Flash News

Fuste dr*gë dhe sende të paligjshme në qeli, arrestohet polici i burgut të Drenovës

Lavrov: NATO po rrezikon vetëshkatërrimin me buxhetin e ri ushtarak

​Kurti e Vuçiç "përballen" nesër në Shkup

Bie nga skelat, humb jetën punëtori i ndërtimit në Berat

Prokuroria dërgon për gjykim dy zyrtarët e Bashkisë Korçë

OP-ED

Protesta do të ketë, po Dhjetor ‘të dytë’?

Politiko 15 Dhjetor 2020, 11:10
Protesta do të ketë, po Dhjetor ‘të dytë’?

nga Alfred Lela

Përplasja e pikëpamjeve mbi protestat që vijojnë prej ditësh nuk sjell gjë të re. Askush nuk u del zot protestave. Secili ka arsyet e veta. Qeveria nuk do, sepse ato kundërshtojnë propogandën ditore që thotë ‘qentë lehin, karvani bën përpara’. Opozita struket, sepse identifikimi me protestat e fut në kurs përplasjeje me ndërkombëtarët. Protestuesit, ndërkohë që goditjet i kanë për qeverinë, nuk do ta donin as opozitën nëpër këmbë.

Duket se beteja, edhe pse nuk ka nisur mbi baza politike, do të përfundojë aty. Palët po masin forcat se kush ka shumicën në Shqipëri. Kush janë më shumë: qeveritarët, opozitarët apo e ashtuquajtura ‘shumica e heshtur’. Ajo që mund të përfaqësohet sot nga kjo pakicë protestuesish nxjerrë rrugëve nga vrasja e njërit prej tyre, 25 vjeçarit Klodian Rasha.

Për t’u dukur shumicë bëhet çdo gjë. Nxirret nga skenari i filmit ‘Wag the dog’ letra e një 6 vjeçareje ‘kundër dhunës’. Risillet deklarata e babait të të vrarit i cili lutet të mos shkulet as edhe një lule në emër të të birit. Lejohet që trafiku dhe protestuesit të bashkëjetojnë nëpër rrugët e Tiranës, për të parë se cila palë i mbijeton më gjatë zemërimit. Policia shkon te selia e PS në Shkodër vetëm pasi është djegur, edhe në atë rast në rolin e spektatorit.

Retorika bën atë që nuk e kryen dot simbolika dhe as aktet. Shpik revolucione të pareshtura, rini që ngrihet, protestues që dalin nga margjinat për të marrë në dorë fatet e Shqipërisë, Shqipëri së cilës ia kanë me hile, Shqipëri që e hedh vallen në gojën e ujkut etj etj.  Thonë se Lëvizja e Dhjetorit po ndodh për herë të tretë. Ndërkohë nuk ndryshon asgjë. Dhe as mundet të ndryshojë.

Sepse tani retorika është bërë më e fuqishme se aktet. Dhjetorin e dytë a të tretë, ndryshe nga ai i pari, e presim prej të tjerëve, jo prej vetes. E gatuajmë, si të ishte kek me mollë, në ngrohtësinë e kuzhinës tek shohim protestat live në televizor dhe i komentojmë në Facebook.

E vetmja shumicë që bëjmë ndodhet në kuzhinë.

Të fundit