'Armiqtë' e integrimit të Shqipërisë

Alfred Lela

Kjo mazhorancë i ka patur të paqeta marrdhëniet me integrimin, ashtu dhe me të huajt që u është dashur të monitorojnë progresin e Shqipërisë, si trojanët portat Skee.

Që në themel të këtij raporti të vështirë, socialistët atëherë në opozitë, vendosën të mos i votojnë tre ligjet, me atë formulë që erdhi të njihej si ‘nuk e japim Fierin për Brukselin”. Opozita atëherë, mazhorancë që prej 2013, përherë ka shpikur një ‘kalë Troje’ për të përligjur luftën e humbur. Dmth një masë të trashë shfajësimesh.

Rekordin, ndoshta, e mban Gramoz Ruçi, që u tha deputetëve hollandezë se ‘shfaqjet e huaja’, drogën e prostitucionin, ‘nuk ua sollëm ne, por i gjetëm mes jush’. Shefi i tij, Rama, disa herë i ka mëshuar idesë se ngecja e Shqipërisë nuk ka të bëjë me vendin, kriteret, progresin, por me Europën vetë.

Kryeministri ka përmendur atë që quhet ‘lodhja nga zgjerimi’ për të fshehur dështimin për t’u afruar me BE. Edhe pse negociatat nuk u hapën, para dy vitesh qeveria bëri festë për hapjen. Tashmë që kemi marrë hapjen dhe presim fillimin e negociatave, gjë që e shenjon një konferencë ndërqeveritare, ngecja e vjetër është rishfaqur si gangrenë.

Hollandezët nuk na shohin gati. Gjermanët na kanë vënë 15 kushte. Danezët gjithmonë ndjekin gjermanët, ndërsa francezët, fuqia tjetër e madhe e BE, duket se edhe këtë herë kanë hallin te ‘Troja e tyre’.

Por, kalin, njerëzit e qeverisë nuk pushojnë së rishpikuri. Një deputet tha së fundmi se, fajin për mosmbajtjen e konferencës ndërqeveritare e ka Maqedonia e Veriut. Të cilën e pengon Bullgaria me anë të vetos.

Prej dy vitesh thuhej e kundërta dhe flitej për deçiftim. Ishte Shqipëria që e pengonte Maqedoninë.

Por, tani mund të flemë të qetë. Edhe kësaj here nuk ka të bëjë me ne. Eshtë gjithmonë dikush tjetër. Në mendjet tona nuk e kemi fikur ende fanarin që ndriçon brigjet e Adriatikut, viset ilirike, maqedone, që nga territoret e Iliadës e deri te të Odisesë.

*Editoriali i emisionit PolitikOn, e hënë 23 nëntor, në RTV Ora

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm