Flash News
Përfshihet në flakë një apartament te bulevardi ‘Zogu i Parë’ në Tiranë
Berisha: Ishim opozita e parë që kërkuam anëtarësimin në NATO pas rënies së komunizmit
Lirohet nga qelia ish-kryebashkiaku i Fushë Arrëzit, Fran Tuci
Konstituimi i grupit të dialogut PD-PS, Bylykbashi: Prioritet është Reforma Zgjedhore
Konstituohet grupi i dialogut mes opozitës dhe mazhorancës për ‘Reformat’
Rebusi i LB: Treshen do t’a mundë të dielën, por kundërshtar ka SB
Alfred Lela
Lulzim Bashës, si shumë gjëra të tjera në politikë, ‘i ka ngelur në dorë’, non grata e Berishës dhe statusi i ish-kryeministrit në PD dhe në grupin e saj parlamentar. Ai ndoshta po konsideron një veprim që duhet ta kishte bërë prej kohësh: vrasjen politike të paraardhësit të tij.
Kur i ka munguar guximi i këtij akti në kohën e duhur, atij mund t’i mbetet ta kryejë në kohën më të gabuar të mundshme. Sepse, non grata nuk e ka dobësuar Sali Berishën; e ka heroizuar atë. Edhe kundërshtarët e tij e dinë, edhe pse nuk e thonë, që goditja e Berishës erdhi shumë vonë, edhe nëse i presupozojmë si të qëndrueshme akzuat ndaj tij. Ndër berishistët, që me sa duket janë shumë në dhe afër PD, ish-kryeari i partisë së parë opozitare gëzon tashmë statusin e heroit edhe të martirit.
Kur prej tyre pritej që hakmarrja amerikane të binte mbi Ramën apo ndonjë prej qeveritarëve të tij, ajo shkoi e shënjestroi pikërisht idhullin e tyre.
Sa i takon Berishës duket se kjo i dha një jetë të tretë politike. Situata e tij është e ngjashme me një episod të ‘Kumbarit’ ku Al Paçino në rolin e Michael Corleone thotë: every time I try to get out, they pull me back in*.
Berisha është ‘in’ tashmë, sepse amerikanët kanë bërë një lëvizje politike, por pa marrë parasysh një konsideratë antropologjike: Berisha ikën i mundur (e ka bërë në 2013), por jo i poshtëruar. Të njëjtin poshtërim ai e ka provuar edhe në vitin 1997, kur zyra e tij në Presidencë u bë shënjestra e Komiteteve të Shpëtimit me armë dhe amerikanëve me deklarata. Rezistenca do të jetë lufta e tij, sepse Berisha është malësori i agimeve ariane (cit. Rose Wilder Lane) që beson, edhe në gabim, te drejtësia e kauzës së vet.
Kjo e fundit është edhe trajektorja antropologjike e lënë mënjanë nga non grata amerikane.
Amerikanët e kanë bërë të vetën dhe nuk do të lëvizin përtej saj. Ata e kanë kuptuar se simbolika e aktit të tyre ka ndeshur në granitin e MountRushmore-it që gjendet në kokën e Berishës. Doktori nuk mund ta pranojë këtë cancel culture amerikane sepse ai mendon se, bashkë me amerikanët, (ata para këtyre) i dhanë cancel regjimit komunist të Tiranës.
Shumë mendojnë se Berisha është në përpëlitje për familjen dhe burgun, por nuk është kështu. Krejt e kundërta, ai e mendon veten në familjen e historikëve dhe ka ndërmend ta përdorë deri në fund levën e aktualitetit që e ndihmon për të mos e lejuar politikën e ditës për t’i zhyer historinë.
Kështuqë problemi i mbetet Bashës më shumë se amerikanëve të cilët problemet, lokale kur i shohin të pazgjidhshme, i arkivojnë.
Largimi i Berishës me anë të një deklarate publike, dhe duke përdorur forumet, të cilat i zotëron në masë, do të rizgjojë atë pjesë të PD që e sheh partinë si krijesë të Doktorit dhe nuk mund të pranojë asnjë obituar për të që nuk përmban ditirambe dhe lavdi. Kjo pjesë, bashkë me kaq shumë armiq nga PD-ja e vjetër, do t’ia bënte shumë të vështirë jetën politike dhe do t’ia humbte përjetësisht shanset Bashës për të mundur Ramën. Kur partia ta shihte si përfundimisht të mbaruar në raport me ardhjen në pushtet, Lulzim Basha nuk do të shërbente më shumë se gogoli në fund të arës së PD për të trembur Edi Ramën. Dikë që tashmë e njeh gogolin dhe efektshmërinë e tij.
Ashtu siç thonë amerikanët, Basha është tani in between a rock and a hard place**. Ndodh gjirthmonë kështu me atë që nuk e sigurojnë dot tempizmin politik me anë të guximit. Nëse prisni një lëvizje nga Basha ajo do të jetë moslëvizja.
Siç thonë, sërish amerikanët, when things get tough the tough get going***.
Shpjegime të termave anglisht
1-every time I try to get out, they pull me back in/ Sa herë mundohem ta mbyll, ata më mbajnë në lojë
2-in between a rock and a hard place/ literalisht-mes një shkëmbi dhe një muri. Ka kuptimin e ‘nuk ke se nga ia mban’.
3-when things get tough the tough get going/ Kur gjërat ashpërsohen, të fortët vihen në në lëvizje