Pronari i News-it dhe pronari i Shqipërisë

Alfred Lela

Marshimi i policisë në orët e para të mëngjesit në mjediset e News24, strehë edhe e disa mediave të tjera të të njëjtit grup, është rast i përsëritur i një qeverie që është tashmë regjim personal.

Edhe sikur të ishte hera e parë, në një vend me aspirata europiane, do të ishte shumë. Fakti që është e disafishta herë, përbën një alarm të kuq për mënyrën se si Rama ka ndërmend të menaxhojë pushtetin, dhe ta personalizojë atë, në mandatin e katërt.

Në të gjitha kuptimet, Edi Rama është nje përsëritës, dhe ky brutalitet i radhës nuk duhet të shkaktojë habi, as te kundërshtarët më të flaktë as te ata që gojën e kanë të mbushur plot me fjalor demokratik… për këdo tjetër, hiq Ramën.

Duhet ta kemi të qartë se fortafolësit e KM do të bërtasin për ‘interesin publik’ dhe për dritëhijet e Irfanit, por jo për thelbin. Thelbi për ta është intersi që i mban të lidhur me pushtetin, dhe ata nuk mund ta presin degën ku varen.

Sido që të jetë, demokracinë e dallon nga format e tjera të qeverisjes politike ligji dhe procedura.

Në këtë manifestim të mungesës së saj, një reagim të vërtetë, të fortë, duhet ta marrin përsipër të parët ata që bredhin, sa në Bruksel e sa në Tiranë me një Larousse të trashë demokracie, që nga delegacioni i BE në Tiranë, dhe varg të gjithë organizmat që bëjnë monitorimin e ecurisë së Shqipërisë në raport me integrimin.

Gjuha e mefshtë, dyjare, e pështjelluar, dhe jo pak herë skuthe, i bën ata bashkëfajtorë.

Aq më keq nëse ata banojnë në nevojtoren e idesë se Shqipëria dhe shqiptarët duan të futen në Europë, sikur le ta themi, të fitonin Eurovizionin, pra si një biçim trofeu për turmat, jo si një ide ku përputhen meritokracia me nevojën për një përvojë të përbashkët europiane.

Edi Rama është për herë të tretë te portat e medias, edhe sot e gjithë ditën, kur thotë se ka gjetur portën e BE. Edhe nëse shkojmë me idenë se, si mediat ashtu dhe veprimi i qeverisë, kanë qenë banditeske dhe mes dy bandave zgjedhim me të fortën- se me atë kryejmë punë- ky është një standard banditësh.

Si i tillë duhet përçmuar dhe hedhur poshtë.

Edi Rama dhe pronari i News24 kanë qenë miq dikur. Si të tillë të dy kanë mbyllur sytë për njëri-tjetrin: I pari për shkeljet që ia pretendon sot e prej disa vitesh të dytit, dhe i dyti për shumë mbrapshti të të parit.

Kjo nuk e amniston Kryeministrin, madje e bën më shumë përgjegjës.

Lufta e pabarabartë me pronarët e medias, e shndërron Edi Ramën nga kryeredaktor të Republikës në pronar të saj. Kjo pronësi mbi Shqipërinë dallohet kudo, nga ndërhyrja në Theth, nga drafti i Kodit të ri Penal, që shenjtëron ‘burrështetasit’ e Republikës, dhe deri te cirku me drejtorët e bashkive.

Të njëjtët me të cilët futi në thes zgjedhjet e vjedhura të 11 majit.

Kjo është instanca e fundit për shqiptarët që të të bëjnë zë, të mbajnë një qëndrim. Jo për Fanen, por për interesin publik të përbashkët.

Në mos, shqiptarët nuk janë më individë dhe as komunitet, por ajo turma laramane e fillimviteve ’90 që kapërceu detin për në Itali apo malet për në Greqi, dhe që fliste për punëdhënësin si ‘pronari’.

Jemi kthyer, me sa duket, te konceptet bazike: a jeni pronë e dikujt, apo zotër të vetvetes.

Shqipërisë mund t’i ketë dalë pronari, por individi dhe komunitetet përbëjnë vendet dhe kombet.

Në këtë kuptim, pyetja që vlen sot është: a je individ apo ke pronar?