shqiptare për çështjen e detit me Greqinë.

“I shpreha shqetësimin presidentit për vëmendjen që duhet të ketë qeveria shqiptare edhe në marrëveshjen e firmosur mes Italisë dhe Greqisë për zonat ekskluzive ekonomike sepse në këtë pakt dy ishujt greke Othonoi dhe Irikuza kanë marrë të drejtë të zgjerohen me 12 milje , pra të jenë pikë referimi për ujërat territoriale dhe cenon direkt zonën qene duhet të ndajmë me dy shtete fqinje.

Qeveria shqiptare nuk duhet të pranojë devizën e Greqisë dhe Serbisë, që c’është e Shqipërisë është e diskutueshme. Vendi ynë nuk ka ç’të bisedojë për kufijtë detar dhe tokësor, ka lëshuar nga padrejtësisë historike gati 30% të territorit të saj, e kam fjalën për Çamërinë. Me Greqinë kemi për të biseduar vetëm për zonën ekskluzive ekonomike”, tha Idrizi.

Më pas, Meta u takua me përfaqëues të tjerë të partive opozitare si PAA, PBDNJ, PR etj., të cilët pas takimit në presidencë kanë shprehur një qëndrim të unifikuar, teksa kanë kërkuar datën 18 prill si ditën më të përshtatshme për zhvillimin e zgjedhjeve.

“Propozojmë këtë datë për shkak se maji e më pas tij, është periudhë e vështirë për shqiptarët, pasi punojnë në punë sezonale në Greqi e vendet tjera. Gjithashtu, është datë mes dy pashkëve katolike dhe ortodokse”, tha Arben Tafaj, përfaqësues i Partisë Agrare Ambientaliste.

Takimi me Ramën : kafe apo çaj

Në orën 11.00 duket se nisi edhe pjesa e ‘nxehtë’ e ditës. Kryeministri Edi Rama mbërriti fiks në kohën e kërkuar nga presidenti. Ai u shfaq me maskë të zezë, për shkak të pandemisë dhe në aq minuta të transmetuara live, Rama shmangu çdo takim fizik, qoftë edhe me presidentin, ashtu siç deklaroi edhe një ditë më parë në Vlorë, kur tha se “me presidentin nuk kam shtrënguar dorën për shkak të covid-it”.

“Ju thërrita për të zhvilluar konsultimet për datën e zgjedhjeve brenda afatit që krijon kushtetuta me qëllim që të kemi një proces sa më gjithëpërfshirës dhe për të respektuar çdo ndjeshmëri. Në këtë drejtim do të isha i interesuar të dëgjoja dhe opinion tuaj si përfaqësues të PS dhe mazhorancës", tha Meta, i cili më pas e fton për kafe ose një çaj.

Takimi zgjati rreth 10 minuta dhe sa i takon datës së zgjedhjeve, msohet se Rama ka qenë dakord për çdo datë brenda periudhës 15 prill-15 maj, përveç 2 majit.

Takimi “grusht më grusht’ me Bashën

Fill pas Ramës, në presidencë mbërrin lideri i opozitës, Lulzim Basha. Ndryshe nga kryeministri, Meta pati një takim më të ngrohtë me Bashën, teksa u takuan “grusht më grusht”, përshëndetja e kohës covidiane tashmë.

Pas takimit me Metën, Basha nuk u fokusua në një datë konkrete, por tha se ‘shqiptarët kërkojnë zgjedhje sot, jo nesër’.

"Shumica absolute e shqiptarëve kërkojnë zgjedhje sot, jo nesër. Ata duan zgjidhje sepse janë të lodhur nga propaganda, nga dështimet dhe mashtrimet. Qytetarët kanë nevojë urgjente për punë. Biznesi ka nevojë urgjente për mbështetje. Mjekët, infermierët kanë nevojë për rritje pagash, për kushte dinjitoze për t’u përballur me kolapsin e sistemit shëndetësor i cili është bërë edhe më i dukshëm prej pandemisë. Fermerët kanë nevojë për subvencione, kanë nevojë për treg shitje.

Të rinjtë kanë nevojë për mundësi për arsimim dhe punësim që të qëndrojnë, dhe të jetojnë e të ndërtojnë jetën e tyre këtu në Shqipëri. Pensionistët kanë nevojë për rritje reale, jo elektorale të pensioneve. Pra, shumica absolute e shqiptarëve kërkojnë zgjedhje dhe zgjidhje sot, jo nesër.

Për ne e rëndësishme është që procesi të jetë i lirë dhe i ndershëm. Dhe për ta mbyllur me fjalët e Nënë Terezës meqë nesër ka edhe ditën e Shenjtërimit, “E djeshmja ka shkuar. E nesërmja nuk ka ardhur akoma. Prandaj le të fillojmë të punojmë menjëherë për të sotmen dhe për të nesërmen, duke filluar sot të punojmë për ndryshimin", u shpreh Basha.

Kryemadhi, surpriza e takimeve

Për herë të parë, Monika Kryemadhi sot ka patur takimin e parë zyrtar me presidentin, njëherësh bashkëshorti i saj.

Më herët, ajo i ka shmangur takimet zyrtare me presidentin, duke dërguar zakonisht Petrit Vasilin ose përfaqësues të tjerë në emër të LSI, por sot, e shoqëruar nga ish deputeti Endrit Brahimllari, ka shkuar vetë në takimin me Metën.

E pyetur nga gazetarët lidhur me këtë moment dhe datën e propozuar, ajo tha se zgjedhjet duhej të ishin bërë 2 vite më parë dhe nuk është çështje date

“ Jemi shumë vonë. Nuk është çështje date, është çështje e dhënies së shqiptarëve të të drejtës për të pasur zgjedhje të lira dhe të ndershme dhe për t’i dhënë mundësinë shqiptarëve që një orë e më përpara të jenë anëtarë të BE.

I bëmë të qartë Presidentit që LS do të zbatojë çdo vendim dhe dekret të Presidentit që është kushtetues, do të marrë pjesë në çdo proces zgjedhor që do t’u garantojë qytetarëve qeverinë e ardhshme, atë qeveri evropiane për të cilën kanë aspiruar prej shumë kohësh”, tha Kryemadhi.

Kujtojmë se më herët, PS pati propozuar 9 majin si ditë zgjedhjesh, edhe si simbolik, pasi përkon me ditën e Evropës.

Megjithatë, pas takimit në orën 17.30 edhe me Rudina Hajdarin, presidenti pritet të vijojë procedurat për dekretimin e datës së zgjedhjeve.