Flash News

Aksident i rëndë në Thumanë, një i vdekur, 3 të plagosur

Gjykata e Durrësit pezullon nga detyra drejtorin e Arsimit Parauniversitar

Dyshohet se abuzoi se*sualisht me vajzën e tij, mbërrin në gjykatë Zamir Meta

Durrës/ Morën me forcë në automjet një 48-vjeçar dhe e dhunuan, identifikohen 4 autorët

Vazhdon zjarri në landfillin e Elbasanit

KRYESORE

Niko Peleshi flet me gjuhën e Ditmir Bushatit: Interesi kombëtar mbi interesin politik

Politiko 20 Prill 2019, 11:55

Niko Peleshi flet me gjuhën e Ditmir Bushatit: Interesi kombëtar mbi

Niko Peleshi është deputeti i radhës i Partisë Socialiste që reagon dhe bën thirrje për një bashkëpunim të gjerë midis forcave politike, mazhorancë dhe opozitë, për të vendosur të parin interesin kombëtar. Peleshi ka publikuar një reagim që në thelb është i ngjashëm me fjalimin e kolegut Ditmir Bushati, të mbajtur pak javë më parë në Parlament.

Duke iu referuar zhvillimeve politike në botë, Peleshi paralajmëron se edhe në Shqipëri do të shfaqen forca të reja politike me platforma të ndryshme populiste, nacionaliste, radikale majtiste, antieuropiane apo fetare, që do të sjellin ndarje të reja.

“Ato do të peshkojnë padyshim tek problemet ekonomike e sociale, tek pafuqishmeria e bizneseve për të mbijetuar në një treg europian ku kërkohen standarte shumë më të larta prodhimi dhe sherbimi, tek dëshpërimi i të rinjve nga pamundësia për të konkuruar në tregun europian të punës me dijet e marra nga arsimi i lartë shqiptar. Ndaj sa më shumë të mbështeten bizneset e reja dhe ndërmarrjet e vogla e të mesme sot, aq më pak i kërcenuar do të jetë realiteti politik nga sharlatanizmi nesër. Nuk po shohim ende një Jack Ma shqiptar që ta projektojë suksesin e biznesit te vet në shtimin dhe fuqizimin e bizneseve te tjera shqiptare. Jemi larg kësaj filozofie biznesi. Përkundrazi ka një tendencë të vazhdueshmë për ta ngritur suksesin mbi dështimin e të tjerëve”, thotë ish-zv/kryeministri.

Më tej, Peleshi thotë se hapësira për forcat e reja populiste do të zgjerohet nga lufta e paprinciptë e forcave aktuale politike dhe largimi nga nevojat e njerëzve të zakonshëm.

“Ndërkohë sa më e paprinciptë të jetë lufta politike ndërmjet dy forcave tona kryesore politike, sa më tepër t’u largohemi nevojave të vërteta të njerëzve të zakonshëm, sa më të pavërtetë të jemi në ato çka themi ndryshe nga ato çka bëjmë, aq më e madhe do të jetë hapësira për forcat e reja populiste që mund të lindin në skenën tonë politike”, thotë ai.

Sa i përket rezolutës së Parlamentit të Holandës për të rikthyer vizat me Shqipërinë, Peleshi kërkon që opozita dhe mazhoranca të bashkohen për interesin kombëtar, mbi atë politik, dhe të flasin me një zë kundër shqiptarëve që po portretizohen si rreziku i Evropës.

“Rezoluta e Holandës na jep rastin që qeveria dhe opozita politike e parlamentare, të bëjnë gjestin e parë të vendosjes së interesit kombëtar mbi atë politik. Të flasim me zë të lartë me gjuhën e vërtetë të shqiptareve që nuk meritojnë të portretizohen si rreziku i Europes. Shifrat e azilkërkuesve dhe kriminalitetit në vendet e BE e vërtetojnë këtë pohim. Vendimmarrjet e sotme po bëhen gjithnjë e më iracionale dhe mbase ne nuk mund t’i influencojme dot ato, por një Shqipëri që nuk reagon, ose akoma me keq që më gjysmën e vet feston, është një Shqipëri që i thotë qartazi BE-se se nuk e meriton ende të merret në konsideratë si vend aspirant”, shprehet deputeti socialist.

Në fund, Niko Peleshi thekson se në Shqipëri ka ardhur koha të ndryshohet gjuha politike, pasi vendi ka nevojë për zgjidhje e reforma dhe nuk i përballon dot më lojërat politike.

“Dhe së fundi edhe në Shqiperi ka ardhur koha të ndryshojmë gjuhën politike. Tezat e vjetra njerëzit i kanë mësuar përmendësh dhe kanë filluar t’i neverisin. Rruga më e lehtë dhe më joshëse për politikën është kalimi nga gjuha politikisht korrekt në gjuhën populiste, por Shqipëria ka nevojë për zgjidhje e reforma dhe nuk i përballon dot më lojrat politike me pushtetin. Ndaj gjuha populiste e rrugës në Shqiperi është edhe më e rrezikshme se në vendet e tjera. Kemi vetëm një rrugë: Të jemi njerëzore e të perulur para sfidave të mëdha”, thotë Peleshi.

Pak javë më parë ishte ish-ministri i Jashtëm, Ditmir Bushati, që kërkoi një bashkëpunim të forcave politike për të çuar përpara procesin e integrimit të Shqipërisë, pasi vendi ynë ka mbetur shumë mbrapa shteteve të tjera të Ballkanit.

Deklarata e Bushatit dhe së fundmi kjo e bërë nga Peleshi, shihen edhe si mesazhe direkte ndaj kryeministrit Edi Rama, i cili nuk po bën asnjë hap për zgjidhjen e krizës politike që ka mbërthyer vendin.