Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

OP-ED

Nëse Rama është serioz për b/qeverisjen, si mund të jetë Basha joqesharak

Politiko 10 Maj 2021, 18:05

Nëse Rama është serioz për b/qeverisjen, si mund të

Nga Alfred Lela

Blendi Kajsiu i ka analizuar, ndoshta më mirë se kushdo tjetër, zhvillimet e fundit politike në lidhje me zgjedhjet. Në një seri shkrimesh ai ka riprodhuar një skaner të qëndrimeve dhe pretendimeve të palëve në raport me post 25 prillin, duke u ndalur te më i fundit, oferta e Ramës për Bashën dhe njëfarë bashkëqeverisje.

Kajsiu thotë se Ramës i intereson që të fusë te përfitimet e pushtetit edhe popullin opozitar, i cili nëse lihet 12 vjet larg benefiteve mund të krijojë destabilitet. Pra, sipas tij, duhet amortizuar goditja e herës së tretë që socialistët u dhanë demokratëve.

Premisa e Kajsiut është një prej atyre që mund të konsiderohen si textbook politics, pra diçka që duket mirë në letër dhe është i fisëm edhe si akt. Por, kjo do të thotë se Rama mund të kryejë me një goditje dy gjëra në dukej të pamundura. Të zbusë kundërshtarin e madh, demokratët, duke i futur në sistem dhe prodhuar një paqe politiko-shoqërore. E gjitha në kurriz të kundërshtarit më të vogël, LSI.

Të dyja nuk mund ta arrihen, amortizimi i PD dhe mosegërsimi i LSI. Nëse shkohet në caqet e bashkëqeverisjes mes Ramës dhe Bashës, dhe nëse presidenti shkarkohet, kjo automatikisht krijon hapësirë opozicioni radikal që lihet bosh nga futja e PD në vathën e pushtetit.

Kthimi i Metës në parti dhe çlirimi i tij prej kornizave presidenciale, shtoji kësaj egërsimin nga tradhtia e Bashës, i krijon LSI një profil të fortë në një terren të boshatisur nga opozita tradicionale demokrate.

Edhe sikur ky të mos ishte problemi, një gjë për t’u zgjidhur mbetet vendi i Bashës në rast bashkëqeverisje. Vënia në rolin e një vartësi të Ramës do të ishte shkatërruese për imazhin. Kryesimi i parlamentit, të cilin prej javësh e denoncon si të Tomës e Qifes, do të qe gjithaq një kafshatë e fortë për t’u kapërdirë. Aneksimi në Presidencë do të ishte një pension i parakohshëm politik.

I vetmi skenar i menaxhueshëm është ai i një kryeministri nga e majta, që nuk është Rama. Në rastin kur shefi socialist është i pari që e ka thyer tabunë e mandatit të tretë kjo është si t’i kërkosh mbretit abdikimin.

Kështuqë, për t’u kthyer te Kajsiu, Rama mund ta ketë seriozisht, por mes tij dhe kryedemokratit nuk gjendet një alternativë që e mban edhe Bashën në kufijtë e seriozes. Hiq këtu rastin e një eksperimenti 2 vjeçar, një palë zgjedhje lokale të pakontestuara dhe më pas dalje nga koalicioni, që u lejon palëve kohë të mjaftueshme për t’u ‘armiqësuar’ sërish me njëra-tjetrën dhe për të zhvilluar si kundërshstarë normalë zgjedhjet e 2025.

Në këtë rast, gjasa e Ramës për një mandat të katërt është gjëja më serioze që mund të thuhet.