Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

OPINEWS

Rama dhe iluzioni i ftesës së Trump

Politiko 18 Janar 2026, 12:33

Mariela Shkurta

Edi Rama po u shet shqiptarëve një ftesë të përgjithshme të Shteteve të Bashkuara për Bordin e Paqes për Gazën si një nder personal nga Presidenti Donald Trump. Një manipulim i qëllimshëm, i ndërtuar mbi keqpërdorimin e padijes ose lodhjes së publikut nga propaganda e përditshme.

Në fakt, shqiptarët e kanë kuptuar prej kohësh se me kë kanë të bëjnë. Ata nuk e matin më Ramën nga letrat që poston në rrjete sociale, por nga pasojat e qeverisjes së tij: familje të shkatërruara, të rinj të dëbuar nga vendi, institucione të kapura dhe një shtet që gjithnjë e më shumë përjashtohet nga bota demokratike.

Nuk është rastësi që pikërisht gjatë kësaj qeverisjeje, administrata Trump ngriu vizat e emigrimit për shqiptarët, duke e renditur Shqipërinë në mesin e vendeve me korrupsion të lartë, mungesë të shtetit të së drejtës dhe perspektivë të errët zhvillimi. Kjo është pasqyra reale e “marrëdhënieve të shkëlqyera” që Rama pretendon të ketë ndërtuar.

Le ta sqarojmë faktin bazë: mbi 100 shtete anëtare të OKB-së janë ftuar të marrin pjesë në diskutimet për rindërtimin e Gazës, përmes të ashtuquajturit Bordi i Paqes. Si i tillë, edhe Kryeministri i Shqipërisë e merr ftesën jo si Edi Rama, por si përfaqësues formal i një shteti anëtar të OKB-së. Asgjë personale.

(Në vitin 2025, Këshilli i Sigurimit i OKB-së, përmes Rezolutës 2803, miratoi Planin Gjithëpërfshirës për Ndërprerjen e Konfliktit në Gaza, të propozuar nga Presidenti Trump. Në këtë kuadër u krijua Bordi i Paqes dhe strukturat për sigurinë dhe rindërtimin e Gazës.)

Por këtu lind pyetja thelbësore: çfarë lidhjeje ka me rindërtimin e Gazës një kryeministër që ka shkatërruar vendin e vet? Një kryeministër që ka dëbuar qindra mijëra shqiptarë, që ka bashkëjetuar politikisht me kartelet e drogës, që ka vjedhur zgjedhjet dhe ka shndërruar institucionet kushtetuese në dekor?

Edhe më problematike është çështja e kostos. Sipas një draft-statuti të siguruar nga Bloomberg, vendet që kërkojnë të jenë anëtare të përhershme të Bordit të Paqes duhet të paguajnë një kontribut prej 1 miliard dollarësh. Një shumë që do ta kishin të vështirë ta përballonin edhe shtete si Franca apo Gjermania – e jo më një Shqipëri e rrjepur nga korrupsioni sistemik.

Rama nuk e ka problem. Për të larë imazhin e tij ndërkombëtar dhe për të mashtruar opinionin publik të brendshëm, ai është gati të hipotekojë Shqipërinë, të cilën e trajton si pronë private politike. Këtu shtrohet pyetja që nuk mund të shmanget: kush do ta paguajë këtë faturë – shqiptarët apo paratë e drogës?

I gjithë ky teatër bëhet për të krijuar iluzionin se Rama është “mik” i administratës Trump. Një administratë që ka si prioritet luftën kundër korrupsionit, karteleve të drogës dhe bashkëpunëtorëve të tyre – dhe që nuk e ka harruar as çështjen McGonigal.

Në fund, ftesa mbetet një letër standarde. Realiteti mbetet ai që është: një kryeministër i izoluar, një vend i ndëshkuar dhe një popull që paguan çmimin e propagandës.