Deputetë pa gjuhë e dinjitet, nuk i duhen as dreqit, shqiptarëve jo, opozitës jo e jo

Nga Hysni Gurra

Ditën e djeshme, Aleanca për Teatrin, qytetarë dhe opozita dolën në protestë kundër korrupsionit galopant të Erion Veliajt në Bashkinë e Tiranës.

Të rinjtë e zemëruar nga vjedhja që u bëhet taksave të tyre prej Veliajt dhe organizatës kriminale të drejtorëve të bashkisë, hodhën disa kërcaska në derën e bashkisë.

Një protestë jashtëzakonisht larg modelit të protestave qytetare në Athinë, Romë, Paris, Londër etj, ku qytetarët përleshen dhunshëm me policinë dhe u venë zjarrin institucioneve qeveritare sa herë u shkelen të drejtat e tyre.

Mirëpo dy kërcaskave që hodhën të rinjtë para bashkisë, si shenjë zemërimi ndaj vjedhjes miliona euroshe, iu përgjigjën në mënyrë të pashembullt aleanca e qelbësirave të ambasadorëve perëndimorë në Tiranë, nga selia britanike, amerikane, italiane e deri edhe ajo e OSBE, të cilët morën në mbrojtje hajdutin më të paskrupull që ekziston në ndonjë kryeqytet europian.

Reagimi i ambasadorëve tregon se cili është në të vërtetë këndvështrimi i tyre për shqiptarët. Duke marrë në mbrojtje një hajdut, ata i pozicionojnë shqiptarët si një popull primitiv, të paditur dhe të paemancipuar, të cilët nuk kanë të drejtë të protestojnë njëjtë si qytetarët e tjerë të kryeqyteteve europiane si Parisi, Londra, Berlini…

Pas qëndrimit që mbajtën ambasadat në mbrojtje të hapur të hajdutit, banda ‘5D’ e të cilit është në burg, pra, nuk është thashethem, pati reagime të zemëruara të atyre pak njerëzve me integritet e dinjitet të medias dhe tek-tuk ndonjë intelektual.

Kategori që nuk pranon kurrësesi që shqiptarët të cilësohen si popull me bisht, siç bënë ambasadat perëndimore dje në Tiranë.

Mirëpo, një gjë tepër interesante ndodh për të disatën herë në këto raste.

Deputetë e opozitës, Partisë Demokratike dhe të tjerë, mesa duket, mendojnë që qytetarët që u japin rrogë atyre janë vërtetë me bisht e primitivë, siç mendojnë ambasadorët!!!

Nëse vëren rrjetet sociale të deputetëve të Partisë Demokratike, shumica e të cilëve ishin dje edhe në protestë, nuk ka asnjë reagim ndaj reagimit poshtërues të ambasadave perëndimore.

Përveç Belind Këlliçit, Flamur Nokës dhe ndonjë tjetër që s’po më vjen në mend tani.

Pra, asnjë deputet nuk ka reagim kur merret  në mbrojtje nga amabasadorët një superhajdut dhe fyhen rëndë votuesit e tyre, qytetarë të cilëve u ka shkuar thika e varfërisë në palcë.

Ky lloj qëndrimi i munguar i tyre nuk vjen se ata mendojnë që ambasadorët e kanë të drejtë qëndrimin. JO!

Ata mbesin pa gjuhë prej frikës, prej mungesës së dinjitetit, prej primitivizmit politik që i karakterizon e servilizmit të shëmtuar që ekziston nga deputetë shqiptarë (të të gjitha kaheve politike) karshi lloj-lloj palaçoje që flet anglisht.

Kjo kategori njerëzish, jo vetëm nuk meriton të jetë përfaqësuese e popullit, por duhet treguar me gisht, duhet përçmuar dhe dekurajuar nga kushdo.

Të tillë deputetë kanë frikë edhe të bërtasin me zë të lartë se lideri i tyre mbahet në burg padrejtësisht. E dinë që mbahet pa prova dhe fakte i burgosur, por u mbështillet gjuha  lëmsh në fyt dhe nuk e thonë.