Ngërçi për Kushtetuesen, reagon Xhafaj: Meta ka nxjerrë dekret të paligjshëm, cilën Vitore Tusha duhet të besojmë?!

Vjen reagimi i ish ministrit të Brendshëm dhe ish kreut të Komisionit Parlamentar të Ligjeve, Fatmir Xhafaj, lidhur me ngërçin e krijuar për emërimin e gjyqtarëve të Gjykatës Kushtetuese mes presidentit, KED e mazhorancës.

Në një reagim në rrjetet sociale, Xhafaj akuzon presidentin se ka nxjerrë një dekret të paligjshëm në tejkalim të afatit ligjor, e në kushte të tilla Marsida Xhaferllari nuk mund të jetë anëtare, ndonëse është renditur si e tillë nga Vitore Tusha në listën e trupës së re.

“Në web e GjK znj.Tusha ka botuar listën e anëtarëve të rinj! Pyetja është kë të besojmë, znj.Tusha n/kryetare të KED që ka shpallur znj.Vorpsi fituese apo znj.Tusha gjyqtare që nuk respekton as vendimin e organit që drejton. Në cilin kuorum të GjK u bazua kjo vendimmarrje?

Në bindjen time znj.Xhaferllari nuk mund të jetë anëtare e GjK. Nuk plotëson kushtet dhe kriteret për të qenë e tillë. Votimi klientelist dhe lidhjet shoqërore brenda KED e përfshinë në listë ish Kryeinspektoren e KLD së vjetër që degradoi sistemin.

Presidenti, sipas meje, në këtë rast nuk ka të drejtë. Ka nxjerrë një dekret të paligjshëm në tejkalim të afatit ligjor. Nuk të bën betimi gjyqtare, por kushtetutshmëria e zgjedhjes nga organi që e gëzon këtë të drejtë, me afatet e procedurën e duhur”, shkruan Xhafaj, i cili ka kërkuar po ashtu edhe reagimin e partnerëve ndërkombëtarë, si dhe thekson se situata aktuale vjen jo për faj të kushtetutës e ligjit, por gabimeve në zbatim.

“Kushtetuta që Presidenti e ka votuar, por nuk e ka shkruar, është produkt i Ekspertizës më të mirë vendase e SHBA, BE e Gjermania. Opinioni i KV ka theksuar qartë domosdoshmërinë e afateve & mekanizmave zhbllokues. Partnerët ndërkombëtar bashkëhartues të kushtetutës e ligjit të GjK duhet të reagojnë qartë.Zbatimi i Reformës në Drejtësi kërkon axhendë të qartë veprimi, angazhim e përgjegjshmëri dhe kryesorja objektivitet e paanshmëri. Situata e koklavitur, jo për faj të kushtetutës e ligjit, por gabimeve në zbatim. Pasojë e mendjeve të nxehta e qëllimkëqija.

Kur arsyeja mungon, fryma dhe gërma e kushtetutës lexohen keq, duhet reagim. Kryesorja me mekanizma politikë, por edhe me veprime të mirëmenduara ligjore, institucionale dhe gjyqësore. Nëse duhet ka edhe precedentë e ekspertizë ndërkombëtare”, shkruan Xhafaj.