Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

OP-ED

Pse Lufta e III-të Botërore po ‘flet’, dhe Rama po hesht

Politiko 18 Qershor 2025, 20:08

Pse Lufta e III-të Botërore po ‘flet’, dhe Rama po hesht

Alfred Lela

Nuk e dimë çfarë mendon Kryeministri Edi Rama për konfliktin mes shtetit të Izraelit dhe Republikës teokratike të Iranit. Ende nuk ka bërë një deklaratë zyrtare apo një ‘shënim’ në rrjete sociale. Qoftë edhe një etyd kalimtar në ‘Sy më sy’.
Dimë se ka marrë pjesë në një dasëm hebreo-arabike, martesën e miliarderit Alex Soros dhe konsulentes demokrate Huma Abedin. Mund të thuhet se pjesëmarrja e Ramës, dasma vetë, koha e saj, pjesëmarrësit në të, është çka Kryeministri shqiptar mendon për konfliktin hebraiko-iranian. Ramës i duhet të mbajë ison e elitave liberale amerikane dhe globale, pikërisht atyre që popullonin ekskluzivisht dasmën e të birit të George Soros. Nëse për të nuk mund të thuhet se është anti-hebre, mund të konstatohen disa gjëra që kanë të bëjnë me qarin politik që ai nxjerr nga çdo gjë.
Pasë formuar një lidhje të veçantë me Presidentin turk, Erdogan, i cili sheh te Turqia një vijuese të ëndrrës së perandorisë otomane, dhe një aleancë të shenjtë islamike, Ramës i intereson të heshtë, për të mos turbulluar ujra.
Gjatë gjithë këtyre viteve, duke përdorur kulaçin, Rama është munduar që të ndërlidhë me komunitetin musliman në Shqipëri (zyrtarin ose jashtë tij) fijet e një kuptimi që e ndihmon atë vetë të rritet politikisht, dhe palën tjetër të të ndihet e akomoduar në benefite.
Në narrativën e Ramës është vërejtur së fundmi shtimi i referencat kuranike, një përpjekje e qartë për t’u pëlqyer në gjirin e komunitetit më të madh fetar. Rama e di se lufta mes Izraelit dhe Iranit shihet edhe si përballje fetare, apo sidomos si e tillë dhe, duke qenë se në Shqipëri ka muslimanë, por jo hebrej, do të luajë në zonën e sigurisë. Gjë që ia siguron heshtja.
Më e rëndësishmja, Rama nuk don që të nxitojë për t’u vënë në krah të Izraelit pa e parë sa të vendosura janë elitat e majta liberale globale-të përfaqësuara më së miri në dasmën e Soros-për t’u rreshtuar si gjithomnë, publikisht ose jo, kundër hebrejve dhe pro arabëve apo persëve.
Një gjë tjetër që ia mban dorën për të shkuar te tastiera e celularit, teksti, dhe pastaj goditja e ‘publiko’ në X apo Facebook, është edhe paqartësia e tij në raport me administratën Trump dhe vetë Presidentin. Lobimet e zgjeruara dhe përpjekjet e tij në kanale diplomatike, ekonomike dhe ndërpersonale, për të rigjetur akses në Shtëpinë e Bardhë deri më tash kanë dështuar. Në këto kushte, Rama nuk don që të ofrohet i pakërkuar, i pathirrur, pra i panevojshëm, në një koalicion Trump-Netanjahu.
Nëse ai mund t’i ketë kërkuar kryeministrit izraelit ndihmë për akses te Trump, ky është momenti për t’ia rikujtuar. Sigurisht, mes një burri që komandon shanset e një luftë ‘botërore’ si Bibi, dhe Edit që bredh dasmave luksoze, ka një hendek në momentum.
Jo se dasma është izraelito-arabe, njëfarë mizanskene e një iluzioni të pamundur të së majtës për ndërtimin e botës, por se rrjeta e Netanjahut për tani kërkon koka aleatësh të mëdhenj, që kanë dronë, jo vetëm gjuhë.
Këtu është i ngecur Edi Rama: Në labirintin e partneriteteve religjioze (Erdogani), ideologjike (elita e majtë globale) dhe oportunitetit politik (nevoja e një aksesi te Trump).
Sa keq që, një burrë që e shet veten pa prajtë si prodhim të qytetërimit, nuk e vendos dot vendin dhe qeverinë që përfaqëson në anën e qytetërimit.