Flash News

OP-ED

Ateisti i televizioneve para një vrasjeje dhe pemës së Krishtlindjes

Ateisti i televizioneve para një vrasjeje dhe pemës së

nga Alfred Lela

 

Ateisti është qënie e çuditshme. E kundron Zotin nga lartësia e zotave të vet, shumë më të paqartë dhe të padëshmueshëm, se Ai të cilit i kundërshton ekzistencën. Gjërave kaq të përgjithshme, si humanizmi apo barazia, për shembull.

E ka thënë Albert Kamyja: I majti do njerëzimin, por urren njeriun.

Kështu ndodhi edhe në Tiranë, dje e sot. Zoti i së majtës ateiste të Shqipërisë, u bënë dy pemë dhe termat ‘taksat tona’ apo ‘prona e përbashkët’.

Nga bjondet e ekranit, deri te mikrobergjezët marksistë të internetit, kuisnin vajet për ‘pemët e përdhunuara’ nga të revoltuarit për vrasjen e Klodian Rashës.

Të njëjtët që postonin gjoja-dhimbjen e vet, dhe pandjeshmërinë trumpiste të policisë amerikane, për Black Lives Matter, spërdridheshin për pemën. Së cilës i thonë ‘Pema e vitit të Ri’, sepse, duke qenë ateistë, nuk e njohin Krishtlindjen, veçse si shkas për shopping dhe foto luksoze Instagrami.

Sepse Zoti, nëpërmjet gjakut të Klodian Rashës, ua përmuti gjithë arsyetimet boshe.

Pushteti i tyre liberal, që ‘nuk vret si këta të Saliut’, vriska që ç’ke me të! Ajo që i mungon vrasjeve të tij është burrëria.

21 janari, të paktën, ishte një përballje. Me dy palë të qarta dhe të vendosura. Ditën. Në sheshin kryesor të Shqipërisë. I vëzhguar nga kamerat dhe të huajt.

Vrasjet e tyre veç Zoti i di se si dhe pse ndodhin.

Të dashur klientë të pushtetit, të dashur ateistë, të dashur qesharakë: Shtrëngohuni pas pemës. Pemës së Edit, pemës së Lalit, pemës së Vitit të Ri, pemës kineze. Derdheni lotin e krokodilit për gjërat e pashpirt, ndërkohë që përçmoni shpirtin e atyre që del nga trupi, dhe trupat e atyre që bëhen qiri kujtese për të.

Tek iu shoh të ecni Bulevardit të Hipokrizisë, më vjen në buzë një gaz, si të isha nën një peme Krishtlindjeje.

Ditari politik

Të fundit