Peter Lucas: “Luftën e joshjes” Trump-Putin e fitoi Presidenti rus

nga Peter Lucas/ Boston Herald

 

Presidenti Donald Trump duhej të kishte arrestuar kriminelin e luftës, Vladimir Putin, në momentin që ai shkelte tokën amerikane.

Nëse vërtet donte t’i jepte fund vrasjes së grave dhe fëmijëve të pafajshëm ukrainas nga presidenti rus — siç thotë — mjaftonte që Trump ta arrestonte Putinin. Lufta Rusi/Ukrainë — Lufta e Putinit — do të kishte marrë fund.

Dhe Putini, i cili është i akuzuar nga Gjykata Penale Ndërkombëtare (GJPN), do të ndodhej tashmë në një qeli në “Alligator Alcatraz”, në pritje për t’u ekstraduar në Hagë për t’u gjykuar. Edhe populli rus i shtypur prej kohësh do të gëzonte.

Pjesë e aktakuzës së GJPN-së është edhe akuza se, gjatë pushtimit të tij të paligjshëm në Ukrainë, Putini ka rrëmbyer rreth 20 mijë fëmijë ukrainas dhe i ka dërguar për “riedukim” në Rusi.

Në vend që ta arrestonte, Trump e nderoi Putinin kur ai erdhi në të ashtuquajturin samit mbi Luftën Rusi/Ukrainë në Anchorage të Alaskës, ku Trump u duk sikur rreshtohej në krah të Rusisë kundër Ukrainës.

Ky ishte një veprim për të cilin udhëheqësit evropianë diskutuan në Uashington të hënën, me presidentin ukrainas Volodymyr Zelenskyy, kur Trump mbështeti propozimin e Putinit që, për t’i dhënë fund luftës, Rusisë t’i jepeshin copa të rëndësishme territori ukrainas.

Ky ishte, në fakt, propozimi i presidentit të pafuqishëm Joe Biden në vitin 2022, përpara se Rusia, në një akt të hapur agresioni, të pushtonte Ukrainën.

Kjo nuk do të thotë se Trump mund ta kishte arrestuar ligjërisht Putinin, megjithëse mund të kishte bashkëpunuar me GJPN-në, e cila ka lëshuar urdhër arresti për Putinin. Shtetet e Bashkuara nuk janë anëtare të GJPN-së, ashtu siç nuk është as Rusia.

Për Trump-in, do të kishte qenë njësoj si të nxirrte Gardën Kombëtare, kur askush nuk ia kishte thënë, për të ndërhyrë gjatë trazirave në Los Anxhelos apo në krimin e Uashingtonit. Por Trump e ka diskredituar GJPN-në dhe madje ka sanksionuar anëtarët e saj.

Për Putinin, aktakuza do të thotë se ai është subjekt arrestimi pothuaj kudo jashtë Rusisë, por jo në SHBA.

Shenjat për Zelenskyy-n dhe Ukrainën, se Trump do të anononte nga Putini në grabitjen e tokës dhe kundërshtimin e armëpushimit, u bënë të qarta në momentin që Putini shkelte tokën e Alaskës.

Premtimi i Trump se “nuk do të jem i kënaqur nëse nuk arrij një marrëveshje paqeje” u hodh poshtë menjëherë, sapo Putini, një ish-operativ i trajnuar i KGB-së dhe mjeshtër mashtrimesh, nisi të përkëdhelte egon e presidentit.

Lëvdatat mund të mos të të çojnë gjithmonë larg me Trump-in, por padyshim që kanë efekt, dhe Putini e shfaqi këtë duke u rënë dakord me të, deri aty sa fajësoi Joe Biden për luftën.

Putini tha se kishte provuar ta bindte “ish-kolegun amerikan” që “situata duhej çuar deri në pikën e pakthyeshme.”

Putini ra dakord me përsëritjet e Trump se nuk do të kishte pasur kurrë luftë Rusi/Ukrainë nëse president do të kishte qenë ai, e jo Joe Biden, në vitin 2022 kur Rusia pushtoi.

Po ashtu, sipas Trump, Putini ishte dakord me të se zgjedhjet e vitit 2020 ishin “manipuluar” kryesisht përmes votimit me postë. “Është e pamundur të kesh votim me postë dhe zgjedhje të ndershme. Dhe ai (Putini) ma tha këtë mua,” — i tregoi Trump Sean Hannity-t të Fox News.

Putini e teproi aq shumë me lajka, sa që ishte për t’u habitur pse nuk e propozoi Trump-in për Çmimin Nobel të Paqes, siç kishte thënë Hillary Clinton se do të bënte nëse ai arrinte t’i jepte fund luftës pa i dhënë territor Rusisë.

Dhe gjithë deklaratat e mëparshme të Trump për vendosjen e sanksioneve të ashpra ndaj Rusisë, nëse nuk pranonte një armëpushim, u shpërndanë në ajrin e hollë të Alaskës, edhe pse mbi qiellin e Anchorage kalonin me zhurmë një bombardues B-2 i shoqëruar nga katër avionë luftarakë F-35.

Trump, nga ana e tij, i cili thotë se dëshiron që vrasjet të marrin fund, u tregua aq akomodues dhe servil ndaj Putinit, sa që, si ish-manjat i pasurive të paluajtshme, u soll sikur sapo kishte mbyllur një marrëveshje të madhe për shitjen e Alaskës mbrapsht Rusisë.

Dhe një Putin i lumtur u kthye në Moskë për të lëshuar më shumë raketa e drone, jo për të vrarë ushtarë ukrainas, por gra dhe fëmijë të pafajshëm.