Noizy dhe Unikkatil, dy modele të ndryshme jo vetëm në muzikë

Protesta e studentëve ka përfshirë në debat të gjithë shoqërinë shqiptare, pa lënë jashtë as artistët dhe këngëtarët. Noizy dhe Unikkatil janë dy këngëtar të ‘Hip Hop’, me këngët e të cilëve, për mirë apo për keq, janë rritur shumica e atyre të rinjve që protestojnë prej dy javësh për përmirësimin e arsimit në Shqipëri. Rigels Rajku (Noizy) dhe Viktor Palokaj (Unikkatil) u përfshin në debatin e protestës në mënyra të ndryshme, ashtu siç është edhe muzika e tyre, ndonëse pjesë e një rryme. I lindur dhe i rritur në Prishtinë, Unikkatil e zhvillon nga Amerika aktivitetin e tij muzikor dhe prej vitesh është një prej reperave më të dëgjuar nga publiku shqiptar. Tekset e këngëve të tij godasin shpesh herë sistemin e instaluar në Kosovë, pas mbarimit të luftës, çka e bën që të jetë shumë më pranë publikut që e dëgjon. Duke ruajtur të njëjtin stil dhe qëndrim, Unikkati u bë ndër artistët e parë që i dha mbështetje studentëve protestues në Tiranë. “Forca studenta!! Kur fillon politikani me iu frikësu popullit atëherë shteti ecë si duhet!! Mirëpo, mos lejoni parti tjera me rrasë hundën këtu”, ishte mesazhi që reperi dërgoi për të rinjtë shqiptarë. E konsideruar edhe si protesta më kreative e zhvilluar ndonjëherë në Shqipëri, në shumë prej pankartave që kanë mbajtur në duart studentët, janë shkruar vargje nga këngët e Unikkatil.

 

View this post on Instagram

 

Forca studenta!! Kur fillon politikani me iu frikësu popullit atëherë shteti ecë si duhet!! Mirëpo, mos lejoni parti tjera me rrasë hundën këtu.

A post shared by UNIKKATIL (@unikkatilofficial) on Dec 11, 2018 at 10:00am PST

Por e njëjta gjë nuk mund të thuhet për këngët e Noizyt. Ai është ndoshta reperi më i famshëm në të gjitha trojet shqiptare, madje bashkëpunimiet me emra të njohur të muzikës në Itali dhe Gjermani, kanë ndikuar që këngët e tij të përhapen përtej Shqipërisë dhe Kosovës. Ndryshe nga Unikkatil, Noizy zgjodhi të dilte hapur në krah të propozimit të kryeministrit Edi Rama për dialog. Disa postime në dy ditët e fundit, ku bënte thirrje për dialog, e vendosën reperin në qendër të kritikave nga të rinjtë, pikërisht ata që mbushin club-et dhe sheshet kur mësojnë se këngëtari i preferuar do të performojë aty. Sponsorizimet që Noizy i ka bërë gjithashtu figurës së Erion Veliajt, kryebashkiak i Tiranës, nuk kanë kaluar pa vëmendje nga studentët protestues. “Të paktën kjo qeveri nuk po ju vret mes protestës dhe të mos mbaj asnjë përgjegjësi”, shkruante ndër të tjera Noizy në thirrjen që u drejtonte studentëve për t’u ulur në takim me kryeministrin Rama. Pavarësisht se në postimet e mëvonshme u përpoq të sqaronte se bindjet e tij nuk lidheshin me partitë politike, kritikat që i vinin nga studentët e detyruan reperin të fshinte të gjitha postimet për këtë çështje nga ‘Instagrami’. Nëse këtë debat do e zhvendosnim për një moment në Amerikë, aty ku e ka origjinën rryma e repit, asnjë artist nuk do guxonte të dilte kundër qëndrimit të studentëve. Kjo muzikë (shumë nuk e konsiderojnë të tillë) klasifikohet si anti-sistem dhe anti-qeveri, pa marrë parasysh ndasitë partiake. Për çdo repist në Amerikë që do rreshtohej në krah të qeveritarit, kundër protestuesve, karriera nëse nuk do i rrëzohej tërësisht, të paktën do i lëkundej seriozisht./Politiko.al