Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

OP-ED

Beteja e Bashës për inceneratorët, është edhe e publikut; ai nuk duhet ta lërë në mes

Alfred Lela 21 Tetor 2020, 14:56

Beteja e Bashës për inceneratorët, është edhe e

Lulzim Basha, siç vinte në pah me të drejtë Andi Bushati, ka futur në repertorin politik, duke e bërë prioritet, denoncimin e aferës së inceneratorëve. Jo vetëm ai si shef i opozitës, por edhe gazetarë investigativë, analistë politikë etj., jo vetëm dyshojnë, por edhe kanë dhënë, në mos prova, kundërshti të forta logjike në fijet që lidhen e priten, të gjitha me përfshirje ministrash dhe eksponentësh të lartë qeveritarë.

Do të ishim thuajse në një territor të njohur nëse beteja do të vringëllonte vetem mes aktorëve të zakonshëm politikë, qeverisë me opozitën dhe skalioneve mediatike që mbështesin njërën apo tjetrën palë. Çka ia shton kundërmimin dyshimtar së ashtuquajtuërs aferë të inceneratorëve është përfshirja në të, direkt dhe indirekt, e dy televizioneve më të mëdha kombëtare në vend.

Edicionet qendrore të lajmeve, emisionet e debatit në prime time, janë kthyer në transportierë të agjendës së inceneratorëve, jo si shqetësim publik apo i publikut, por si krahëmarrje, pozicionim që i siguron njërës media ruajtjen e thelës së kapur në biznesin e përpunimit të mbetjeve dhe tjetrës trysninë e nevojshme, e cila do i sigurojë diçka, apo pak më shumë.

Në këtë lojë është futur, dhe kërkon të dalë me mjeshtëri, kryeministri Rama. Shumë e lexuan spotin special me zërin e tij si një kundërpërgjigje ndaj Armand Shkullakut. Në fakt ishte ‘një djallëzi më shumë’. Spoti i kryeministrit donte të shpërfaqte pikërisht konfliktin e interesit të atyre që i janë kundërvënë inceneratorëve. Më shumë se me Shkullakun, e kishte me TV Klan e të tjerë, kur i kujtonte emisionin e plotë laudator të Alma Çupit, e cila në majë të një platforme metalike e aktronte plehrapërpunuesin e Elbasanit si Buzz Aldrin zbritjen në Hënë.

Me një lëvizje Rama kërkoi të rrëzonte pretendimet e njërës palë akuzatore, në këtë rast Shkullakut, por duke synuar përfshirjen në të të gjithë grupit Klan. Kryeministri e praktikon prej kohësh këtë skemë, denoncimin si të shitur e të blerë, si të pabesueshëm dhe interesaxhinj të medias dhe personazheve të saj, edhe pse në fund të ditës blerësi më i madh është bash ai vetë.

Ky kontradiksion nuk e pengon z. Rama të përdorë termin ‘kazan’ duke gjallëruar dhe zbavitur një pjesë jo të vogël të popullatës, e cila nuk e kupton dinamikën e peizazhit mediatik, por argaliset kur i pari i vendit u kundërvihet ‘fytyrave të zakonshme’ që ‘shesin mend’ çdo natë në televizione. Për turmën kjo është hakmarrja e të pamundurit dhe Rama ua shërben këtë me logjikë të ftohtë dhe nënqeshje cinike.

Lulzim Basha është një lojtar ekstra në këtë skenë, edhe pse ai është dhe duhet të ishte qendrori. Them ‘ekstra’ sepse edhe për të media proqeveritare dhe anekset mediatike të Top Channel gatuan shpejt e shpejt një skemë të së shkuarës, ku në aferat e inceneratorëve përfshiheshin edhe interesa apo familjarë të tij.

E vetmja mënyrë për t’i zhvlerësuar këto pretendime, që me ‘sy të lirë’ duken të ngritura në rërë, është që Basha të vazhdojë, me forcë dhe bindje, betejën e inceneratorëve. Këmbëngulja do të kthehet në shpërblim, jo vetëm për pretendimin e rrejshëm (të gjithë janë të pafajshëm derisa të provohen me faj) të përfshirjes së tij në skemën e dikurshme, por edhe për parabolën e vjetër që kundërshtari politik apo edhe kritikët kanë ngritur kundër tij: i lë betejat në mes.

Basha mund të bëhet qendra e kësaj beteje dhe simboli i saj. Një pozicion që ai pat qenë përpjekur ta merrte edhe në protestën masive kundër ardhjes së mbetjeve kimike në Shqipëri, por dështoi pasi u ndesh me refuzimin e protestuesve.

Rasti, apo babëzia e qeverisë, i ka sjellë te pragu një kauzë që, çuditërisht, rezonon me shqiptarët. Në të përshihen çështje të mjedisit dhe të korrupsionit qeveritar. Se çfarë do të bëjë Basha me këtë rast do të thotë shumë, jo vetëm për të personalisht, por edhe për fatin e opozitës në zgjedhjet e ardhshme.

Është koha që mosbesimin ta kthesh në besim, Lul!