Në PD presin listën. Do të jetë ‘home-made’ dhe e shtrenjtë?

Nga Alfred Lela

Një gjë është e sigurt.

Cilado të kishte qenë lista e drejtuesve politikë të Partisë Demokratike, në qarqe dhe në Tiranë, debatet do të kishin vluar. Të mbeturit jashtë do të ngrinin krye për të thënë se koka e tyre plot mend, kontribute për PD dhe patriotizëm për vendin duhej të ishte nën strehën e asaj sigurie.

Ata që janë jashtë grupit të drejtuesve, dhe që me gjasë do të jenë edhe jashtë listës së deputetëve nuk ngrenë krye. E shumta pëshpërijnë.

I njoh shumë prej tyre dhe ka nga ata që ende kanë shpresë; ka nga ata që do durojnë me shpirt ndër dhëmbë deri më 26 prill që të mos dalin kundër shtëpisë së vet; siç ka edhe nga ata që thjesht janë bërë profesionistë në ushtrimin e nënshtrimit.

Opozitarët në Shqipëri janë tashmë njerëz të frustruar.

Tetë vite larg pushtetit qendror, dhe prej dy vjetësh mbetur edhe jashtë vendorit, i bën një pjesë sosh që të lëshojnë nga sytë xixa atomike zemërimi.

Një pjesë tjetër nuk e kanë këtë hall. Ata presin me durimin që ua lejon dhjami i vënë gjatë tetë viteve të tyre të pushtetit. Një grup i vogël janë edhe më fatlumët.

Edhe në opozitë, edhe kur duket se fjalët dhe aksioni i tyre shkon dhëmb për dhëmb me pushtetin, po me pushtetin dhe oligarkët i ndajnë ca favore dhe bereqete biznesi.

Kjo turmë e fragmentuar dhe laramane e bën opozitën e bashkuar që të vetëndjehet e ndarë dhe në siklet.

Forcat politike janë ngjizur dhe ekzistojnë si bashkim idesh dhe interesash. Heterogjenitetin e interesave e bëjnë homogjen idetë.

Fakti që idetë nuk shpallen, por pëshpëriten, që krena që duheshin ngritur ulen, duke mbajtur lart vetëm antenën e veshit për fërshëllimën e kryetarit, tregon diçka për gjendjen e gjërave.

Për të mos thënë atë tjetrën. Që edhe një ide që e pati kryetari dhe partia, Komisionin e Vlerësimit të Kandidatëve, u vra po nga i zoti.

I cili, edhe njëherë si në 2017, do të lidhë kokën me peshqir dhe do të dalë nga vesku i mesnatës me listën personale.

Një listë të hatashme. E cila, si çdo produkt home-made, është pak e shtrenjtë.