Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

POLITIKOFF

Dhimbja e kokës nga vapa/ Shkaqet, simptomat dhe masat që duhet të merrni

Politiko 1 Korrik 2025, 16:01

Dhimbja e kokës nga vapa/ Shkaqet, simptomat dhe masat që duhet

Në ditët e nxehta të verës, dhimbja e kokës është një nga shqetësimet më të zakonshme për shumë njerëz. Temperaturat e larta dhe ekspozimi i zgjatur në diell ndikojnë ndjeshëm në gjendjen fizike dhe mendore, duke shkaktuar lodhje dhe tension të fortë në kokë. Ky shqetësim mund të bëhet më i theksuar nëse ndodhemi jashtë për periudha të gjata pa mbrojtje dhe pa hidratuar trupin siç duhet

Një nga arsyet kryesore të dhimbjes së kokës në verë është ekspozimi i drejtpërdrejtë ndaj diellit për një kohë të gjatë. Por ndikojnë edhe faktorë të tjerë si dalja në diell me flokë të lagur pas një dushi të ftohtë, që shkakton një kontrast të menjëhershëm temperaturash. Po ashtu, ajri i thatë dhe i nxehtë, si dhe luhatjet e tensionit të gjakut apo lodhja e muskujve për shkak të temperaturës së lartë, ndikojnë në shfaqjen e dhimbjeve të kokës

Personat që vuajnë nga migrena apo sinuset e bllokuara janë më të ndjeshëm dhe shpesh ndiejnë përkeqësim të simptomave kur ekspozohen në vapë. Një tjetër faktor që shpesh neglizhohet është ulja e nivelit të sheqerit në gjak. Kur ecim në diell apo kryejmë aktivitet fizik, trupi harxhon më shumë energji për të ruajtur temperaturën e brendshme dhe si rezultat ndodh lodhja, dehidratimi dhe krijimi i një presioni të brendshëm që përkthehet në dhimbje koke

Simptomat e dhimbjes së kokës të shkaktuar nga vapa janë të ndryshme. Disa persona ndiejnë një dhimbje therëse ose pulsuese në pjesën e përparme të kokës. Të tjerë kanë ndjesi të përziera, lodhje, ndjeshmëri ndaj dritës, dhimbje në qafë dhe shenja të qarta të dehidratimit si tharje e gojës apo ndjesi marramendjeje

Për të shmangur këtë gjendje është e rëndësishme të qëndroni sa më shumë në ambiente të freskëta, të ajrosura dhe larg rrezeve të diellit gjatë orëve të mesditës. Ata që punojnë jashtë apo duhet të lëvizin gjatë ditës duhet të organizojnë lëvizjet herët në mëngjes ose në orët e pasdites kur dielli është më i butë. Në çdo rast, duhet të keni me vete një shishe me ujë të freskët për të ruajtur hidratimin e trupit. Vendosja e një kapeleje dhe përdorimi i syzeve të diellit janë masa të thjeshta por shumë efektive për të mbrojtur kokën dhe sytë nga nxehtësia

Nëse pas kthimit në shtëpi ndieni dhimbje koke, një dush i vakët do të ndihmojë në uljen graduale të temperaturës së trupit. Gjithashtu mund të lagni një peshqir me ujë të ftohtë dhe ta vendosni mbi ballë dhe sy për disa minuta ndërsa pushoni në një dhomë të freskët. Një tjetër zgjidhje praktike është përdorimi i qeseve të çajit të ftohur me kamomil të cilat mund të vendosen mbi sytë tuaj për të qetësuar irritimin dhe për të reduktuar fryrjen e shkaktuar nga dielli

Nëse këto masa nuk japin përmirësim dhe dhimbja përsëritet shpesh, atëherë këshillohet të konsultoheni me mjekun për të përjashtuar probleme të tjera shëndetësore.