“Ngjashmëria me Danimarkën është shteruese”. Meta i përgjigjet Lubonjës për Kodin Penal

Presidenti Ilir Meta, i vënë në qendër të kritikave gjatë këtyre ditëve pasi dekretoi ndryshimet në Kodin Penal, i është përgjigjur analistit Fatos Lubonja për disa pyetje që ai (Lubonja) u kishte drejtuar juristëve të Presidentit për ndryshimet në Kodin Penal. Presidenti justifikohet me dekretimin e ndryshimeve ligjore, duke u shprehur se ato janë të ngjashme me të Danimarkës.

“Meqënëse z.Fatos Lubonja sot ka bërë disa pyetje për juristët e Presidentit të Republikës, preferoj t’i përgjigjem drejtpërdrejt në respekt të kontributeve të Tij të spikatura prej dekadash në mbrojtje të demokracisë dhe interesit publik. Ndryshimet e detyruara të Kodit Penal për pandeminë, ishin një reflektim ligjor ndaj një të papriture, që surprizoi e tronditi globin në çdo pikëpamje. Realiteti pozitiv është që ndryshimet e bëra janë të një standardi të njëjtë me legjislacionet më të mira demokratike. Ngjashmëria me Danimarkën është shteruese, qoftë për garancinë juridike, ashtu edhe për proporcionalitetin dhe ky është lajm i mirë për këdo”, thotë Meta.

Meta ndan disa shqetësime me Lubonjën, si psh zbatimi i ligjit në vendin tonë. Por sipas Presidentit kuadri ligjor duhet të jetë solid në këtë situatë. “Por edhe dyshimi beninj i Lubonjës është i natyrshëm dhe i motivuar. Ky dyshim lidhet qartë me zbatimin e drejtë dhe korrekt të legjislacionit, që do të thotë në esencë funksionim i shtetit ligjor. Ndajmë të njëjtat dyshime e shqetesime të forta me Lubonjën për tronditjen e shtetit ligjor në Shqipëri, si një sfidë madhore që kërkon përgjigje.

Në këtë situatë, më mirë të kemi një legjislacion sa më solid, të qartë dhe garantues të parimeve të sigurisë juridike dhe proporcionalitetit sipas Kodit Penal të Danimarkës, sesa të kemi një boshllëk ligjor që mbushet vetëm me abuzivizëm dhe arbitraritet apo më keq se sa të kishim ndryshime jashtë çdo standardi demokratik që cënonin të drejtat e qytetarëve tane duke i ekspozuar ndaj abuzivizmit dhe represionit”, thotë Meta.

https://www.facebook.com/ilirmetazyrtar/photos/a.1479540228758912/2958665824179671/?type=3&theater