Kultura e zgjidhjes së konflikteve me dhunë në Shqipëri dhe roli i venitur i Policisë

Nga Neta Fero

Në Shqipëri, kultura e zgjidhjes së konflikteve me dhunë mbetet një problem i theksuar. Edhe pse vendi ka bërë hapa drejt modernizimit, në shumë zona të Shqipërisë, dhuna ende shihet si mjeti kryesor për të zgjidhur mosmarrëveshjet.

Kjo kulturë është e lidhur ngushtë me koncepte si nderi dhe hakmarrja, të cilat vazhdojnë të ndikojnë në mënyrën se si njerëzit e perceptojnë drejtësinë dhe vetë-mbrojtjen.

Ndërkohë, roli i policisë në parandalimin dhe trajtimin e këtyre konflikteve duket i dobët dhe joefektiv. Në shumë raste, forcat e rendit ose mbërrijnë vonë, ose janë të paafta të ndërhyjnë me sukses në zgjidhjen e konflikteve.

Si rezultat, qytetarët shpesh ndihen të detyruar të marrin drejtësinë në duart e tyre, duke përforcuar ciklin e dhunës.

Ky kombinim i një kulture të dhunshme dhe një sistemi të drejtësisë që lë për të dëshiruar krijon një situatë të rrezikshme për shoqërinë shqiptare, ku konflikti mund të përshkallëzohet në mënyrë të pakthyeshme dhe pa ndonjë ndërhyrje efektive nga shteti.

Jo më larg se dje, pranë rrethrrotullimit të Teg, një “fërkim” makinash mes dy vajza u bë shkaku i një sherri të madh.

Për shkak të një parakalimi të gabuar, dy vajza kanë “fërkuar” automjetet e tyre luksoze, më konkretisht një “Audi A8” dhe një “Benz”, ku për pasojë, automjetit tip “Audi A8” i është thyer pasqyra.

Dy vajzat kanë dalë nga automjetet e tyre dhe kanë debatuar me njëra-tjetrën, por nuk e kanë ndalur me kaq. Ato kanë thirrur përmes celularit edhe shokët e tyre, të cilët pasi kanë mbërritur në vendin e ngjarjes janë dhunuar brutalisht me njëri-tjetrin.

I pari që ka mbërritur në vendin e ngjarjes ka qenë Fatjon Dauti, i cili më pas është konfliktuar me të afërmin e shoferes tjetër, shtetasin Marjo Barami.

Ata janë goditur me sende të forta me njëri-tjetrin dhe për pasojë, Fatjon Dauti ka mbetur i plagosur dhe është dërguar në spitalin e Traumës për të marrë ndihmë mjekësore. Mësohet se ai ka marrë plagë në fytyrë dhe në kokë.

Policia raportoi se në vendin e ngjarjes ka gjetur edhe një armë zjarri, e cila i përkiste Fatjon Dautit.

Të dyja vajzat e gjetën mbështetjen te këta dy djem të cilët padyshim do marrin dënim për shkak të mënyrës sesi “e zgjidhën” konfliktin.

Në këto momente lind pyetja: Pse ata nuk telefonuan policinë? Kështu dhe makina e dëmtuar përfitonte na siguracioni, por preferuan të kalonin në dhunë fizike? Në të tilla raste polica e vendit tonë mbetet “duarzbrazur” së bashku me peshën e emrit që ka.