Flash News

Riatdhesohen 13 shqiptarë nga kampi i ISIS në Siri

Përfaqësues të ‘Rithemelimit’ në PPE, Berisha: Nuk ka pasur ftesë, do shkojnë 4 deputetë

Nesër zgjidhet Kryesia, Berisha mbledh sot ‘Rithemelimin’: Shqyrtojmë kandidaturat

Grekët bëjnë ‘kurban’ çamët për integrimin, për detin ‘heqin qafe’ Metën. Rama aprovon në heshtje

Konflikti në familje përfundon në vrasje, ndërrojnë jetë babë e bir në Kosovë

OP-ED

Fotoja me Enverin fsheh një shqetësim

Politiko 3 Dhjetor 2021, 17:01
Fotoja me Enverin fsheh një shqetësim

Alfred Lela

Një foto, e pabotuar më parë, e Sali Berishës në prani të Enver Hoxhës, nuk na thotë ndonjë të re, veç asaj se çfarë duan të zbulojnë porositësit e saj. Që është diskreditimi i Sali Berishës, si i ardhur nga thelllësitë e diktaturës, i afërt me familjen Hoxha, mjek i Bllokut, pra një gjë e vjetër fort e politikës, pra llum i tranzicionit, si me thënë.

Fotoja puqet me gjuhën e përdorur, si nga Basha ashtu dhe të tijtë, në raport me ish-shefin dhe liderin historik të partisë. Në PD, nëpërmjet një mekanizmi krejt artificial dhe hipokrit, ka nisur lufta e ‘të vjetërve’ me ‘të rinjtë’. Paçka se kjo luftë shpesh i demaskon të rinjtë si të vjetër dhe i zbulon të vjetrit si të rinj. Fuqia e paradokseve është më e pushtetshmja ndër zbulesat.

Veç kësaj, në këtë scoop të ri për Berishën zgjaten dy jehona.

Së pari, fakti se të tijtë, domethënë Basha dhe eksponentë të tjerë demokratë, apo shtypi dikur pranë tij, grupi mediatik Hysenbelliu etj., kanë filluar përpunimin e tezave që për kaq kohë kanë qenë buka dhe djathi i së majtës. Sipas të cilave Sali Berisha nuk është demokrat, por komunist i konvertuar; ai ka qenë pranë familjes Hoxha, ja ku i keni fotot e tij me të birin Sokolin në një varkë në Pogradec…, ai ka qenë Sekretar partie, e me radhë.

Së dyti, dhe ajo që ka rëndësi për argumentin e këtij editoriali, është fakti se Sali Berisha po rimishërohet si kundështar dhe po i jepen të gjitha atributet e ‘peshës së rëndë’ politike. Për të arritur te kjo gërmohen sirtarët e së shkuarës për foto të tilla, riciklohen kontekste dhe insinuohen kompromentime të ish-shefit të PD. Kjo ndodh edhe kur PD zyrtare ka ndërmarrë nismën e dekomunistëzimit të shoqërisë, duke e bërë Berishën, by default, një ish-komunist të padashur nga amerikanët.

Berisha ka qenë për një kohë të gjatë subjekt sulmesh të tilla, me ato që mund të quhen lajme epruvetë, të cilat riaktivizohen, me porosi, sa herë kundërshtari politik do të mjegullojë skenën për aksh qëllim. Më klasiku i tyre është ‘dosja e Haklajve”, e cila nga gazetarët afër të majtës rithirrej në skenë sipas një kalendari në të cilin nuk mund të mos dallohej ‘hunda e porosisë’. Më haluçinanti ka qenë një personazh episodik dhe i errët, një me emrin Shemshedin a Hysamedin, i cili çdo vit ritregonte të njëjtën histori persekucioni, ushtruar me gjasë nga Berisha në kohën kur ishte mjek.

Lajme të tilla, që konsiderohen si vrasje karakteriale (character assassination) janë të zakonshme edhe në botë, dhe lidhen kryesisht me fushata presidenciale etj. Si pjesë e fushatës negative synojnë demontimin e kundërshtarit, sidomos në rastet kur ai është përpara në sondazhet e opinionit publik dhe ka siguruar epërsi në garë.

Kësaj fashe duket se i përket edhe një foto e publikuar sot ku Berisha, si mjek i ri shfaqet në sfondin e një pamjeje të sunduar nga Enver Hoxha.

Berisha i ka shqetësuar kundërshtarët e brendshëm me një fushatë efikase politike dhe, për të kujtuar Oscar Wilde, çdo efekt të krijon një armik.

Të fundit