Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

OPINEWS

Kollaj t’i prangosim mjekët, e keqja qëndron te propaganda bajaje dhe tenderat korruptivë

Politiko 26 Qershor 2024, 16:31

Kollaj t’i prangosim mjekët, e keqja qëndron te propaganda

Nga Dritan Laçi

Lidhur mbi ndalimet sot në Onkologjik
E para Zoti mos na sprovoftë të shkojmë në atë pavion.
Por një ditë, sa kohë sëmundjet kancerogjene të ekzistojnë, mos njëri apo tjetri do duhet të shkojë.
Unë kam 7 vite që e frekuentoj rregullisht atë pavion, për shkak të sëmundjes së mamasë.
Zoti por jo vetëm, ka bërë mrekulli.
Kur them jo vetëm, flas për mjekët e këtij pavioni.
Të cilët për mua janë heronj.
Por që të kuptosh sa heronj janë duhet të rrish një ditë një atë pavion se me çfarë ata përballen.
Sigurisht kur pashë emrat e mjekëve që ishin listuar si të ndaluar apo me detyrim paraqitje nga Krimi Ekonomik, nuk u ndjeva mirë, sepse të shumtët e tyre i njoh personalisht.
Por kur gjithë ky megahetim përfundon te Emiljano, djali që nuk dihet sa kilometra bën në një ditë në korridoret e Onkologjikut, duke pritur dhe përcjellë pacientë dhe të afërm të tyre, unë them që e gjithë kjo histori vjen një erë të keqe.
Të mirëkuptohemi, sigurisht që jam kundër allishverisheve.
Por nuk kam se si ta mirëkuptoj këtë Krimin Ekonomik, që sillet si minishtet brenda një shteti që ka lejuar të zhvillohet këtë skemë në shëndetësi, me dy porta midis publikes dhe privatit.
Dhe vjen një ditë dhe kur ti je në pikë të hallit dhe nuk ka siguruar asgjë për mirëfunksionimin e shëndetit publik dhe i thotë një mjeku ‘pse ti po i çon pacientët te privati’.
Kjo është dyftyrësi me dirigjim të poshtër nga lart.
Dhe nëse ka një hetim nga duhet të nisë sot i ashtëquajturi Krimi Ekonomik dhe të na tregojë sa të forta i ka të pasmet, është ta fillojë nga Ministria e Shëndetësisë.
Si i bën tenderat?
Kujt ia jep tenderat?
Si i furnizon spitalet publike me medikamente?
Ku shkojnë këto medikamente dhe me radhë. Pse pacientët dalin të blejnë garza jashtë gardhit të spitalit?
Sepse nuk ka spitali, apo sepse i fshehin mjekët?
Dhe kur Krimi Ekonomik ta ketë kapur fort pas topeve këtë Ministrinë e Shëndetësisë, atëherë po mund të zbresë edhe te mjekët.
Sepse është kollaj sot të mbash të ndaluar një mjek duarartë për mua si Edmond Gashi.
Ata që se njohin, dhe uroj që të mos e njohin ndonjë ditë, në kuptimin që të afërmit e tyre të mos kenë nevojë për pavionin ku ai jep shërbimin, duhet ta dinë që ai është një nga asetet më të mëdha të kiirurgjisë që ka sot Onkologjiku në Shqipëri.
Dhe nuk është ai problemi i skemës privat-publik në shëndetësi, por është i politikave të mbrapshta se si politika është sjellë me sistemin shëndetësor në këto 34 vite në Shqipëri.
Largimi në këtë mënyrë i profesor Mondit nga shërbimi publik në Onkologjik, thjesht sa do të jetë një humbje e madhe te pacientët.
Janë me qindra që sot mund të flasin për aftësitë e tij.
Të cilët në këtë formë, po dërgohen te privati, pra te konkurentët e tij.
Dhe unë këtë e shikoj asgjë tjetër përveçse një luftë të pastër për konkurencë.
Sot që po flasim, për atë që se dinë janë 8 mjekë dhe sanitarë në Shërbimin Publik të Onkologjikut, që janë të diagonistifikuar me sëmundje kancerogjene.
Është një mjeke me kancer në gji, që sapo i kaluar të 45-tat.
Është një shef pavioni me pankreas.
Është një sanitare me sëmundje kancerogjene në pulmon etj etj etj
Të gjithë të ekspozuar nga radioaktiviteti.
Përse ky Krimi Ekonomik nuk ka hetuar se si janë sëmurë këta mjekë dhe a janë siguruar kushtet e duhura të ekspozimit nga lëndët radioaative?
Edhe sa mjekë duhet të na vdesin, që të nisim një hetim në Ministrinë e Shëndetësisë, nëse ky dikaster i ka marrë parasysh gjetjet e auditit të brendshëm në spitale.
Me të vërtetë mendoni që doktor Mondi, apo Alketa e me radhë janë ata që nuk e vendosin në punë Kobaltin.
A e dini sa mjekë deri dje, po mendonin ta braktisnin pavionin e Onkologjikut.
Dhe sot atë që deri dje e kishin mendim, pas arrestimeve të kolegëve të tyre, e kanë kthyer në bindje.
Sepse ndihen jo thjesht të braktisur, por tani rrezikojnë edhe prangat, vetëm sepse vjen dikush dhe i thotë më ndihmo. Dhe ky Krimi Ekonomik luan me përgjime, si në kohën e qoftëlargut.
Për mua është koha për të reflektuar thellë. Është kollaj t’i prangosim mjekët.
Por diku tjetër çalon muhabeti.
Te politikëbërja në shëndetësi dhe te gënjeshtra e madhe e shëndetësisë falas.
Aty gjejeni të keqen, te propaganda bajaje, që në krahun tjetër vazhdon të prodhojë tendera korruptivë dhe mungesë ilaçesh.
Jo te mjekët.
Ata janë bishti i kavallit në këtë histori.
Peshku vazhdon të qelbet nga koka, sa koha të ekzistojë njerëzimi.

Të fundit