Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

OP-ED

Pengesa e fundit që nuk kapërceu dot Luiza Gega

Politiko 24 Gusht 2022, 20:22

Pengesa e fundit që nuk kapërceu dot Luiza Gega

Marsel Lela

Tre vjet më parë atletja shqiptare Luzia Gega dilte kampione e Ballkanit për të gjashtën herë radhazi. Por fama e saj nuk ishte ajo që është sot dhe pak kush kujtohej të hidhte tek-tuk ndonjë status për të në rrjetet sociale. Pritjet në aeroportin e Rinasit nga enturazhi qeveritar dhe shtrimi i tapetit të kuq për kampionen mund të ishin, ndoshta, vetëm në fantazinë e saj.

Investimet dhe sakrificat e Luzia Gegës për të ngritur fitimtar flamurin kuq e zi, nuk kishin marrë asgjë në këmbim nga shteti shqiptar. Sfida më e madhe për kampionen ishin kushtet tepër të vështira në të cilat ajo stërvitej, pasi vendi ynë nuk ka një pistë vrapimi dhe në sport infrastruktura është gjëja bazike.

Mospasja e një piste vrapimi e detyronte Gegën të shkonte dhe të kthehej nga Elbasani çdo ditë. Përveç kampionateve ballkanike, Luiza Gega i ka dhënë Shqipërisë edhe kampionatin mesdhetar, një kompeticion prestigjoz në sportin e atletikës. Megjithatë asgjë nuk ndryshoi për Luizën, as kushtet e stërvitjes dhe as gjendja e saj financiare; vlen të përmendet se ajo akoma jeton në shtëpi me qira.

Por kjo nuk mjaftoi për të shtypur shpirtin e kampiones. Tri ditë më parë ajo triumfoi në kampionatin europian duke rrëmbyer trofeun në garën e tri mijë metrave me pengesa. Përveç vendit të parë, Luiza Gega vendosi edhe rekordin e saj personal në këtë disiplinë.

Veçse kësaj radhe shteti nuk qëndroi pasiv. Luiza kishte fituar një trofe që ata nuk mund të mos e bënin të tyrin. Pritjet në aeroport, gjezdisjet me makinë kabriolet alla Jackie Kenedy dhe radha nga kryeministri e deri tek kryebashkiaku i Tiranës se kush ta valëvisë më shumë këtë trofe na ofruan një cirk patetik deri në gërdi. Më shumë se një vlerësim i sinqertë dhe i denjë për një kampione, që veç pasioni e kishte mbajtur për të mos ndërruar flamur, ky ishte një rrëmbim, një pengmarrje e një fitoreje në të cilën ata nuk kanë kurrëfar merite.

Kujtojmë që një pritje e tillë ju bë edhe Ilir Sulit, Nënkampion bote në peshëngritje, medalje bronzi në Europianin e vitit 2000, pjesëmarrës në dy olimpiada, në vitet 1996 dhe 2000 te të cilat u rendit në respektivisht i 14-ti dhe i 5-ti. Por nuk do të kalonte shumë kohë dhe Suli bashkë me trofetë e tij do të lihej në harresë, duke i refuzuar edhe një vend pune. Një vit më parë deklarata e tij tërhoqi vëmendjen e publikut: në qendër të Tiranës u bënte thirrje që të gjithë të iknin nga Shqipëria.

Luiza Gega ia doli mbanë të kalonte të gjitha pengesat në garën prej tre mijë metrash. Madje ajo kishte kaluar edhe pengesën e moskokëçarjes së shtetit për t’i siguruar asaj kushtet më minimale për të arritur tek ky trofe. Por ajo nuk mundi dot të kalonte pengmarrjen e turpshme, sport në të cilin ky pushtet talljetrapi është kampion bote.